ନାରାୟଣପାଟଣା, ୧୧/୦୮ : କଙ୍ଗାରୁ କୋର୍ଟରେ ପ୍ରେମୀ ଯୁଗଳଙ୍କୁ ବଳଦ ଦଣ୍ଡ। ଆଦିବାସୀ ପରମ୍ପରାର ଦ୍ଵାହି ଦେଇ ସର୍ବ ସମ୍ମୁଖରେ ଲଙ୍ଗଳ ଧରି ବୁଲାଇଲେ ଗ୍ରାମବାସୀ। ଭୁଲ୍ ଏତିକି ସମ୍ପର୍କୀୟ ଭାଇ-ଭଉଣୀ ହୋଇ ଦୁହେଁ ଦୁହିଁଙ୍କୁ ଭଲ ପାଇ ବସିଥିଲେ। ଆଉ ସାତ ଜନ୍ମ ପାଇଁ ସାଥୀ ହେବାକୁ ବିବାହ ବନ୍ଧନରେ ବାନ୍ଧି ହୋଇଥିଲେ। ହେଲେ ସ୍ଵୀକୃତି ଦେଲାନି ଆଦିବାସୀ ସମାଜ। ସର୍ତ୍ତ ଥିଲା ବଳଦ ଦଣ୍ଡ ଭୋଗିଲେ ଯାଇ ସମାଜରୁ ମିଳିବ ସ୍ଵୀକୃତି। କୋରାପୁଟ ଜିଲ୍ଲା ବନ୍ଧୁଗାଁ ବ୍ଲକ ଚିଡି ବାଲସା ଗାଁରୁ ଆସିଛି ଏଭଳି ଚିତ୍ର।
ସୂଚନାନୁଯାୟୀ, ଆଲୋମଣ୍ଡା ଗ୍ରାମ ପଞ୍ଚାୟତର ଚିଡି ବାଲସା ଗାଁର ପୁଅ ପେଦାଲଡା ଗାଁର ଝିଅକୁ ପ୍ରେମ କରି ବିବାହ କରିଥିଲେ। ସେମାନେ ସମ୍ପର୍କରେ ଭାଇ ଭଉଣୀ ହୋଇଥିବାରୁ ଗତକାଲି ଆଦିବାସୀ ପରମ୍ପରା ଅନୁସାରେ ପୂଜା ପାଠ କରି ଗାଁରେ ଉଭୟଙ୍କୁ ଲଙ୍ଗଳ ଧରି ଗାଁରେ ବୁଲାଇଛନ୍ତି।
ନିକଟରେ ରାୟଗଡ଼ା କଲ୍ୟାଣସିଂହପୁରର କଞ୍ଜାମଯୋଡ଼ି ଗାଁରେ ଏପରି ଘଟଣା ରାଜ୍ୟରେ ଆଲୋଡ଼ନ ସୃଷ୍ଟି କରିଥିଲା । ଏପରି ବର୍ବରତା ଓ କୁଶ୍ଚିତ କାର୍ଯ୍ୟ ସଭ୍ୟ ସମାଜରେ ଗ୍ରହଣୀୟ ନୁହେଁ ବୋଲି ଦର୍ଶାଇ ବିଭିନ୍ନ ସାମାଜିକ କର୍ମୀ ମାନବଧିକାର ଆୟୋଗ ନିକଟରେ ଫେରାଦ ହୋଇଥିଲେ । ପିଉସୀ ଓ ପୁତୁରାଙ୍କ ପ୍ରେମ ସଂପର୍କକୁ ବିରୋଧ କରି କଞ୍ଜାମଯୋଡି ଗ୍ରାମବାସୀ ଉଭୟଙ୍କ ବେକରେ ଜୁଆଳି ପକାଇ ଜମିରେ ଚାଷ କରାଇଥିଲେ ।
ବାରମ୍ବାର ଏଭଳି ଘଟଣା ଘଟୁଥିବାରୁ ବୁଦ୍ଧିଜୀବୀ ମହଲରେ ଉଦବେଗ ପ୍ରକାଶ ପାଇଛି। ସଚେତନତା ଅଭାବରୁ ପରମ୍ପରା ନାଁରେ ଖୋଲାଖୋଲି ଭାବେ ମାନବାଧିକାର କ୍ଷୁର୍ଣ୍ଣ କରାଯାଉଛି । ଅନ୍ଧବିଶ୍ଵାସର ବଶବର୍ତ୍ତୀ ହୋଇ ଆଦିବାସୀମାନେ ଏଭଳି ପରମ୍ପରାକୁ ଆଜି ଯାଏଁ ଜାବୁଡ଼ି ଧରିଛନ୍ତି। ଗୋଟିଏ ବଂଶରେ ଗୋଟିଏ ଜାତିରେ ବିବାହ କଲେ ଧରଣୀ ପେନୁ ରାଗିବ କହି କଙ୍ଗାରୁ କୋର୍ଟରେ ଏଭଳି ଦଣ୍ଡିତ କରାଯାଉଛି। ଏନେଇ ବ୍ୟାପକ ସଚେତନତାର ଆବଶ୍ୟକତା ଥିବା କହିଛନ୍ତି ବୁଦ୍ଧିଜୀବୀ ।
