ନୂଆଦିଲ୍ଲୀ,୧୯/୦୫: ଗୁଜରାଟ ଟାଇଟନ୍ସ ବିପକ୍ଷ ଲିଗ୍ ମ୍ୟାଚ୍ରେ ଦିଲ୍ଲୀ କ୍ୟାପିଟାଲ୍ସ ବ୍ୟାଟର କେଏଲ୍ ରାହୁଲ (ଅପରାଜିତ ୧୧୨) ଶତକୀୟ ଇନିଂସ୍ ଖେଳିବା ସହ ଏକ ରେକର୍ଡ଼ ନିଜ ନାମରେ ଲେଖାଇଛନ୍ତି । ସେ ଟି-ଟ୍ୱେଣ୍ଟି ଫର୍ମାଟ କ୍ରିକେଟରେ ଭାରତୀୟ ବ୍ୟାଟର ଭାବେ ଦ୍ରୁତତମ ୮,୦୦୦ ରନ୍ ପୂରଣ କରିବା ସହ ବିରାଟ କୋହଲିଙ୍କ ନାମରେ ଥିବା ପୂର୍ବ ରେକର୍ଡ଼ ଭଙ୍ଗ କରିଛନ୍ତି ।
ରାହୁଲ ୨୨୪ଟି ଇନିଂସ୍ ଖେଳି ଏହି କାରନାମା କରିଛନ୍ତି । କୋହଲିଙ୍କୁ ୮,୦୦୦ରନ୍ ପୂରଣ ପାଇଁ ୨୪୩ଟି ଇନିଂସ୍ ଲାଗିଥିଲା । ୱେଷ୍ଟଇଣ୍ଡିଜର ପ୍ରସିଦ୍ଧ ଓପନର କ୍ରିସ୍ ଗେଲ୍ଙ୍କ ନାମରେ ଦ୍ରୁତତମ ୮,୦୦୦ ରନ୍ ରେକର୍ଡ଼ ରହିଛି । ସେ ୨୧୩ଟି ଇନିଂସ୍ ଖେଳି ଏହି ସଫଳତା ହାସଲ କରିଥିଲେ । ଏହି ତାଲିକାରେ ପାକିସ୍ତାନର ବାବର ଆଜମ (୨୧୮ ଇନିଂସ୍) ଦ୍ୱିତୀୟ ଓ ରାହୁଲ (୨୨୪ ଇନିଂସ୍) ତୃତୀୟ ସ୍ଥାନରେ ରହିଛନ୍ତି । ଟି-ଟ୍ୱେଣ୍ଟି ଫର୍ମାଟରେ ରାହୁଲ ୬ଟି ଶତକ ଏବଂ ୬୯ଟି ଅର୍ଦ୍ଧଶତକ ଅର୍ଜନ କରି ସାରିଛନ୍ତି ।
