ନୂଆଦିଲ୍ଲୀ ୨୩/୦୬: ମଧ୍ୟପ୍ରାଚ୍ୟରେ ଯୁଦ୍ଧ ଦିନକୁ ଦିନ ତୀବ୍ରତର ହେଉଥିବା ବେଳେ ଇରାନ୍ର ଶୀର୍ଷ ନେତା (ସୁପ୍ରିମ୍ ଲିଡର) ଆୟାତୋଲ୍ଲା ଅଲୀ ଖାମେନେଇଙ୍କୁ ହତ୍ୟା କରାଯିବା ନେଇ ରିପୋର୍ଟ ଆସୁଛି । ଉଭୟ ଇସ୍ରାଏଲ୍ ଓ ଆମେରିକା ହତ୍ୟା ଧମକ ଦେଇସାରିଲେଣି । ଏଭଳି ସ୍ଥିତିରେ ରବିବାର ଆମେରିକା ଯୁଦ୍ଧକୁ ଡେଇଁବା ପରେ ଇରାନ୍ର ପରାଜୟ ନିଶ୍ଚିତ ବୋଲି ଅନୁମାନ କରାଯାଉଛି । ଏହି ଆଶଙ୍କା ମଧ୍ୟରେ ଖାମେନେଇ ବଙ୍କର ମଧ୍ୟରେ ଥିବା ସୁରକ୍ଷିତ ସ୍ଥାନକୁ ଚାଲିଯାଇଛନ୍ତି । ସେଠାରେ ତାଙ୍କ ସହ ସମସ୍ତ ବୈଦ୍ୟୁତିକ ଯୋଗାଯୋଗ ବ୍ୟବସ୍ଥା କାଟ୍ କରାଯାଇଛି । ପୂର୍ବରୁ ବୈଦ୍ୟୁତିକ ଯୋଗାଯୋଗ ବ୍ୟବସ୍ଥାକୁ ମାଧ୍ୟମ କରି ଇସ୍ରାଏଲ୍ ଇରାନ୍ର ଅନେକ ବୈଜ୍ଞାନିକ ଓ ସେନା କମାଣ୍ଡରଙ୍କୁ ହତ୍ୟା କରିଥିଲା । ଏବେ ଏହାର ନଜର ସିଧା ଖାମେନେଇଙ୍କ ଉପରେ ରହିଛି ।
ବିଶ୍ଳେଷକଙ୍କ ମୁତାବକ, ଇରାନ୍ର ରିଭଲ୍ୟୁସନାରି ଗାର୍ଡସ (ଆଇଆରଜିସି) ଓ ସାମରିକ ବଳ ଲାଗି ଖାମେନେଇ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ସେ ବଞ୍ଚିଥିବା ପର୍ଯ୍ୟନ୍ତ ଉଭୟଙ୍କୁ ବଳ ମିଳିବ, ଅନ୍ୟଥା ସେମାନଙ୍କ ମନୋବଳ ପ୍ରଭାବିତ ହେବ । ତେବେ ଖାମେନେଇ ସମ୍ଭାବ୍ୟ ଅଘଟଣ ପୂର୍ବରୁ ନିଜ ଉତ୍ତରାଧିକାରୀ ବାଛିଛନ୍ତି । ସେ ତିନିଜଣଙ୍କ ନାମ ଚୟନ କରିଥିବା ବେଳେ ତାଙ୍କର ମୃତ୍ୟୁ ପରେ ଏମାନଙ୍କ ମଧ୍ୟରୁ ଜଣକୁ ସୁପ୍ରିମ ଲିଡର ବା ଶୀର୍ଷ ନେତା ନିଯୁକ୍ତ କରାଯିବ ।
