ଠାକୁରମୁଣ୍ଡା-୧୬/୫(ଆପ୍ର): ଠାକୁରମୁଣ୍ଡା ବ୍ଲକ ମହୁଲଡିହା ଗ୍ରାମ ପଞ୍ଚାୟତ ଅନ୍ତର୍ଗତ ମହୁଲଡିହା ଗ୍ରାମର ଜାଉଁରିଦର ସାହିରେ ବଜ୍ରାଘାତରେ ୩ଟି ବାଛୁରୀଙ୍କ ମୃତ୍ୟୁ ହୋଇଥିବା ଜଣାପଡିଛି। ୧୫ ତାରିଖ ସନ୍ଧ୍ୟା ସାତଟା ସମୟରେ ବର୍ଷା ସହିତ ଅହରହ ବଜ୍ରପାତ ହୋଇଥିଲା। ଏହି ସମୟରେ ଜାଉଁରିଦର ସାହିର ମଧୁ ହାଁସଦାଙ୍କ ଦୁଇଟି ଓ ଗଜିନାଥ ମାର୍ଣ୍ଡିଙ୍କ ଗୋଟିଏ ବାଛୁରୀ ଘର ପାଖ ଆମ୍ବଗଛ ମୂଳରେ ଆଶ୍ରୟ ନେଇଥିଲେ। ଏହି ସମୟରେ ଉକ୍ତ ଆମ୍ୱଗଛ ଉପରେ ହଠାତ ବଜ୍ରାଘାତ ହେବାରୁ ଘଟଣାସ୍ଥଳରେ ବାଛୁରୀଗୁଡିକଙ୍କ ମୃତ୍ୟୁ ହୋଇଯାଇଥିଲା।

ବଜ୍ରାଘାତ ଏତେ ଭୟଙ୍କର ଥିଲା ଯେ, ପାଖରେ ଥିବା ବିଦ୍ୟୁତ ଖୁଣ୍ଟ ମଧ୍ୟ ଏଥିରେ କ୍ଷତିଗ୍ରସ୍ତ ହୋଇଥିଲା। ବିଦ୍ୟୁତ ଖୁଣ୍ଟରେ ଥିବା ଶଙ୍ଖ ଫାଟିଯାଇଥିବାରୁ ଅଞ୍ଚଳ ସମ୍ପୂର୍ଣ୍ଣ ଅନ୍ଧାରରେ ଥିବାରୁ ଘଟଣା ଜଣାପଡ଼ିନଥିଲାl ଆଜି ସକାଳେ ମଧୁ ଓ ଗଜିନାଥ ଏପରି ଘଟଣା ଜାଣିବା ପରେ ଦୁଃଖରେ ବାଛୁରୀ ତିନୋଟିର ସତ୍କାର କରିଦେଇଥିବା ଜଣାପଡିଛି। 

ଅଜ୍ଞାତ ବଶତଃ ବଜ୍ରପାତ ମୃତ୍ୟୁ ସମ୍ପର୍କରେ ପ୍ରାଣୀ ଚିକିତ୍ସା ବିଭାଗରେ ସୂଚନା ଦେଇପାରିନଥିଲେ। ମାତ୍ର ଏହା ବଜ୍ରାଘାତ ଜନିତ ହୋଇଥିବାରୁ ବିଭାଗୀୟ କର୍ତ୍ତୃପକ୍ଷ ଅନୁସନ୍ଧାନ କରି ସହାୟତା ଯୋଗାଇବାକୁ ସୁପାରିଶ କରିବାକୁ ଗ୍ରାମବାସୀମାନେ ଅନୁରୋଧ କରିଛନ୍ତି। ପ୍ରକାଶ ଥାଉକି ଗତବର୍ଷ ଜୁନ ମାସରେ ଏହି ସାହିର କିସୁନ ମାର୍ଣ୍ଡିଙ୍କ ବଳଦ ଓ ଦୁଃଖିଆ ହେମ୍ବ୍ରମଙ୍କ ଗାଈ ବଜ୍ରାଘାତରେ ମୃତ୍ୟୁ ହୋଇଥିଲେ ବି ଏଯାବତ କୌଣସି କ୍ଷତିପୂରଣ ମିଳିନାହିଁ ବୋଲି ଅଭିଯୋଗ ହୋଇଛି।