ନମୌଜା,୩୦/୦୮: କେନ୍ଦ୍ରାପଡ଼ା ଜିଲ୍ଲା କଟକ ଚାନ୍ଦବାଲି ରାସ୍ତାର ଆଳି ଓ ପଟ୍ଟାମୁଣ୍ଡାଇକୁ ସଂଯୋଗ କରୁଥିବା ବ୍ରାହ୍ମଣୀ ନଦୀ ଉପରେ ପତ୍ରପୁର ସେତୁ ପାଖରେ ଓଡିଶା ସରକାରଙ୍କ ପକ୍ଷରୁ ଦ୍ୱିତୀୟ ପୋଲ ନିର୍ମାଣ ହେବାକୁ ଯାଉଛି । ଏହି ସେତୁର ନିର୍ମାଣ କାର୍ଯ୍ୟ ଏକ ଘରୋଇ ନିର୍ମାଣ କାରୀ ସଂସ୍ଥା ଜମି ଅଧିଗ୍ରହଣ ପ୍ରକ୍ରିୟା ଆରମ୍ଭ କରିଥିବା ବେଳେ ଜମି ହିତାଧିକାରୀମାନଙ୍କୁ ଜମି ବିକିବା ପାଇଁ ନୋଟିସ ଦିଆଯାଇଛି । ହେଲେ ଏହି ପୋଲ ନିର୍ମାଣ ପୂର୍ବରୁ ଚାଷୀଙ୍କ ସହ କିମ୍ବା ସାଧାରଣ ଲୋକଙ୍କ ସହ ଆଲୋଚନା କରାଗଲା ନାହିଁ । ଫଳରେ ଚାଷୀମାନେ ସେମାନଙ୍କ ମୂଲ୍ୟବାନ ଚାଷ ଜମି ଓ ଘର ବାଡି ଜମି ହରାଇବା ନେଇ ଆଶଙ୍କା ପ୍ରକାଶ କରିଛନ୍ତି ।
ଚାଷୀ ଅଭିଯୋଗ କରିଛନ୍ତି, ସେମାନଙ୍କ ସହ କୌଣସି ଆଲୋଚନା କରା ନଯାଇ ଠିକାଦାର ସେମାନଙ୍କ ଜମିରେ ଗାତ ଖୋଳିବା ଆରମ୍ଭ କରିଛନ୍ତି । ଏହାକୁ ଜମି ମାଲିକମାନେ ବିରୋଧ କରିଛନ୍ତି । ଏହାସହ ଏହାର ପ୍ରତିକାର ପାଇଁ ପୂର୍ବରୁ ମଧ୍ୟ ଜିଲାପାଳଙ୍କ ନିକଟରେ ଅଭିଯୋଗ କରିଥିଲେ । ଯାହାକୁ ଆଖି ଆଗରେ ରଖି କେନ୍ଦ୍ରାପଡ଼ା ଅତିରିକ୍ତ ଜିଲ୍ଲାପାଳ ରବୀନ୍ଦ୍ର ମଲିକ, ପଟ୍ଟାମୁଣ୍ଡାଇ ଏସଡିପିଓ କ୍ଷମା ସାଗର ପଣ୍ଡା, ଆଳି ତହସିଲଦାର ଶାନ୍ତି ସ୍ୱରୂପ ମିଶ୍ର, ଆଳି ଥାନା ଭାରପ୍ରାପ୍ତ ଅଧିକାରୀ ଧୀରାଜ କୁମାର ଲେଙ୍କା ଓ ଅନ୍ୟ ସରକାରୀ ଅଧିକାରୀଙ୍କୁ ନେଇ ପତ୍ରପୁର ନିକଟରେ ଥିବା ସୀତାରାମ ମଣ୍ଡପ ରେ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା । ଏହି ବୈଠକରେ ସମସ୍ତ ଅଧିକାରୀ ମାନେ ଜମି ହରାଉଥିବା ହିତାଧିକାରୀ ମାନଙ୍କ ସହ ପୁଙ୍ଖାନୁପୁଙ୍ଖ ଆଲୋଚନା କରିଥିଲେ ।
ହିତାଧିକାରୀମାନଙ୍କ କହିବା କଥା ଯେ, ଏହି ଅଞ୍ଚଳର ଥିବା ବ୍ରାହ୍ମଣୀ ନଦୀ ଉପରେ ଦ୍ଵିତୀୟ ପୋଲ ହେଲେ ଅଞ୍ଚଳର ବିକାଶ ହେବ। କିନ୍ତୁ ଯେଉଁ ଚାଷୀମାନେ ବାସହରା ହେବେ ସେମାନଙ୍କୁ ମଧ୍ୟ କ୍ଷତିପୂରଣ ମିଳିବା ଉଚିତ । ବିକାଶ କାର୍ଯ୍ୟକୁ କେହି ରୋକିବେ ନାହିଁ । ଆଇନ୍ ଅନୁଯାୟୀ ଯେଉଁମାନେ କ୍ଷତିଗ୍ରସ୍ତ ହେବେ ସେମାନଙ୍କ କଥା ମଧ୍ୟ ବିଚାରକୁ ନିଆଯିବା ଉଚିତ । ଏହି ପୋଲ ନିର୍ମାଣ ହେଲେ ଆଳି ତହସିଲ ଅନ୍ତର୍ଗତ ଗୋପାଳପୁର ଓ ବିଲିକଣା ରାଜସ୍ବ ମୌଜାର ବହୁ ଚାଷୀ ଓ ସାଧାରଣ ଲୋକେ କ୍ଷତିଗ୍ରସ୍ତ ହେବେ । ସେହିପରି ଏଠାରେ ଥିବା ରାସ୍ତା, କୃଷ୍ଣ ମନ୍ଦିର ମାଟିରେ ମିଶିଯିବ । କେତେକ ଗ୍ରାମବାସୀଙ୍କୁ ନିଜ ଭିଟାମାଟି ଛାଡିବାକୁ ପଡ଼ିବ। ଏହି ପୋଲର ଆପ୍ରୋଚ ରାସ୍ତା ନିର୍ମାଣ ହେଲେ ଉଭୟ ରାଜସ୍ବ ମୌଜାର ବହୁ ଲୋକ ବାସହରା ହେବେ । ସେମାନଙ୍କ ଚାଷଜମି ନଷ୍ଟ ହେବ । ଏହାସହ ରାଧା କୃଷ୍ଣଙ୍କ ମନ୍ଦିର ମଧ୍ୟ ଧ୍ବଂସ ହେବ। ତେଣୁ ଏହାକୁ ବିଚାରକୁ ନିଆଯାଉ।
ନିକଟରେ ଏକ ଠିକା ସଂସ୍ଥାର କେତେକ କର୍ମଚାରୀ ଘଟଣା ସ୍ଥଳକୁ ଆସି ଚାଷୀଙ୍କ ବିନା ଅନୁମତିରେ ସେମାନଙ୍କ ଚାଷ ଜମି ଓ ଘରବାଡି ଜମିକୁ ମେସିନ ସାହାଯ୍ୟରେ ଖୋଳିଥିଲେ । ପୋଲ ନିର୍ମାଣ ହେବ ବୋଲି କହିଥିଲେ । ହେଲେ ଏନେଇ ଚାଷୀଙ୍କ ସହ ପ୍ରଶାସନ କୌଣସି ଆଲୋଚନା କରି ନଥିବା ଚାଷୀମାନେ ଠିକା ସଂସ୍ଥାକୁ କହିଥିଲେ । ହେଲେ ଠିକା ସଂସ୍ଥା ଚାଷୀମାନଙ୍କ କଥାକୁ ହେୟ ଜ୍ଞାନ କରି ଜମି ଖୋଳି କାର୍ଯ୍ୟ କରିଥିଲା । ତେଣୁ କୌଣସି ଅଘଟଣ ପୂର୍ବରୁ ଏହି ସମସ୍ୟାର ସମାଧାନ କରାଯିବା ଉଚିତ ବୋଲି ଚାଷୀମାନେ କହିଛନ୍ତି । ଏ ସଂକ୍ରାନ୍ତରେ ଅତିରିକ୍ତ ଜିଲାପାଳ ରବୀନ୍ଦ୍ର ମଲିକ ପଚାରିବାରୁ କହିଲେ ଲୋକଙ୍କୁ ସ୍ୱାର୍ଥକୁ ସବୁବେଳେ ଅଗ୍ରାଧିକାର ଦିଆଯିବ । ଆଜିର ବୈଠକରେ ଏ ସଂକ୍ରାନ୍ତରେ ଆଲୋଚନା ହୋଇଥିଲା। ଯେଉଁ ଚାଷୀ ଓ ହିତାଧିକାରୀ ବାସହୀନ ହେବେ ବା କ୍ଷତିଗ୍ରସ୍ତ ହେବେ ସେମାନଙ୍କୁ ନିଶ୍ଚିତ ଭାବେ କ୍ଷତିପୂରଣ ମିଳିବ।
