ନୂଆଦିଲ୍ଲୀ: ଗୋଟିଏପଟେ ସଂରକ୍ଷଣ ଅନ୍ୟପଟେ ସମାଲୋଚନା। ମୁସଲିମ କଣ୍ଟ୍ରାକ୍ଟରମାନଙ୍କୁ ରାଜ୍ୟରେ ହେଉଥିବା ଟେଣ୍ଟର ବାବଦରେ ୪ ପ୍ରତିଶତ ସଂରକ୍ଷଣ ଦେବା ମାମଲାରେ ମୋହର ମାରିଛନ୍ତି କର୍ଣ୍ଣାଟକ ସରକାର। ସବୁଠୁ ବଡ କଥା ହେଉଛି ଆଜି ବିଧାନସଭାରେ ଏହି ବିଲ ଆଗତ କରିବା ସମୟରେ ବିରୋଧି ବିଜେପି ଏହାର କଡା ବିରୋଧ କରିଥିଲା। ତେବେ ବହୁ ବାଦ ବିବାଦ ମଧ୍ୟରେ ଏହି ବିଲକୁ ଲାଗୁ କରିଛନ୍ତି କର୍ଣ୍ଣାଟକ ରାଜ୍ୟ ସରକାର।

ମୁଖ୍ୟମନ୍ତ୍ରୀ ସିଦ୍ଧରମିୟାଙ୍କ ନେତୃତ୍ତ୍ୱରେ ଆଇନ ଓ ସଂସଦୀୟ ବ୍ୟାପାର ମନ୍ତ୍ରୀ ହିକ୍ ପାଟିଲ ସଂସଦରେ ଏହି ବିଲ ଆଗତ କରିଥିଲେ। ଏହି ବିଲ୍ କର୍ଣ୍ଣାଟକ ଟ୍ରାନ୍ସପରେନ୍ସି ଇନ ପବ୍ଲିକ ପ୍ରକ୍ୟୁରମେଣ୍ଟସ୍(କେଟିପିପି) ନିୟମ ଅଧିନରେ ପାସ୍ ହୋଇଥିବା ଜଣାପଡିଛି। ଏହି ନୂତନ ନିୟମ ଅନୁଯାୟୀ ୨ କୋଟି ଯାଏଁ ବିଭିନ୍ନ ସିଭିଲ୍ କଣ୍ଟ୍ରାକ୍ଟ କାମ ଓ ୧ କୋଟି ପର୍ଯ୍ୟନ୍ତ ପଣ୍ୟ ଓ ସେବାପାଇଁ ମୁସଲିମ କଣ୍ଟ୍ରାକ୍ଟରମାନଙ୍କୁ 4 ପ୍ରତିଶତ ସଂରକ୍ଷଣ ପ୍ରଦାନ କାରଯାଇଛି। 

ଆଜି ବିଧାନସଭାରେ ଅଧିବେଶନଟି ବିଜେପି ବିଧାୟକମାନଙ୍କ ତୀବ୍ର ବିରୋଧ ସହିତ ଆରମ୍ଭ ହୋଇଥିଲା। ଗୃହରେ ଆଗତ ହୋଇଥିବା  ବିଲ୍‌ଟିକୁ ଅସାମ୍ବିଧାନିକ ଏବଂ ରାଜନୈତିକ ତୁଷ୍ଟିକରଣ ପାଇଁ କରାଯାଇଛି ବୋଲି ସେମାନେ ଅଭିଯୋଗ ଆଣିଥିଲେ। ପୂର୍ବାହ୍ନରେ, ବିଜେପି ସଦସ୍ୟମାନେ ଗୃହର ମଧ୍ୟ ଭାଗକୁ ପଶି ହୋହାଲ୍ଲା କରିବା ସହ ବିଭିନ୍ନ ଡକ୍ୟୁମେଣ୍ଟ ଚିରି ଗୃହର କାର୍ଯ୍ୟରେ ବାଧା ସୃଷ୍ଟି କରିଥିଲେ। ଏହି ବିଲ୍‌ଟି  ମୁସଲିମ୍ କୋଟା ପାଇଁ ଉପସ୍ଥାପିତ କରାଯାଉଛି ବୋଲି କହିବା ସହ ବାଚସ୍ପତିଙ୍କୁ କିଛି କହିବାକୁ ଦେଇନଥିଲେ।

ବିଜେପି ବିଧାୟକମାନଙ୍କ ବିଶୃଙ୍ଖଳାର ପ୍ରତିକ୍ରିୟାରେ, ବାଚସ୍ପତି ୟୁଟି ଖାଦେର ମୋଟ୍ ୧୮ ଜଣ ବିଜେପି ବିଧାୟକଙ୍କୁ ଛଅ ମାସ ପାଇଁ ନିଲମ୍ବିତ କରିଥିଲେ। ନିଲମ୍ବିତ ସଦସ୍ୟମାନଙ୍କୁ ମାର୍ଶାଲମାନେ ବଳପୂର୍ବକ ବିଧାନସଭାରୁ ବାହାର କରିଦେଇଥିଲେ। ଅନ୍ୟପଟେ ଶାସକ ଦଳ ଏହାକୁ ସମସ୍ତଙ୍କ ସ୍ୱାର୍ଥକୁ ଦୃଷ୍ଟିରେ ରଖି ନିଷ୍ପତ୍ତି ନିଆଯାଉଛି ବୋଲି କହିଛି।