ଭୁବନେଶ୍ୱର,୨୫/୦୨: ଓଡ଼ିଶାର ସମୃଦ୍ଧ ଐତିହ୍ୟ, କାରିଗରୀ ଏବଂ ମହିଳା ନେତୃତ୍ୱାଧୀନ ଉଦ୍ୟୋଗର ଅଭୂତପୂର୍ବ ପ୍ରଦର୍ଶନ ଭୁବନେଶ୍ୱରର ଜନତା ମଇଦାନରେ ଚାଲିଥିବା ସୁଭଦ୍ରା ଶକ୍ତି ମେଳା-୨୦୨୫ର ଦର୍ଶକଙ୍କୁ ମୁଗ୍ଧ କରିଛି । ମେଳାର ଏସ୍ଏଚ୍ଜି ସଦସ୍ୟାଙ୍କ ଦ୍ୱାରା ପ୍ରସ୍ତୁତ ଖାଦ୍ୟର ସମ୍ଭାର-‘ସୁଭଦ୍ରା ଶକ୍ତି ମେଳା ଫୁଡ୍ କୋର୍ଟ' ଏକ ପ୍ରମୁଖ ଆକର୍ଷଣର କେନ୍ଦ୍ର ଭାବେ ଉଭା ହୋଇଛି । ମାଛ ଆମ୍ବିଳ ଖାଇବାକୁ ଷ୍ଟଲରେ ଲାଗୁଛି ଭିଡ଼। ମୁଢି ମାଂସରେ ମହକୁଛି ରାଜଧାନୀ।
ରୋଜଗାର ଦେଉଛି ମାଛ ଆମ୍ବିଳ
ଖାଇବା ଷ୍ଟଲରେ ମିଳୁଛି ମାଛ ଆମ୍ବିଳ ଯାହାକୁ ଖାଇବାକୁ ଲାଗୁଛି ଭିଡ଼ । ଦୁଇ ବନ୍ଧୁ ଏହି ଷ୍ଟଲ୍ ପକାଇଛନ୍ତି । ଏହି ମାଛ ଆମ୍ବିଳ କୋଭିଡ ମହାମାରୀ ସମୟରୁ ଆରମ୍ଭ ହୋଇଥିଲା । ଦିଲ୍ଲୀପ କୁମାର ପରିଡ଼ାଙ୍କ ସହଯୋଗରେ ପଲ୍ଲବିକା ତ୍ରିପାଠୀ ଏକ ସ୍ୱୟଂ ସହାୟିକା ଗୋଷ୍ଠୀ କରିଥିଲେ । ସେମାନଙ୍କ ଲକ୍ଷ୍ୟ ଥିଲା ମାଛ ଆମ୍ବିଳ ତିଆରି କରି ବିକ୍ରି କରିବା । ଖଟା ଆମ୍ବିଳ ପରି ମାଛ ଆମ୍ବିଳ କରିବାକୁ ପାଞ୍ଚରୁ ଛଅ ଘଣ୍ଟା ଲାଗେ । ମାଛରୁ କଣ୍ଟା କଢ଼ାଯାଇ ଅଦା, ରସୁଣ ପେଷ୍ଟ, ପିଆଜ ପେଷ୍ଟ ଏବଂ କିଛି ମସଲା ମିଶାଯାଇ ପ୍ରସ୍ତୁତ କରାଯାଏ । ପରେ ଏହାକୁ ବିରି ବରା ସହ ପରସା ଯାଇଥାଏ ।
ମୁଢ଼ି ମାଂସର ଆଦର
ସୁଭଦ୍ରା ଶକ୍ତି ମେଳାରେ ମୟୂରଭଞ୍ଜ ମୁଢ଼ି ମାଂସର ଆଦର ଦେଖିବାକୁ ମିଳିଛି । ରାସଗୋବିନ୍ଦପୁର ବ୍ଲକର କଳ୍ପନା କବି ଓ ତାଙ୍କ ସହଯୋଗୀମାନେ ମେଳାରେ ଲୋକଙ୍କୁ ପରସି ଦେଉଛନ୍ତି ମୁଢ଼ି ମାଂସ । ୨୦୦୦ ମସିହାରେ ୨୪ ଜଣ ଏକ ଏସ୍ଏଚ୍ଜି ଗ୍ରୁପ କରି ମୁଢ଼ି ବିକ୍ରି କରିବା ଆରମ୍ଭ କରିଥିଲେ । ଧୀରେ ଧୀରେ ମୁଢିମାଂସର ଚାହିଦା ବଢ଼ିବା ସହ ମହିଳାମାନେ ରୋଜଗାରକ୍ଷମ ହେଲେ । ଏହି ଗ୍ରୁପ ଷ୍ଟଲରେ ଚାଉଳ ଚୁନା, ତେନ୍ତୁଳି, ଚୁଡା ଭଜା, ହଦିବରା, ଚିକେନ୍ ତରକାରୀ, ମୁଢ଼ି ଇତ୍ୟାଦି ବିକ୍ରି ହେଉଛି । ମେଳାର ପ୍ରଥମ ଦିନରେ ଏହି ଷ୍ଟଲ୍ରେ ୩୮୦୦ ଟଙ୍କାର ଓ ଦ୍ୱିତୀୟ ଦିନରେ ୫୫,୦୦୦ ଟଙ୍କାର ବିକ୍ରି ହୋଇଛି ।
