ଭୁବନେଶ୍ୱର,୦୮/୧୦: ତୋରଣରେ ଝଲସିବ କାଠମାଣ୍ଡୁର ବୁଦ୍ଧ ମନ୍ଦିର । ଏକାମ୍ର କ୍ଷେତ୍ରରେ ରାଜଧାନୀବାସୀ ପାଇବେ ନେପାଳର ଅନୁଭୂତି । କେବଳ ସେତିକି ନୁହେଁ, ୪ ଦିନ ଧରି ଚାଲିବ ସାଂସ୍କୃତିକ କାର୍ଯ୍ୟକ୍ରମ । ମୁଖ୍ୟ ଆକର୍ଷଣ ସାଜିବ ବରିଷ୍ଠ ନାଗରିକମାନଙ୍କ ଦ୍ୱାରା ‘ମହିଷାମର୍ଦ୍ଦିନୀ’ ଗୀତିନୀଟ୍ୟ ପରିବେଷଣ । ଯେଉଁଥିରେ ବରିଷ୍ଠ ନାଗରିକମାନେ ଜୀବନ୍ତ ଅଭିନୟ କରିବେ । ଏଭଳି ନିଆରା ଢଙ୍ଗରେ ମା’ ଙ୍କୁ ଆବହାନ କରୁଛି ଡୁମୁଡୁମା ଦୁର୍ଗାପୂଜା ସମିତି ।
ଚଳିତ ବର୍ଷ ଏହି ସମିତି ୨୨ ବର୍ଷରେ ପଦାର୍ପଣ କରିଛି । ପ୍ରତିବର୍ଷ ଭଳି ଚଳିତ ବର୍ଷ ତୋରଣରେ ଦର୍ଶକଙ୍କୁ ବିମୋହିତ କରିବାକୁ ନିର୍ମାଣ ହେଉଛି କାଠମାଣ୍ଡୁର ବୁଦ୍ଧ ମନ୍ଦିର ସଦୃଶ ତୋରଣ । ଏଥିପାଇଁ ପ୍ରାୟ ୩୦ ଜଣ ବଙ୍ଗୀୟ କାରିଗର ଦିନରାତି କାମରେ ଲାଗିଛନ୍ତି । ତୋରଣର ଓସାର ୬୦ ଫୁଟ ଓ ଉଚ୍ଚତା ୮୦ ଫୁଟ ରହିବ । ସେହିଭଳି ମା’ ଙ୍କ ପ୍ରତିମା ୧୪ ଫୁଟ ଓ ମେଢ ୧୮ ଫୁଟ ହେବ । ଚଳିତ ବର୍ଷ ମା’ ଙ୍କ ସହ ପାଶ୍ୱର୍ ଦେବଦେବୀ ଚାନ୍ଦି ମୁକୁଟ ଓ ରାଣୀହାର ପିନ୍ଧି ଭକ୍ତଙ୍କୁ ଦର୍ଶନ ଦେବେ ।
ସପ୍ତମୀଠାରୁ ନବମୀ ପର୍ଯ୍ୟନ୍ତ ମା’ଙ୍କ ପାଖରେ ଅନ୍ନ, ଡାଲମା, ଖଟା ଓ ଖୀରି ଭୋଗ ହେବ । ନବମୀ ଦିନ ଶ୍ରଦ୍ଧାଳୁମାନଙ୍କ ପାଇଁ ପ୍ରସାଦ ସେବନ ବ୍ୟବସ୍ଥା କରାଯାଇଛି । ଦଶମୀ ଦିନ ରାତିରେ ପଣା ଭୋଗ କରାଯାଇ ମା’ ଙ୍କ ପୂଜାବିଧି ସମାପ୍ତ କରାଯିବ । ସପ୍ତମୀ ଦିନ ଗୀତିନାଟ୍ୟ, ଅଷ୍ଟମୀ ଦିନ ଗ୍ରୁପ୍ ଡ୍ୟାନ୍ସ, ନବମୀ ଦିନ ମେଲୋଡ଼ି, ଦଶମୀରେ ନୟାଗଡ଼ର ନବରଙ୍ଗୀ ହାସ୍ୟରସାତ୍ମକ ନାଟକ ପରିବେଷଣ କରାଯିବ।
