ତେଲ ଆଭିଭ୍,୦୫/୧୦: ଲେବାନନ୍ରେ ଇସ୍ରାଏଲ ସ୍ଥଳସେନା ଅପରେସନ ଜୋରଦାର କରିଛି । ସ୍ଥଳସେନାକୁ ବାୟୁସେନା ଏୟାର ଷ୍ଟ୍ରାଇକ୍ କରି ପୂର୍ଣ୍ଣ ସମର୍ଥନ ଦେଇଛି । ଚଳିତ ସପ୍ତାହରେ ଆରମ୍ଭ ହୋଇଥିବା ଏହି ଅପରେସନରେ ଇସ୍ରାଏଲ ସ୍ଥଳସେନା ୨୫୦ରୁ ଊଦ୍ଧ୍ୱର୍ ହିଜ୍ବୁଲ୍ଲା ଲଢ଼ୁଆଙ୍କୁ ନିପାତ କଲାଣି । ସେମାନଙ୍କ ମଧ୍ୟରେ ହିଜ୍ବୁଲ୍ଲାର ବହୁ କମାଣ୍ଡର ଅଛନ୍ତି । ହିଜ୍ବୁଲ୍ଲାର ଗୁଇନ୍ଦା ମୁଖ୍ୟାଳୟକୁ ମଧ୍ୟ ଇସ୍ରାଏଲ ଟାର୍ଗେଟ କରିଛି ।
ଇସ୍ରାଏଲ ସେନା ଗୁରୁବାର ରାତିରେ ଏୟାରଷ୍ଟ୍ରାଇକ୍ କରି ଲେବାନନ୍ରୁ ସିରିଆ ଲମ୍ବିଥିବା ଏକ ୩.୫ କିମି ବିଶିଷ୍ଟ ସୁଡ଼ଙ୍ଗକୁ ଧ୍ୱଂସ କରିଛନ୍ତି। ଏହି ସୁଡ଼ଙ୍ଗ ଜରିଆରେ ଇରାନର ଅସ୍ତ୍ରଶସ୍ତ୍ର ଲେବାନନରେ ହିଜବୁଲ୍ଲା ଆତଙ୍କୀଙ୍କ ପାଖରେ ପହଞ୍ଚୁଥିଲା । ଇସ୍ରାଏଲର ଏୟାର ଷ୍ଟ୍ରାଇକ୍ରେ ହିଜ୍ବୁଲ୍ଲାର ବହୁ ଅଟ୍ଟାଳିକା ଏବଂ ଅସ୍ତ୍ର ଡିପୋ ଧ୍ୱଂସ ହୋଇଛି । ଆକ୍ରମଣରେ ହିଜ୍ବୁଲ୍ଲା ମୁଖ୍ୟ ହାସନ ନସରଲ୍ଲାହର ଭାଇ ହାଶିମ ସୈଫିଦ୍ଦିନ୍ର ମୃତ୍ୟୁ ଘଟଛି । ମାଟି ତଳେ ବନିଥିବା ଏକ ବଙ୍କରକୁ ଟାର୍ଗେଟ କରି ଇସ୍ରାଏଲ ୧୧ ମିସାଇଲ ଛାଡ଼ିଥିଲା । ସେହି ସମୟରେ ସେଠାରେ ହିଜ୍ବୁଲ୍ଲାର ଶୀର୍ଷ ନେତାମାନେ ବୈଠକ କରୁଥିଲେ । ସେଠାରେ ସୈଫିଦ୍ଦିନ ଉପସ୍ଥିତ ଥିଲା ବୋଲି କୁହାଯାଉଛି । ସେହିପରି ହିଜ୍ବୁଲ୍ଲାର ଯୋଗାଯୋଗ ନେଟୱାର୍କ କମାଣ୍ଡର ମହମ୍ମର ରସିଦ୍ ସ୍କାଫି ମଧ୍ୟ ନିପାତ ହୋଇଥିବା ଇସ୍ରାଏଲ ଦାବି କରିଛି । ସେ ୨୦୦୦ ମସିହାରୁ ସେଠାରେ ଏହି ଦାୟିତ୍ୱରେ ଥିଲା ।
ଅନ୍ୟପକ୍ଷରେ ଇରାନ ବିଦେଶ ମନ୍ତ୍ରୀ ଅବାସ୍ ଆରାକ୍ଚି ଶୁକ୍ରବାର ଲେବାନନ ରାଜଧାନୀ ବିରୁଟରେ ପହଞ୍ଚିଛନ୍ତି । ଏଠାରେ ଥିବା ଶିଆ ମୁସ୍ଲିମ୍ ଏବଂ ହିଜ୍ବୁଲ୍ଲା ସହ ଇରାନ ସର୍ବଦା ଛିଡ଼ା ହୋଇଛି ବୋଲି ସେ କହିଛନ୍ତି । ଅନ୍ୟପକ୍ଷରେ ଇସ୍ରାଏଲ ଇରାନ ଉପରେ ଆକ୍ରମଣ କଲେ ଏହାର କଡ଼ା ଜବାବ ଦିଆଯିବ ବୋଲି ଇରାନ ସେନାର ଡେପୁଟି କମାଣ୍ଡର ଅଲି ଫଦାଭି କହିଛନ୍ତି । ଜବାବରେ ଇସ୍ରାଏଲର ଏନର୍ଜୀ ଏବଂ ଗ୍ୟାସ୍ ପ୍ରତିଷ୍ଠାନ ଉପରେ ହମ୍ଲା କରାଯିବ ବୋଲି ସେ ଚେତାବନୀ ଦେଇଛନ୍ତି । ଗତ ୨୪ ଘଣ୍ଟା ମଧ୍ୟରେ ଇସ୍ରାଏଲ ହିଜ୍ବୁଲ୍ଲା ଉପରେ ୨୩୦ ମିସାଇଲ ଛାଡ଼ିଛି । ଆକ୍ରମଣରେ ଲେବାନନ୍ରେ ୨୮ ସ୍ୱାସ୍ଥ୍ୟକର୍ମୀଙ୍କ ମୃତ୍ୟୁ ଘଟିଥିବା ବିଶ୍ୱ ସ୍ୱାସ୍ଥ୍ୟ ସଙ୍ଗଠନ (ଡବ୍ଲ୍ୟୁଏଚ୍ଓ) କହିଛି । ଲେବାନନ୍ ସମେତ ଇସ୍ରାଏଲ ଗାଜା ଏବଂ ୱେଷ୍ଟବ୍ୟାଙ୍କରେ ମଧ୍ୟ ଆକ୍ରମଣ ଜାରି ରଖିଛି । ୱେଷ୍ଟବ୍ୟାଙ୍କର ତୁଲକର୍ମ ସହରରେ ଏକ ଶରଣାର୍ଥୀ ଶିବିର ଉପରେ ଇସ୍ରାଏଲ ଏୟାରଷ୍ଟ୍ରାଇକ କରିଛି । ଏଥିରେ ୧୮ ଜଣଙ୍କ ମୃତ୍ୟୁ ଘଟିଛି ।
ଗାଜାରେ ଇସ୍ରାଏଲ ଆକ୍ରମଣରେ ଦିନକରେ ୯୯ ଜଣଙ୍କ ମୃତ୍ୟୁ ଘଟିଥିବା ଗାଜା ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ କୁହାଯାଇଛି । ୧୬୯ ଜଣ ଆହତ ହୋଇଛନ୍ତି । ଗତବର୍ଷ ଅକ୍ଟୋବର ୭ ପରଠାରୁ ଇସ୍ରାଏଲ ଆକ୍ରମଣରେ ଗାଜାରେ ୪୧,୭୮୮ ଜଣଙ୍କ ମୃତ୍ୟୁ ଘଟିଲାଣି । ଅନ୍ୟପକ୍ଷରେ ଶୁକ୍ରବାର ଇରାନ ସୁପ୍ରିମଲିଡରଙ୍କ ଜନସମ୍ବୋଧନ ସରିବା କ୍ଷଣି ଲେବାନନ୍ ପଟୁ ଇସ୍ରାଏଲକୁ ବହୁସଂଖ୍ୟାରେ ରକେଟ ମାଡ଼ କରାଯାଇଛି । ଇତିମଧ୍ୟରେ ଇରାନର ମିସାଇଲ ଆକ୍ରମଣ ଜବାବରେ ଇସ୍ରାଏଲ ପ୍ରତିଆକ୍ରମଣ ପାଇଁ ପ୍ରସ୍ତୁତି କରୁଛି । କିନ୍ତୁ ଇସ୍ରାଏଲ ଆକ୍ରମଣ କଲେ ଇରାନ ଦୃଢ଼ ଜବାବ ଦେବ ବୋଲି କହିଛି । ଇସ୍ରାଏଲର ଶକ୍ତି ଭିତ୍ତିଭୂମି ବିଶେଷକରି ତୈଳ ରିଫାଇନାରୀ ଏବଂ ଗ୍ୟାସ୍ ପ୍ରତିଷ୍ଠାନ ଉପରେ ହମ୍ଲା କରାଯିବ ବୋଲି ଇରାନ ସେନାର ଡେପୁଟି କମାଣ୍ଡର ଅଲି ଫଦାଭି କହିଛନ୍ତି ।
ସେପଟେ ଇରାନ ସୁପ୍ରିମଲିଡର ଆୟତୋଲା ଅଲି ଖାମେନେଇ ଇସ୍ରାଏଲକୁ ଧମକ ଦେଇଛନ୍ତି । ସେ ଆଜି ତେହରାନରେ ଥିବା ଗ୍ରାଣ୍ଡ୍ ମସ୍ଜିଦରେ ହିଜ୍ବୁଲ୍ଲା ମୁଖ୍ୟର ସ୍ମୃତିରେ ନମାଜ ପାଠ କରିଥିଲେ । ଏହି ଅବସରରେ ସେ ଦୁନିଆରେ ମୁସଲମାନଙ୍କ ଶତ୍ରୁଙ୍କ ବିରୋଧରେ ସଭିଏଁ ଏକଜୁଟ ହେବାକୁ ଅପିଲ କରିଥିଲେ । ଖାମେନେଇ କହିଥିଲେ, ଗତବର୍ଷ ହମାସ୍ ପକ୍ଷରୁ ଇସ୍ରାଏଲ ଉପରେ ‘ଅଲ୍-ଆକ୍ସା ଫ୍ଲଡ୍’ ଆକ୍ରମଣ ଠିକ୍ ଥିଲା । ଇରାନ ନିଜର କର୍ତ୍ତବ୍ୟ ପାଳନ କରିବାକୁ ବିଳମ୍ବ କରିବ ନାହିଁ କିମ୍ବା ତରତର ହେବ ନାହିଁ ।
ମଧ୍ୟପ୍ରାଚ୍ୟରେ ଇସ୍ରାଏଲ ବିରୋଧରେ ସଂଘର୍ଷ ଇରାନ ଜାରି ରଖିବ । ହିଜ୍ବୁଲ୍ଲା କିମ୍ବା ହମାସ୍କୁ ଇସ୍ରାଏଲ ବେଶୀ କ୍ଷତି ପହଞ୍ଚାଇ ପାରିବ ନାହିଁ । ଏହି ଇହୁଦୀ ଦେଶ ଏବଂ ଆମେରିକା ସ୍ୱପ୍ନ ଦେଖୁଛନ୍ତି । ଇସ୍ରାଏଲକୁ ମୂଳରୁ ଓପାଡ଼ି ଫିଙ୍ଗି ଦିଆଯିବ । ଏହା ନକଲି ଏବଂ ଅସ୍ଥାୟୀ । ଖୁବ୍ଶୀଘ୍ର ଇସ୍ରାଏଲର ଅନ୍ତ ଘଟିବ । ମୁସ୍ଲିମ ଦେଶମାନେ ଏକାଠି ହୋଇ ଆଫଗାନିସ୍ତାନରୁ ୟେମେନ, ଇରାନରୁ ଗାଜା ଏବଂ ଲେବାନନ ପର୍ଯ୍ୟନ୍ତ ପ୍ରତିରକ୍ଷାର କବଚ ମଜଭୁତ କରିବାକୁ ପଡ଼ିବ । ଯିଏ ଇରାନର ଶତ୍ରୁ ସିଏ ପାଲେଷ୍ଟାଇନ, ଲେବାନନ, ସିରିଆ, ଇଜିପ୍ଟ, ୟେମେନ ଏବଂ ଇରାକର ମଧ୍ୟ ଶତ୍ରୁ ବୋଲି ଖାମେନେଇ କହିଥିଲେ।
