ମୁମ୍ବାଇ,୨୧/୧୦: ମହାରାଷ୍ଟ୍ରର ପୂର୍ବତନ ମନ୍ତ୍ରୀ ତଥା ବରିଷ୍ଠ ଏନ୍ସିପି ନେତା ବାବା ସିଦ୍ଦିକିଙ୍କ ହତ୍ୟା ମାମଲାରେ ରବିବାର ଆଉ ଜଣେ ଅଭିଯୁକ୍ତଙ୍କୁ ଗିରଫ କରାଯାଇଛି । ନଭି ମୁମ୍ବାଇ ଅଞ୍ଚଳରୁ ଅଭିଯୁକ୍ତ ଭଗୱନ୍ତ ସିଂହକୁ ଉଠାଇ ନେଇଛି ପୁଲିସ । ପୁଲିସ ମୁତାବକ, ଭଗୱନ୍ତ ସିଂହ ଜଣେ ଅଭିଯୁକ୍ତ ସହ ବନ୍ଧୁକ ଆଣି ଉଦୟପୁରରୁ ମୁମ୍ବାଇ ଆସିଥିଲା । ସେ ଆରମ୍ଭରୁ ହିଁ ଷଡ଼ଯନ୍ତ୍ରକାରୀ ଏବଂ ଶୁଟରଙ୍କ ଯୋଗାଯୋଗରେ ରହିଥିଲା । ମୁମ୍ବାଇ ପୁଲିସ କ୍ରାଇମ୍ ବ୍ରାଞ୍ଚ୍ର ୧୫ଟି ଟିମ୍ ପୃଥକ୍ ପୃଥକ୍ ଦିଗରୁ ମାମଲାର ତଦନ୍ତ କରୁଛନ୍ତି । ଶନିବାର ୫ ଜଣ ଅଭିଯୁକ୍ତଙ୍କୁ ଗିରଫ କରାଯାଇଥିଲା । ଅକ୍ଟୋବର ୧୨ ରାତିରେ ବାବା ସିଦ୍ଦିକିଙ୍କୁ ତାଙ୍କ ପୁଅ ଜିଶାନଙ୍କ କାର୍ଯ୍ୟାଳୟ ବାହାରେ ଗୁଳି କରି ହତ୍ୟା କରାଯାଇଥିଲା । ଗ୍ୟାଙ୍ଗ୍ଷ୍ଟର୍ ଲରେନ୍ସି ବିଷ୍ଣୋଇର ଗ୍ୟାଙ୍ଗ୍ ଏହି ହତ୍ୟା ଘଟଣା ପାଇଁ ନିଜକୁ ଦାୟୀ କରିଥିଲା । ଅନ୍ୟପକ୍ଷରେ ବାବା ସିଦ୍ଦିକିଙ୍କ ପୁଅ ତଥା ବିଧାୟକ ଜିଶାନ ରବିବାର ହତ୍ୟାକାରୀଙ୍କୁ ଚେତାବନୀ ଦେଇଛନ୍ତି ।
‘ଏକ୍ସ’ରେ ସେ ଲେଖିଛନ୍ତି, ଲଢ଼େଇ ଏବେ ଶେଷ ହୋଇନାହିଁ । ସେମାନେ ମୋ ପିତାଙ୍କୁ ଚୁପ୍ କରାଇଛନ୍ତି । କିନ୍ତୁ ସେମାନେ ଭୁଲିଯାଇଛନ୍ତି ଯେ ସେ ଜଣେ ସିଂହ ଥିଲେ । ମୁଁ ତାଙ୍କ ଗର୍ଜନ ନିଜ ଭିତରେ ରଖିଛି । ତାଙ୍କ ସଂଘର୍ଷ ମୋ ରକ୍ତରେ ପ୍ରବାହିତ ହେଉଛି । ମୋ ପିତା ନ୍ୟାୟ ପାଇଁ ଛିଡ଼ା ହେଉଥିଲେ । ପରିବର୍ତ୍ତନ ପାଇଁ ଲଢ଼ୁଥିଲେ । ଅଦମ୍ୟ ସାହସର ସହ ଝଡ଼ର ସାମ୍ନା କରୁଥିଲେ । ତାଙ୍କୁ ଚୁପ୍ କରାଇ ସେମାନେ ଭାବୁଛନ୍ତି ଯେ ସେମାନେ ଜିତିଯାଇଛନ୍ତି । କିନ୍ତୁ ମୁଁ ସେମାନଙ୍କୁ କହୁଛି ଯେ ମୋ ପ୍ରଶିରାରେ ସିଂହର ରକ୍ତ ପ୍ରବାହିତ ହେଉଛି । ମହାରାଷ୍ଟ୍ରର ସର୍ବକନିଷ୍ଠ ବିଧାୟକ ଜିଶାନ ଆହୁରି ଲେଖିଛନ୍ତି, ମୁଁ ଏବେ ବି ନିର୍ଭୟ ଓ ଅବିଚଳିତ । ଏହି ଲଢ଼େଇ ଶେଷ ହୋଇନାହିଁ । ଆଜି ମୁଁ ସେଇଠି ଛିଡ଼ା ହୋଇଛି, ଯେଉଁଠି ମୋ ପିତା ଛିଡ଼ା ହୋଇଥିଲେ । ଜୀବିତ, ଅବିଚଳିତ ଏବଂ ପ୍ରସ୍ତୁତ।
