ନୂଆଦିଲ୍ଲୀ,୨୩/୦୬: ଇସ୍ରାଏଲୀ ସେନା ଦାବି କରିଛି ଯେ ସେମାନେ ପଶ୍ଚିମ, ପୂର୍ବ ଏବଂ ମଧ୍ୟ ଇରାନର ଛଅଟି ଏୟାରବେସ୍ ଉପରେ ଏୟାରଷ୍ଟ୍ରାଇକ କରିଛନ୍ତି ଏବଂ ୧୫ଟି ଇରାନୀ ଯୁଦ୍ଧ ବିମାନକୁ ଖସାଇ ଦେଇଛନ୍ତି। ଏକ୍ସ ରେ ପୋଷ୍ଟ କରାଯାଇଥିବା ଏକ ବିବୃତ୍ତିରେ ଇସ୍ରାଏଲ କହିଛି ଯେ ଆଇଡିଏଫ୍ ଡ୍ରୋନ ୧୫ଟି ଇରାନୀ ବିମାନ ଏବଂ ହେଲିକପ୍ଟରକୁ ନଷ୍ଟ କରିଛି। ପୋଷ୍ଟ ସହିତ ସଂଲଗ୍ନ ଏକ ଫଟୋରେ ମେହରାବାଦ, ମାଶାଦ, ଡେଜଫୁଲ ଏୟାରବେସ୍କୁ ଟାର୍ଗେଟ କରାଯାଇଥିବା ଦେଖାଯାଇଛି। ଏହି ଆକ୍ରମଣ କେବେ ହୋଇଥିଲା ତାହା ସ୍ପଷ୍ଟ ହୋଇଛି। ସେପଟେ ଇରାନ ଏପର୍ଯ୍ୟନ୍ତ ଆକ୍ରମଣକୁ ନିଶ୍ଚିତ କରିନାହିଁ।
ଟେଲିଗ୍ରାମରେ ଇସ୍ରାଏଲୀ ସେନା କହିଛି ଯେ "ଆଇଡିଏଫ୍ ଇଣ୍ଟେଲିଜେନ୍ସ ନିର୍ଦ୍ଦେଶାଳୟରୁ ସଠିକ୍ ସୂଚନା ପାଇବା ପରେ, ଇସ୍ରାଏଲୀ ବାୟୁସେନାର ୧୫ ରୁ ଅଧିକ ଯୁଦ୍ଧ ବିମାନ ଇରାନର କେରମାନଶାହ ଅଞ୍ଚଳରେ ଆକ୍ରମଣ କରିଥିଲା ଏବଂ ଇସ୍ରାଏଲୀ ଅଞ୍ଚଳ ଆଡ଼କୁ ଲକ୍ଷ୍ୟ କରାଯାଇଥିବା ଅନେକ କ୍ଷେପଣାସ୍ତ୍ର ପ୍ରକ୍ଷେପଣ ଏବଂ ସଂରକ୍ଷଣ ସ୍ଥାନକୁ ଧ୍ବଂସ କରିଥିଲା।" ପୋଷ୍ଟରେ ଆହୁରି କୁହାଯାଇଛି ଯେ, 'ଇସ୍ରାଏଲକୁ ରକ୍ଷା କରିବା ଏବଂ ଇରାନ ବାୟୁସୀମା ଉପରେ ଆକାଶ ମାର୍ଗରେ ଦକ୍ଷତା ହାସଲ କରିବା ପାଇଁ ଇସ୍ରାଏଲୀ ସାମରିକ ବାହିନୀ ଇରାନ ଶାସନର ସାମରିକ କ୍ଷମତାକୁ ହ୍ରାସ କରିବା ପାଇଁ ପ୍ରୟାସ ଜାରି ରଖିଛି,।"
ଇସ୍ରାଏଲ ଜୁନ୍ ୧୩ ତାରିଖରେ ଇରାନ ଉପରେ ବଡ଼ ଆକ୍ରମଣ କରିଥିଲା, ଏହାର କ୍ଷେପଣାସ୍ତ୍ର ଏବଂ ପରମାଣୁ ପ୍ରତିଷ୍ଠାନ, ସାମରିକ ଅଧିକାରୀ ଏବଂ ପରମାଣୁ ବୈଜ୍ଞାନିକମାନଙ୍କୁ ଟାର୍ଗେଟ ମଧ୍ୟ କରିଥିଲା। ସେବେଠାରୁ, ଉଭୟଙ୍କ ମଧ୍ୟରେ ଯୁଦ୍ଧ ଆରମ୍ଭ ହୋଇଛି। ରବିବାର ଦିନ ଆମେରିକା ମଧ୍ୟ ଏଥିରେ ସାମିଲ ହୋଇଥିଲା। ସେ ଲଢ଼ୁଆ ବିମାନ ଦ୍ୱାରା ବଙ୍କର-ବଷ୍ଟର ବୋମା ସହିତ ତିନୋଟି ଇରାନୀ ପରମାଣୁ ସ୍ଥାନ ଉପରେ ଆକ୍ରମଣ କରିଥିଲା। ଇରାନ ମଧ୍ୟ ପ୍ରତିଶୋଧ ନେବାକୁ ଅଣ୍ଟା ଭିଡ଼ିଛି।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଜୋର ଦେଇ କହିଛନ୍ତି ଯେ ଏହି ଆକ୍ରମଣ ଇରାନର ପରମାଣୁ କ୍ଷମତାକୁ "ଧ୍ୱଂସ" କରିଛି। କିନ୍ତୁ ଅନ୍ୟ ଅଧିକାରୀମାନେ କହିଛନ୍ତି ଯେ ତେହେରାନର ପରମାଣୁ କାର୍ଯ୍ୟକ୍ରମ ଉପରେ ଏହାର ପ୍ରଭାବ କେତେ ପଡ଼ିବ ତାହା ନିର୍ଣ୍ଣୟ କରିବା ବହୁତ ଶୀଘ୍ର ହେବ।
