ଭୁବନେଶ୍ୱର,୦୪/୦୩: ୨୦୨୫-୨୬ ଶିକ୍ଷାବର୍ଷ ପାଇଁ ସ୍କୁଲରେ ନାମଲେଖା ହେବ । ଏଥିପାଇଁ ବିଦ୍ୟାଳୟସ୍ତରରେ ପ୍ରବେଶ ଉତ୍ସବ ପାଳନ କରାଯିବ । ଏପ୍ରିଲ୍ ମାସରେ ଖଡି ଛୁଇଁବେ ପିଲା । ଏନେଇ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ସୂଚନା ଦେଇଛନ୍ତି ।
ମିଳିଥିବା ସୂଚନା ଅନୁଯାୟୀ, ପ୍ରତିବର୍ଷ ପରି ଚଳିତବର୍ଷ ମଧ୍ୟ ବିଦ୍ୟାଳୟ ପ୍ରବେଶ ଉତ୍ସବ ପାଳନ କରାଯିବ । ନୂଆ କରି ନାମ ଲେଖାଉଥିବା ପିଲାଙ୍କୁ ସ୍କୁଲରେ ସ୍ୱାଗତ କରାଯିବ । ବିଦ୍ୟାଳୟ ବାହାରେ ଥିବା ବୟସ ଉପଯୋଗୀ ସମସ୍ତ ପିଲାଙ୍କୁ ସ୍କୁଲକୁ ଅଣାଯିବ । ଏପରି ଯେଉଁଠି ପିଲାମାନେ ସ୍କୁଲକୁ ଆସୁନଥିବେ ସେଠି ପିଲାଙ୍କୁ ଚିହ୍ନଟ କରାଯାଇ ନାମଲେଖା ପାଇଁ ଉତ୍ସାହିତ କରାଯିବ । ଅଙ୍ଗନବାଡ଼ି କର୍ମୀଙ୍କ ସହାୟତାରେ ସ୍କୁଲ କର୍ତ୍ତୃପକ୍ଷ ୫ ବର୍ଷରୁ ଅଧିକ ଓ ୬ ବର୍ଷରୁ ଅଧିକ ପିଲାଙ୍କର ଏକ ତାଲିକା ପ୍ରସ୍ତୁତ କରାଯିବ ।
ବିଦ୍ୟାଳୟ ପରିଚାଳନା କମିଟି ସଦସ୍ୟ, ପୁରାତନ ଛାତ୍ରଛାତ୍ରୀଙ୍କ ସହାୟତାରେ ବୈଠକ ଆୟୋଜନ କରି ପ୍ରବେଶ ଉତ୍ସବ ପାଳନ ପାଳନ ହେବ । ଅନ୍ୟପଟେ ବିଭିନ୍ନ ହ୍ୱାଟସ୍ଆପ ଗ୍ରୁପ୍ରେ ପ୍ରବେଶ ଉତ୍ସବ ଓ ଖଡ଼ି ଛୁଆଁ ନେଇ ଏକ ସାଧା ପେପରରେ ଏକ ଲେଖା ଘୂରି ବୁଲୁଛି । ଏଥିରେ ପ୍ରଧାନଶିକ୍ଷକଙ୍କ ପାଇଁ ଥିବା ଦାୟିତ୍ୱକୁ ସୂଚନା ଦିଆଯାଇଛି । ଏଥିରେ ଏହା ମଧ୍ୟ ଉଲ୍ଲେଖ ରହିଛି ମୁଖ୍ୟମନ୍ତ୍ରୀଙ୍କ ନିମନ୍ତ୍ରଣ ପତ୍ର ବଣ୍ଟନ କରି ଆଗାମୀ ଶିକ୍ଷା ବର୍ଷର କାର୍ଯ୍ୟକ୍ରମ ଆରମ୍ଭ କରିବେ । ଏହାକୁ ସ୍କୁଲସ୍ତରୀୟ କାର୍ଯ୍ୟକ୍ରମ କରାଯିବ । ଏହାକୁ ନେଇ ବିଦ୍ୟାଳୟ ପରିଚାଳନା କମିଟି ଓ ପୁରାତନ ଛାତ୍ରଛାତ୍ରୀ ବୈଠକ କରି ପ୍ରସ୍ତୁତ ହେବେ । ତେବେ ଏହି ଚିଠିରେ କେତେ ସତ୍ୟତା ଅଛି ତା ଜଣା ନାହିଁ । ଏ ବାବଦରେ ମନ୍ତ୍ରୀ ଶ୍ରୀ ଗଣ୍ଡ କହିଛନ୍ତି, ମୁଖ୍ୟମନ୍ତ୍ରୀ ପିଲାଙ୍କୁ ନିମନ୍ତ୍ରଣ ପତ୍ର ବାଣ୍ଟିବେ ଏ ବାବଦରେ ମୁଁ ଅବଗତ ନାହିଁ ।
ଉଲ୍ଲେଖଯୋଗ୍ୟ, ଆସନ୍ତା ଶିକ୍ଷା ବର୍ଷ (୨୦୨୫- ୨୬)ରେ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ଜାତୀୟ ଶିକ୍ଷା ନୀତି ୨୦୨୦ ଲାଗୁ କରାଯିବ । ସମସ୍ତ ପ୍ରାଥମିକ ସ୍କୁଲରେ ଶିଶୁବାଟିକା ଶ୍ରେଣୀ ଖୋଲାଯିବ । ଏଥିରେ ପିଲାଙ୍କୁ ପ୍ରାକ୍ ପ୍ରାଥମିକ ଶ୍ରେଣୀ ପାଠ ପଢ଼ାଯିବ । ଏନେଇ ପ୍ରସ୍ତୁତି ଆରମ୍ଭ ହୋଇଛି
