ଗାଜା, ୧୮/୦୫: ହମାସ ଆତଙ୍କୀଙ୍କୁ ସଫା କରିବା ଏବଂ ନିଜ ପଣବନ୍ଦୀଙ୍କୁ ମୁକ୍ତ କରିବା ଲକ୍ଷ୍ୟରେ ଇସ୍ରାଏଲ୍ର ସେନା ଗାଜା ଉପରେ ପ୍ରଚଣ୍ଡ ଆକ୍ରମଣ ଜାରି ରଖିଛି । ଏହି ଅପରେସନ ଦ୍ୱାରା ଗତ ୩ ଦିନରେ ଇସ୍ରାଏଲ୍ ଅନେକ ବଡ଼ ଆକ୍ରମଣ କରିଛି । ଯେଉଁଥିରେ ୨୫୦ରୁ ଅଧିକ ଲୋକ ପ୍ରାଣ ହରାଇଛନ୍ତି । ଗତ ୨୪ ଘଣ୍ଟାରେ ଗାଜା ପଟ୍ଟିରେ ଥିବା ହମାସର ୧୫୦ରୁ ଊଦ୍ଧ୍ୱର୍ ଆଡ୍ଡା ଉପରେ ଜୋରଦାର ଆକ୍ରମଣ ହୋଇଛି । ହମାସର ଅନ୍ତ ନ ଘଟିବା ପର୍ଯ୍ୟନ୍ତ ଏହି ଅପରେସନ ଜାରି ରହିବା ନେଇ ଇସ୍ରାଏଲ ସେନା ପକ୍ଷରୁ କୁହାଯାଇଛି ।
ଉଲ୍ଲେଖଯୋଗ୍ୟ, ଗାଜାକୁ ନିଜ ନିୟନ୍ତ୍ରଣକୁ ନେବା ସକାଶେ ମେ ୫ରେ ଇସ୍ରାଏଲ୍ ‘ଗିଦୋନ ଚାରିଅଟ୍ସ’ ସାମରିକ ଅପରେସନ ଆରମ୍ଭ କରିଥିଲା । ଇସ୍ରାଏଲ ଚଳିତବର୍ଷ ମାର୍ଚ୍ଚରେ ଗାଜା ଭିତରକୁ ଖାଦ୍ୟ ଓ ଇନ୍ଧନ ଯୋଗାଣ ବନ୍ଦ ପାଇଁ ନିଷ୍ପତ୍ତି ନେଇଥିଲା । ଏହାଦ୍ୱାରା ହମାସ ଦୁର୍ବଳ ହୋଇଯିବା ନେଇ ଇସ୍ରାଏଲ ସରକାର ଦାବି କରିଥିଲେ । ତେବେ ଏହା ଯୋଗୁ ସାଧାରଣ ଜନତା ବି ପ୍ରଭାବିତ ହେଉଛନ୍ତି । ଶନିବାର ହୋଇଥିବା ଆକ୍ରମଣରେ ଉତ୍ତର ଗାଜାରେ ଅନେକ କୋଠା ଧ୍ୱଂସ ହୋଇଯାଇଛି । ଏଥିରେ ଛୋଟ ପିଲାଙ୍କ ସମେତ ଅନେକ ଲୋକଙ୍କ ମୃତ୍ୟୁ ଘଟିଛି ।
ଗାଜାରେ ଗତ ୧୯ ମାସ ହେଲା ଜାରି ରହିଥିବା ଯୁଦ୍ଧ ଯୋଗୁ ୫ ଲକ୍ଷ ଲୋକ ଦୁର୍ଭିକ୍ଷରେ କାଳାତିପାତ କରୁଛନ୍ତି। ଜାତିସଂଘ ନିଜର ଏକ ରିପୋର୍ଟରେ କହିଥିଲା କି ଇସ୍ରାଏଲ ଯଦି କଟକଣା ନ ହଟାଏ, ତେବେ ଗାଜାରେ ପ୍ରତି ୫ରୁ ଜଣେ ବ୍ୟକ୍ତି କ୍ଷୁଧାର ସମ୍ମୁଖୀନ ହୋଇପାରନ୍ତି। ୨୧ ଲକ୍ଷ ଲୋକଙ୍କୁ ଅକାଳ ମରୁଡ଼ିର ସାମ୍ନା କରିବାକୁ ପଡ଼ିପାରେ । ବଗଦାଦ୍ରେ ଆଜି ଅନୁଷ୍ଠିତ ଆରବ ଲିଗ୍ ଶିଖର ସମ୍ମିଳନୀରେ ଯୋଗଦେଇଥିବା ନେତାମାନେ ତୁରନ୍ତ ଗାଜାରେ ଯୁଦ୍ଧ ବନ୍ଦ କରିବା ଲାଗି ଦାବି କରିଛନ୍ତି । ୨୦୨୩ ଅକ୍ଟୋବରରୁ ଚାଲିଥିବା ଇସ୍ରାଏଲ-ହମାସ ଯୁଦ୍ଧରେ ଏ ପର୍ଯ୍ୟନ୍ତ ୬୧ ହଜାରରୁ ଅଧିକ ଲୋକଙ୍କ ମୃତ୍ୟୁ ଘଟିଲାଣି ।
