ନୂଆଦିଲ୍ଲୀ,୦୩/୧୦: ଇରାନର ମିସାଇଲ ମାଡ଼ ପରେ ଉତ୍ୟକ୍ତ ଇସ୍ରାଏଲ୍ ଲେବାନନରେ ହିଜବୁଲ୍ଲାହର ଭିିତ୍ତିଭୁମୀ ଉପରକୁ ଆକ୍ରମଣକୁ ତୀବ୍ର କରିଛି। ମଙ୍ଗଳବାର ବିଳମ୍ବିତ ରାତିରେ ଇସ୍ରାଏଲ ପୁଣି ଥରେ ଅନେକ ସ୍ଥାନକୁ କ୍ଷେପଣାସ୍ତ୍ର ଆକ୍ରମଣ କରିଥିଲା, ଯେଉଁଥିରେ ଅନେକ ବିଲ୍ଡିଂ ଧ୍ବଂସ ହୋଇଯାଇଥିବା ବେଳେ ଅନେକ ବିଲ୍ଡିଂରୁ ଧୂଆଁ ବାହାରୁଥିବାର ଦେଖାଯାଇଥିଲା। ଜାତୀୟ ଗଣମାଧ୍ୟମରେ ଦେଖାଯାଇଥିବା ସେଠାକାର ଗ୍ରାଉଣ୍ଡ ରିପୋର୍ଟ ଅନୁସାରେ, ଇସ୍ରାଏଲର ସୈନିକମାନେ ଲେବାନନର ଦକ୍ଷିଣ ସୀମାରେ ୪୦୦ ମିଟର ପର୍ଯ୍ୟନ୍ତ ପ୍ରବେଶ କରିଛନ୍ତି। ଇସ୍ରାଏଲ କହିଛି ଯେ ହିଜବୁଲ୍ଲାହ ଟାର୍ଗେଟକୁ ଧ୍ୱଂସ କରିବା ପାଇଁ ସେମାନେ ଗ୍ରାଉଣ୍ଡ ରେଡ୍ କରୁଛନ୍ତି। ବିପଦକୁ ଦୃଷ୍ଟିରେ ରଖି ଲେବାନନ୍ ସୀମାଠାରୁ ୨୫ କିଲୋମିଟର ଦୂରତା ମଧ୍ୟରେ ଥିବା ଗାଁଗୁଡିକୁ ସ୍ଥାନାନ୍ତର କରିଛି। ସାଧାରଣ ଲୋକ ଏହି ଗାଁ'ରେ ରୁହନ୍ତି ନାହିଁ। କେବଳ ସେନା କିମ୍ବା ହିଜବୁଲ୍ଲାହ ଆତଙ୍କବାଦୀଙ୍କ ସହ ଜଡ଼ିତ ଲୋକମାନେ ଏଠାରେ ରହିଛନ୍ତି।
ଇସ୍ରାଏଲର ଆକ୍ରମଣ ପରେ ସମଗ୍ର କୋଠାଟି କିପରି ଭୁଶୁଡି ପଡିଛି ତାହା ଜାତୀୟ ଗଣମାଧ୍ୟମରେ ପ୍ରକାଶିିତ ଖବରରୁ ସ୍ପଷ୍ଟ ଜଣାପଡ଼ୁଛି। ସାଥିରେ କୁହାଯାଇଛି ଯେ, ମଙ୍ଗଳବାର ବିଳମ୍ବିତ ରାତିରେ ଏବଂ ବୁଧବାର ସକାଳେ ଲେବାନାନର ହିଜବୁଲ୍ଲାହ ଗଡ଼ ଦାହିଦ ଉପରେ ଇସ୍ରାଏଲ ସର୍ବାଧିକ ଏୟାର ଷ୍ଟ୍ରାଇକ କରିଛି। ତେବେ ଏହି ଏୟାର ଷ୍ଟ୍ରାଇକରେ କେତେ ଲୋକଙ୍କର ମୃତ୍ୟୁ ହୋଇଛି ସେନେଇ ପରିସ୍ଥିତି ସ୍ପଷ୍ଟ ହୋଇନାହିଁ।
ତେଲ ଅଭିବ ଏବଂ ଅନ୍ୟ ସହର ଉପରେ ଇରାନର କ୍ଷେପଣାସ୍ତ୍ର ଆକ୍ରମଣ ଇସ୍ରାଏଲର ଅନେକ ଭାରତୀୟ ଶ୍ରମିକ ଏବଂ ଛାତ୍ରଙ୍କୁ ବହୁତ ଚିନ୍ତାରେ ପକାଇଛି। ଯଦିଓ ସେମାନେ ବର୍ତ୍ତମାନ ପାଇଁ ସୁରକ୍ଷିତ, ତଥାପି ସେମାନଙ୍କର ଡର ବଢ଼ିବାରେ ଲାଗିଛି କାରଣ ଉତ୍ତେଜନା ଆହୁରି ବଢ଼ିପାରେ। କ୍ଷେପଣାସ୍ତ୍ର ବର୍ଷା ହେବାପରେ ଭୟଭୀତ ଭାରତୀୟ ଛାତ୍ରମାନେ ବାହାରକୁ ବାହାରିବାକୁ ଅପେକ୍ଷା କରିଛନ୍ତି ।
