ନୂଆଦିଲ୍ଲୀ: ଇସ୍ରାଏଲ ଏବଂ ହିଜବୁଲ୍ଲା ସଂଘର୍ଷ ମଧ୍ୟରେ ଲେବାନନରେ ଇସ୍ରାଏଲର କମାଣ୍ଡର ସମେତ ୮ ସୈନିକଙ୍କ ମୃତ୍ୟୁ ହୋଇଛି । ବୁଧବାର ଏନେଇ ଇସ୍ରାଏଲ ସେନା ସୂଚନା ଦେଇଛି । ଲେବାନନରେ ପଶି ଅପରେସନ୍‌ କରୁଥିବା ଇସ୍ରାଏଲ ସୈନିକଙ୍କ ଏହା ପ୍ରଥମ ମୃତ୍ୟୁ । ନ୍ୟୁଜ  ଏଜେନ୍ସି ରୟଟର୍ସ ଏବଂ ସ୍କାଇ ନ୍ୟୁଜ୍‌ର ରିପୋର୍ଟ ଅନୁସାରେ, ମୃତ କମାଣ୍ଡର ହେଉଛନ୍ତି ୨୨ ବର୍ଷୀୟ ଏତନ ଇତଜାକ୍‌ ଓଷ୍ଟର । 

ଅନ୍ୟ ଏକ ନ୍ୟୁଜ ଏଜେନ୍ସି ଅନୁସାରେ, ଦକ୍ଷିଣ ଲେବାନନ୍‌ରେ ହୋଇଥିବା ସଂଘର୍ଷରେ ୮ ଜଣ ଇସ୍ରାଏଲୀ ସୈନିକଙ୍କ ମୃତ୍ୟୁ ହୋଇଛି । ସେପଟେ ହିଜବୁଲ୍ଲା ଏବଂ ଇରାନ ବିରୋଧରେ ନିଜର ଅଭିଯାନକୁ ନେଇ ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ୍‌ ନେତାନ୍ୟାହୁ ଦେଶରେ ନବବର୍ଷ ପାଳନ ଅବସରରେ ବଡ଼ ଦାବି କରିଛନ୍ତି । ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ସେ ପୋଷ୍ଟ କରି କହିଛନ୍ତି, ‘ଏହା ସଂପୂର୍ଣ୍ଣ ବିଜୟର ବର୍ଷ ହେବ ।’ 

ଅନ୍ୟପଟେ, ଇସ୍ରାଏଲ ଉପରେ ଇରାନ୍‌ର ଆକ୍ରମଣକୁ କଡ଼ା ଭାଷାରେ ନିନ୍ଦା କରିଛି ଆମେରିକା । ଆଗକୁ ଇସ୍ରାଏଲ ଉପରେ ଆକ୍ରମଣ ନକରିବାକୁ ଇରାନକୁ ଚେତବାନୀ ଦେବା ସହ ଏହାର ପ୍ରକ୍ସି ଆତଙ୍କବାଦୀ ସଂଗଠନକୁ ରୋକିବାକୁ ନିର୍ଦ୍ଦେଶ ଦେଇଛି ଆମେରିକା । ମଧ୍ୟପ୍ରାଚ୍ୟର ହିତ ଏବଂ ସୈନିକଙ୍କ ସୁରକ୍ଷା ଲାଗି ଆମେରିକା ପଛଘୁଞ୍ଚା ଦେବ ନାହିଁ । ଇସ୍ରାଏଲର ରକ୍ଷା ଲାଗି ଆମେରିକା ପ୍ରତିବଦ୍ଧ ବୋଲି ବାଇଡେନ୍‌ ପ୍ରଶାସନ ସଫା ସଫା ଶୁଣାଇ ଦେଇଛି ।  ଏହାରି ମଧ୍ୟରେ ରୟଟର୍ସର ଏକ ରିପୋର୍ଟ ଅନୁସାରେ, ଇାରାନର ସର୍ବୋଚ୍ଚ ନେତା ଅୟତୁଲ୍ଲା ଖାମେନି ହିଜବୁଲ୍ଲାର ମୁଖ୍ୟ ହସନ ନସରଲ୍ଲାକୁ ଇସ୍ରାଏଲ ଆକ୍ରମଣ ସଂପର୍କରେ ପୂର୍ବରୁ ଚେତାଇ ଦେଇଥିଲେ । ଏହା ସହ ଲେବାନନରୁ ଅନ୍ୟତ୍ର ଚାଲିଯିବାକୁ ତାକୁ କହିଥିଲେ ।