ତେହେରାନ: ଇରାନ ସରକାର ନେଲେ ବଡ ନିଷ୍ପତ୍ତି। ଦେଶରେ ଥିବା ଅଧିକାଂଶ ବିମାନବନ୍ଦର ଏବଂ ଆକାଶମାର୍ଗକୁ ଦେଶୀୟ ଏବଂ ଆନ୍ତର୍ଜାତୀୟ ଉଡ଼ାଣ ପାଇଁ ପୁଣି ଥରେ ଖୋଲିଛନ୍ତି ଇରାନ ସରକାର। ଏହି ନିଷ୍ପତ୍ତି ଇସ୍ରାଏଲ ସହ ସମ୍ପ୍ରତି ସମାପ୍ତ ହୋଇଥିବା ସଂଘର୍ଷ ପରେ ନିଆଯାଇଛି। ଆପଣଙ୍କୁ ଜଣାଇରଖୁ ଯେ ଗତ ୧୩ ଜୁନରୁ ଯୁଦ୍ଧ ପାଇଁ ଇରାନ ନିଜ ଆକାଶମାର୍ଗକୁ ବନ୍ଦ କରିଦେଇଥିଲା। ଇରାନର ରାଜ୍ୟ ଗଣମାଧ୍ୟମ ଅନୁସାରେ, ତେହେରାନର ମେହରାବାଦ ଏବଂ ଇମାମ ଖୋମେନୀ ଆନ୍ତର୍ଜାତୀୟ ବିମାନବନ୍ଦର ସମେତ ଦେଶର ଉତ୍ତର, ପୂର୍ବ, ପଶ୍ଚିମ ଏବଂ ଦକ୍ଷିଣ ଅଞ୍ଚଳର ବିମାନବନ୍ଦରଗୁଡ଼ିକ ପୁଣିଥରେ ଚାଲୁ ହୋଇଛି। ତେବେ, ଇସ୍ଫାହାନ ଏବଂ ତାବ୍ରିଜ ବିମାନବନ୍ଦରକୁ ଆନୁଷ୍ଠାନିକ ଭାବେ ପୁଣି ଖୋଲାଯାଇ ନାହିଁ। କାରଣ ସେଠାରେ ଆବଶ୍ୟକୀୟ ଭିତ୍ତିଭୂମି ଏବଂ ସୁରକ୍ଷା ବ୍ୟବସ୍ଥା ଏପର୍ଯ୍ୟନ୍ତ ପୂରଣ ହୋଇପାରିନାହିଁ।
ଇରାନର ନାଗରିକ ବିମାନ ଚଳାଚଳ ସଂଗଠନ (ସିଏଓ) ଅନୁସାରେ, ଏହି ନିଷ୍ପତ୍ତି ବିଭିନ୍ନ ଏଜେନ୍ସି ମଧ୍ୟରେ ସମନ୍ବୟ ଏବଂ ବିସ୍ତୃତ ସୁରକ୍ଷା ଏବଂ ନିରାପତ୍ତା ସମୀକ୍ଷା ପରେ ନିଆଯାଇଛି। ଦେଶୀୟ ଏବଂ ଆନ୍ତର୍ଜାତୀୟ ଉଡ଼ାଣ ପାଇଁ ସକାଳ ୫ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଅନୁମତି ଦିଆଯାଇଛି। ଏହା ସହିତ, ପୂର୍ବାଞ୍ଚଳର ଆକାଶମାର୍ଗ ୨୪ ଘଣ୍ଟା ଖୋଲା ରହିଛି। ଯେଉଁଠାରେ ମଶାଦ ଏବଂ ଚାବାହାର ବିମାନବନ୍ଦର ସମ୍ପୂର୍ଣ୍ଣ ରୂପେ କାର୍ଯ୍ୟକ୍ଷମ ଅଛି।
ଫ୍ଲାଇଦୁବାଇ ପ୍ରଥମ ଆନ୍ତର୍ଜାତୀୟ ବିମାନ ସେବା ଭାବେ ଶୁକ୍ରବାର ଇମାମ ଖୋମେନୀ ବିମାନବନ୍ଦରରେ ଅବତରଣ କରିଛି। ଯାହା ୨୦ ଦିନର ବିମାନ ସେବା ବନ୍ଦ ପରେ ଏକ ଗୁରୁତ୍ଵପୂର୍ଣ୍ଣ ପଦକ୍ଷେପ ଭାବେ ପରିଗଣିତ ହେଉଛି। ଇରାନର କେନ୍ଦ୍ରୀୟ ଏବଂ ପଶ୍ଚିମାଞ୍ଚଳର ଆକାଶମାର୍ଗ ମଧ୍ୟ ଆନ୍ତର୍ଜାତୀୟ ଟ୍ରାନ୍ସିଟ ଉଡ଼ାଣ ପାଇଁ ସକାଳ ୫ଟାରୁ ସନ୍ଧ୍ୟା ୬ଟା ମଧ୍ୟରେ ଖୋଲା ରହିବ।
ଇରାନର ରାଜପଥ ଓ ନଗର ବିକାଶ ମନ୍ତ୍ରଣାଳୟର ମୁଖପାତ୍ର ମଜିଦ ଆଖଭାନ ଯାତ୍ରୀମାନଙ୍କୁ ସରକାରୀ ଘୋଷଣା ଅନୁସରଣ କରିବାକୁ ଏବଂ ନିଶ୍ଚିତ ସୂଚନା ବିନା ବିମାନବନ୍ଦରକୁ ନଯିବାକୁ ପରାମର୍ଶ ଦେଇଛନ୍ତି। ତେବେ ସରକାରଙ୍କ ଏହି ନିଷ୍ପତ୍ତି ମଧ୍ୟପ୍ରାଚ୍ୟ ଅଞ୍ଚଳରେ ବିମାନ ଚଳାଚଳରେ ସ୍ଥିରତା ଫେରାଇ ଆଣିବାରେ ଏକ ମହତ୍ତ୍ୱପୂର୍ଣ୍ଣ ପଦକ୍ଷେପ ବୋଲି ବିବେଚନା କରାଯାଉଛି।
