ଚେନ୍ନାଇ: ତାମିଲନାଡୁର କରୁରରେ ଦଳାଚକଟା ମାମଲାରେ ତଦନ୍ତ କରିବ ଏସଆଇଟି । ଏନେଇ ମାଡ୍ରାସ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। କରୁରରେ ଟିଭିକେ ରାଲିରେ ହୋଇଥିବା ଦଳାଚକଟାରେ ୪୧ ଜଣଙ୍କ ମୃତ୍ୟୁ ହୋଇଥିଲା ଏବଂ ଅନେକ ଆହତ ହୋଇଥିଲେ । ଏହି ମାମଲାରେ ସିବିଆଇ ତଦନ୍ତ ଦାବି କରୁଥିବା ଏକ ଆବେଦନକୁ ଶୁକ୍ରବାର କୋର୍ଟ ଖାରଜ କରିଦେଇଛନ୍ତି।
କରୁର ଦଳାଚକଟା ମାମଲାର ତଦନ୍ତ ପାଇଁ ପୁଲିସ ମହାନିରୀକ୍ଷକ (ଉତ୍ତର) ଆସ୍ରା ଗର୍ଗଙ୍କ ନେତୃତ୍ୱରେ ଏକ ସ୍ୱତନ୍ତ୍ର ତଦନ୍ତ ଦଳ (SIT) ଗଠନ କରାଯାଇଛି। କୋର୍ଟ କରୁର ପୁଲିସକୁ ସମସ୍ତ ପ୍ରାସଙ୍ଗିକ କାଗଜପତ୍ର ତୁରନ୍ତ ଏସଆଇଟିକୁ ହସ୍ତାନ୍ତର କରିବାକୁ ନିର୍ଦ୍ଦେଶ ଦେଇଛନ୍ତି। ଶୁଣାଣି ସମୟରେ ବିଚାରପତି କହିଥିଲେ ଯେ, ବିଜୟଙ୍କ ନେତୃତ୍ୱ ଦକ୍ଷତାର ଅଭାବ ଥିଲା । ଏହି କାରଣରୁ ସେ ସ୍ୱେଚ୍ଛାସେବକମାନଙ୍କୁ ଛାଡି ରାଲିରୁ ପଳାଇ ଯାଇଥିଲେ।
ସେପ୍ଟେମ୍ବର ୨୭ ତାରିଖରେ ତାମିଜାଗା ଭେଟ୍ରି କାଝାଗମ (ଟିଭିକେ) ମୁଖ୍ୟ ଏବଂ ଅଭିନେତା ବିଜୟଙ୍କ ନେତୃତ୍ୱରେ ଏକ ସାଧାରଣ ସଭା ସମୟରେ ଦଳାଚକଟା ଘଟିଥିଲା। ଏହି କାର୍ଯ୍ୟକ୍ରମରେ ବହୁ ସଂଖ୍ୟାରେ ଲୋକ ଉପସ୍ଥିତ ଥିଲେ। ପ୍ରାରମ୍ଭିକ ତଦନ୍ତରୁ ଭିଡ଼ ପରିଚାଳନାରେ ତ୍ରୁଟି ଥିବା ନେଇ ଜଣାପଡ଼ିଛି ।
ଆଜି ସକାଳେ ମାଡ୍ରାସ ହାଇକୋର୍ଟର ବିଚାରପତି ଏନ. ସେନ୍ଥିଲଭକୁମାର କରୁର ଦଳାଚକଟା ମାମଲାରେ ଟିଭିକେ ଜିଲ୍ଲା ସମ୍ପାଦକ ଏନ. ସତୀଶ କୁମାରଙ୍କ ଦ୍ୱାରା ଦାଖଲ କରାଯାଇଥିବା ଆଗୁଆ ଜାମିନ ଆବେଦନକୁ ଖାରଜ କରିଦେଇଛନ୍ତି । ଟିଭିକେ କାହିଁକି ଭିଡ଼କୁ ନିୟନ୍ତ୍ରଣ କରିବାରେ ବିଫଳ ହେଲା ବୋଲି କୋର୍ଟ ପ୍ରଶ୍ନ କରିଛନ୍ତି । ଦଳୀୟ କର୍ମୀଙ୍କ ଅବ୍ୟବସ୍ଥିତ ଆଚରଣ ଉପରେ ମଧ୍ୟ କୋର୍ଟ କହିଛନ୍ତି । ଏଥିରେ ଦଳୀୟ ମୁଖ୍ୟ ବିଜୟଙ୍କ ରୋଡଶୋ ସମୟରେ ଭଙ୍ଗାରୁଜା ଏବଂ ସାର୍ବଜନୀନ ସମ୍ପତ୍ତିକୁ କ୍ଷତି ପହଞ୍ଚାଇବା ଅନ୍ତର୍ଭୁକ୍ତ ।
ଏହା ବ୍ୟତୀତ, ସରକାରୀ ଓକିଲ ଏସ୍ ସନ୍ତୋଷ ମଧ୍ୟ ଆଗୁଆ ଜାମିନ ପ୍ରଦାନକୁ ବିରୋଧ କରିଛନ୍ତି ଏବଂ ସାର୍ବଜନୀନ ସମ୍ପତ୍ତି କ୍ଷତି ସହ ଜଡିତ ଜିଲ୍ଲା ସମ୍ପାଦକଙ୍କ ସମେତ ଦଳୀୟ ସଦସ୍ୟଙ୍କ ବିରୁଦ୍ଧରେ ପଞ୍ଜିକୃତ ୯ଟି ଏଫଆଇଆର ଉପସ୍ଥାପନ କରିଥିଲେ।
