କଟକରୋଡ,୧୫/୯: ଚଳିତବର୍ଷ ନୂତନ ଭାବେ ପ୍ରାୟ ୫ ଏକର ପରିମିତ ଝାରପଡ଼ା ମେଳଣ ପଡ଼ିଆରେ ମା’ ଦୁର୍ଗାଙ୍କ ଆବାହନ ପାଇଁ ପ୍ରସ୍ତୁତି ଚାଲିଛି । ମନ୍ତ୍ର ଧ୍ୱନିରେ କମ୍ପି ଉଠିବ ଝାରପଡ଼ା ଗ୍ରାମ ଓ ଆଖପାଖ ଅଞ୍ଚଳ । ରବିବାର ଏନେଇ ମେଳଣ ପଡିଆରେ ଏକ ସାମ୍ବାଦିକ ସମ୍ମିଳନୀରେ ସମସ୍ତ ସୂଚନା ଦେଇଛନ୍ତି ଝାରପଡ଼ା ଦୁର୍ଗାପୂଜା ସମିତି କର୍ମକର୍ତ୍ତା । ସଭାପତି ପ୍ରଭାତ କୁମାର ମାର୍ଥା, ଉପସଭାପତି ସୁନୀଲ କୁମାର ଜେନା, ସାଧାରଣ ସମ୍ପାଦକ ପ୍ରକାଶ ସାମନ୍ତରାୟ, ସଂଗଠନ ସମ୍ପାଦକ ସୁରେଶ ଚନ୍ଦ୍ର ଜେନା ଓ ମୁଖ୍ୟ ଉପଦେଷ୍ଟା ଜଗନ୍ନାଥ ପ୍ରଧାନ ପ୍ରମୁଖ ଉପସ୍ଥିତ ରହି ତୋରଣର ଅବିକଳ ନକ୍ସା ପ୍ରଦର୍ଶନ କରିଥିଲେ ।
ଚଳିତଥର ଏଠାରେ ବୌଦ୍ଧଗଡ଼ ଦୁର୍ଗ ନିର୍ମାଣ ହେବ । ମୁଖ୍ୟ ଉପଦେଷ୍ଟା ଶ୍ରୀ ପ୍ରଧାନ କହିଲେ, ଝାରପଡ଼ା ରାଜଧାନୀର ଏକ ପୁରତନ ଗ୍ରାମ ହେତୁ ଏହାର ଐତିହାସିକ ପୃଷ୍ଠଭୂମି ରହିଛି । ପୂର୍ବରୁ ଏହି ଅଞ୍ଚଳ ବୌଦ୍ଧଗଡ଼ ଦୁର୍ଗ ଭାବେ ନାମିତ ଥିବାବେଳେ ଅନେକ ବୀରତ୍ୱର ଗାଥା ବହନ କରିଛି । ଏହାକୁ ପୁନର୍ଜୀବିତ କରିବା ବୌଦ୍ଧଗଡ଼ ଦୁର୍ଗ ତୋରଣ ନିର୍ମାଣର ମୂଳ ଲକ୍ଷ୍ୟ । ଏହାର ଉଚ୍ଚତା ୯୦ ଫୁଟ ଓ ଓସାର ୧୨୦ ଫୁଟ ରଖାଯାଇଛି । କଟକର ଚଗଲା ସାହୁ ଓ ତାଙ୍କ ୪୦ ସହଯୋଗୀ ଏହାର ନିର୍ମାଣ ଦାୟିତ୍ୱରେ ଅଛନ୍ତି । ତୋରଣ ସହିତ ଆଲୋକ ସଜ୍ଜା ଉପରେ ବିଶେଷ ଗୁରୁତ୍ୱ ଦିଆଯିବ । ମଣ୍ଡପ ଆଖପାଖରେ ୭ ସୁଉଚ୍ଚ ଓ ୨୦ ମଧ୍ୟମ ଧରଣର ଏଲ୍ଇଡି ଗେଟ୍ ରହିବ । ମୃଣ୍ମୟ ମୂର୍ତ୍ତିଙ୍କ ଉଚ୍ଚତା ୧୦ଫୁଟ ହେବ ।
ଷଷ୍ଠୀରେ ଝାରପଡ଼ା ଗ୍ରାମର ଆରାଧ୍ୟ ପତିତପାବନ ମନ୍ଦିରରେ ବେଲବରଣୀ ପୂଜା ପରେ ଏକ କଳସ ଶୋଭାଯାତ୍ରା ପୂଜା ସ୍ଥଳରେ ପହଞ୍ଚିବ । ସେଠାରେ ଦଶମୀ ପର୍ଯ୍ୟନ୍ତ ଦେବୀଙ୍କ ଆବାହନ ଯଥାରୀତି ଅନୁଷ୍ଠିତ ହେବ । ଷଷ୍ଠୀରୁ ଦଶମୀ ପର୍ଯ୍ୟନ୍ତ ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ । ଶ୍ରଦ୍ଧାଳୁଙ୍କ ସୁରକ୍ଷିତ ଦର୍ଶନ ପାଇଁ ୭ ପ୍ରବେଶ ପଥ ରଖାଯିବ । କମିଶନରେଟ ପୁଲିସ ସହ ୫୦୦ ସ୍ୱେଚ୍ଛାସେବୀ ଏବଂ ମହିଳା ଓ ପୁରୁଷ ସୁରକ୍ଷାକର୍ମୀ ଭିଡ ନିୟନ୍ତ୍ରଣ, ଶୃଙ୍ଖଳା ରକ୍ଷା ଓ ଟ୍ରାଫିକ ପରିଚାଳନା କରିବେ । ସିସିଟିଭି କ୍ୟାମେରା ଲାଗିବା ସହ ଅଗ୍ନି ନିର୍ବାପକ ବ୍ୟବସ୍ଥା ରହିବ । ଗାଡ଼ି ପାର୍କିଂ ପାଇଁ ୪ ସ୍ଥାନ ଚିହ୍ନଟ କରାଯାଇଛି । ପାରମ୍ପରିକ ବାଦ୍ୟ ନୃତ୍ୟରେ ଭସାଣି ଶୋଭାଯାତ୍ରା ସ୍ଥାନୀୟ ଅଞ୍ଚଳ ପରିକ୍ରମା ପରେ ସହିଦନଗର ଭସାଣି ଉତ୍ସବରେ ସାମିଲ ହେବ ବୋଲି ସମିତି ପକ୍ଷରୁ କୁହାଯାଇଛି । ସାମ୍ବାଦିକ ସମ୍ମିଳନୀରେ ଝାରପଡ଼ା ୱେଲଫେୟାର ଆସୋସିଏସନ ସଭାପତି ଗୋରାଚାନ୍ଦ ମଙ୍ଗରାଜ, ସଂପାଦକ ଉମାକାନ୍ତ ଜେନା, କୋଷାଧ୍ୟକ୍ଷ କଲିମଉଦ୍ଦିନ ଖାନ ଓ ଉପଦେଷ୍ଟା ରବୀନ୍ଦ୍ର କୁମାର ଜେନା ପ୍ରମୁଖ ଉପସ୍ଥିତଥିଲେ।
