ନୂଆଦିଲ୍ଲୀ, ୨୬/୬ : ଜାହ୍ନବୀ ଡାଙ୍ଗେତି... ଜଣେ ପ୍ରେରଣା, ଏକ ଆଶା ଏବଂ ମହିଳା ସଶକ୍ତିକରଣର ଉଦାହରଣ। ସେହି ଝିଅମାନଙ୍କ ପାଇଁ, ଯେଉଁମାନେ କେବଳ ସ୍ଵପ୍ନ ଦେଖନ୍ତି, ହେଲେ ଏହାକୁ ବାସ୍ତବ ରୂପ ଦେବାକୁ ଆତ୍ମବିଶ୍ଵାସ ଦେଖାଇ ପାରନ୍ତିନି। ସମାଜ, ପରିସ୍ଥିତି ଏବଂ ସୀମାରେଖାକୁ ଦାୟୀ କରି ଭାଗ୍ୟକୁ ଆଦରି ନିଅନ୍ତି। ସ୍ଵପ୍ନକୁ ପୁଟୁଳିରେ ସାଉଁଟି ଦିଅନ୍ତି। ତେବେ କିଏ ଏହି ଜାହ୍ନବୀ ? ଯିଏ ମାତ୍ର ୨୩ ବର୍ଷ ବୟସରେ ରଚିଲେ ଇତିହାସ। ନାସା ପ୍ରୋଗ୍ରାମ ଶେଷ କରିଥିବା ପ୍ରଥମ ଭାରତୀୟ। ୨୦୨୯ରେ ଯିବେ ମହାକାଶ।
ଆନ୍ଧ୍ରପ୍ରଦେଶର ଏକ ଛୋଟ ସହର ପଲକୋଲ୍ଲୁରେ ଜନ୍ମିତ ଜାହ୍ନବୀ ଡାଙ୍ଗେତି। ମାତ୍ର ୧୧ ବର୍ଷ ବୟସରେ ଅନ୍ତରୀକ୍ଷରେ ଉଡ଼ିବାକୁ ସ୍ବପ୍ନ ଦେଖିଥିଲେ। ଆଈମା କାହାଣୀରେ ତାରା ଗଣିବାଠୁ ନେଇ ମହାକାଶରେ ତାରା ଛୁଇଁବାକୁ ପଣ କରିଥିଲେ। ମହାକାଶପ୍ରେମୀ ଜାହ୍ନବୀ ପଲାକୋଲ୍ଲୁରେ ମାଧ୍ୟମିକ ଶିକ୍ଷା ଶେଷ କରି ପଞ୍ଜାବ ସ୍ଥିତ ଲଭ୍ଲୀ ପ୍ରଫେସନାଲ ୟୁନିଭର୍ସିଟିରେ ସ୍ନାତକ ଶେଷ କରିଥିଲେ । ଜାହ୍ନବୀ ଦୀର୍ଘ ଦିନ ଧରି ସାଇନ୍ସ, ଟେକ୍ନୋଲୋଜି, ଇଞ୍ଜିନିୟରିଂ, ମ୍ୟାଥମେଟିକ୍ସ ଏବଂ ଅନ୍ତରୀକ୍ଷ ଅନୁସନ୍ଧାନ ସହ ଜଡ଼ିତ ଅଛନ୍ତି। ସେ ଜିରୋ ଗ୍ରାଭିଟି, ହାଇ ଅଲଟିଟ୍ୟୁଡ୍ ମିଶନ, ସ୍ପେସ୍ ସୁଟ୍ ଅପରେସନ, ଏବଂ ପ୍ଲେନେଟାରୀ ସିମ୍ୟୁଲେସନ ଭଳି କ୍ଷତ୍ରରେ ପ୍ରଶିକ୍ଷଣ ପ୍ରାପ୍ତ କରିଛନ୍ତି। ଏତଦ୍ ବ୍ୟତୀତ ସେ ନାସାର ଇଣ୍ଟରନ୍ୟାସନାଲ ଏୟାର ଆଣ୍ଡ ସ୍ପେସ୍ ପ୍ରୋଗ୍ରାମରେ ଚୟନ ହୋଇଥିବା ପ୍ରଥମ ଭାରତୀୟ ହୋଇପାରିଛନ୍ତି।
ଏହି ଗୁରୁତ୍ୱପୂର୍ଣ୍ଣ ଚୟନ ଟାଇଟନ୍ସ ସ୍ପେସ୍ର ଉଦ୍ଘାଟନୀ କକ୍ଷୀୟ ମିଶନରେ ଅଂଶଗ୍ରହଣ ପାଇଁ ଜାହ୍ନବୀଙ୍କ ମାର୍ଗ ପ୍ରଶସ୍ତ କରିଛି । ଏହି ଆମେରିକୀୟ ମିଶନ ୨୦୨୯ ମାର୍ଚ୍ଚ ପାଇଁ ଧାର୍ଯ୍ୟ ହୋଇଛି। ଏହି ମିଶନରେ, ସେ ପୃଥିବୀକୁ ଦୁଇଥର ପରିକ୍ରମା କରିବେ। ସେ ୩ ଘଣ୍ଟା ପାଇଁ ଶୂନ୍ୟ ଗୁରୁତ୍ୱାକର୍ଷଣରେ ଭାସିବେ ଏବଂ ଗୋଟିଏ ଦିନରେ ଦୁଇଟି ସୂର୍ଯ୍ୟୋଦୟ ଏବଂ ଦୁଇଟି ସୂର୍ଯ୍ୟାସ୍ତ ଦେଖିବେ। ଏଥିପାଇଁ ସେ ୩ ବର୍ଷର ପ୍ରଶିକ୍ଷଣ ନେବେ। ନାସାର ପ୍ରବୀଣ ମହାକାଶଚାରୀ ଏବଂ ଅବସରପ୍ରାପ୍ତ ଆମେରିକୀୟ ସେନା କର୍ଣ୍ଣେଲ ୱିଲିୟମ୍ ମ୍ୟାକଆର୍ଥର୍ ଜୁନିଅର ଏହି ମିଶନର ନେତୃତ୍ୱ ନେବେ।
