ନୂଆଦିଲ୍ଲୀ,୧୫/୦୧: ମହାରାଷ୍ଟ୍ରରେ ଅଘଟଣ। ଏକାଧିକ ଗାଡ଼ିକୁ ଧକ୍କା ଦେଲା ଅଟୋ ରିକ୍ସା । ଫଳରେ ଘଟଣାସ୍ଥଳରେ ୩ ଜଣଙ୍କ ମୃତ୍ୟୁ ହୋଇଥିବା ବେଳେ ୧୫ ଜଣ ଗୁରୁତର ଆହତ ହୋଇଛନ୍ତି । ମହାରାଷ୍ଟ୍ରର ଥାନେ ଜିଲ୍ଲାର ଗୋଥେଗର ଗାଁର ଖାଡାୱାଲି ବ୍ରିଜ ନିକଟରେ ଏହି ଘଟଣା ହୋଇଥିବା ଜଣାପଡ଼ିଛି। ତେବେ ସମସ୍ତ ଆହତଙ୍କୁ ଉଦ୍ଧାର କରାଯାଇ ନିକଟସ୍ଥ ଡ଼ାକ୍ତରଖାନାରେ ଭର୍ତ୍ତି କରାଯାଇଛି।
ତେବେ ଆଜି ଭୋର ସମୟରେ ଖାଡାୱାଲି ବ୍ରିଜ ନିକଟରେ ଏକ ଅଟୋ ଭାରସାମ୍ୟ ହରାଇ ବସ୍କୁ ଧକ୍କା ଦେଇଥିଲା । ଏହାପରେ ଦୁଇଟି କାର ଏବଂ ବିପରୀତ ଦିଗରୁ ଆସୁଥିବା ଟେମ୍ପୋ ସହିତ ମୁହାଁମୁହିଁ ହୋଇଥିଲେ ବୋଲି ଶାହାପୁର ପୋଲିସ ଷ୍ଟେସନର ଜଣେ ଅଧିକାରୀ ପିଟିଆଇକୁ କହିଛନ୍ତି। ସେ କହିଛନ୍ତି ଯେ ବସ୍ରେ ଯାତ୍ରା କରୁଥିବା ତିନି ଜଣଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିବା ବେଳେ ଅଟୋ ରିକ୍ସା ଡ୍ରାଇଭର ସମେତ ୧୫ ଜଣ ଆହତ ହୋଇଥିଲେ। ବସ୍ଟି ନାଶିକରୁ ମୁମ୍ବାଇ ଯାଉଥିବା ଜଣାପଡ଼ିଛି। ସେପଟେ ଏନେଇ ସୂଚନା ପାଇବା ପରେ ସ୍ଥାନୀୟ ପୋଲିସ ଏବଂ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ଶାହପୁର ଡାକ୍ତରଖାନାରେ ଭର୍ତ୍ତି କରାଇଛି। ପ୍ରକାଶ ଥାଉକି, ସେହିପରି ରବିବାର ମହାରାଷ୍ଟ୍ରର ନାଶିକ୍ ଜିଲ୍ଲାର ଦ୍ୱାରକା ସର୍କଲରେ ଏକ ଟେମ୍ପୋ ଏବଂ ଟ୍ରକ୍ ମଧ୍ୟରେ ଧକ୍କା ହୋଇଥିଲା । ଫଳରେ ୮ଜଣ ପ୍ରାଣ ହରାଇଥିଲେ। ଏହି ଦୁର୍ଘଟଣାରେ ଅନେକ ଲୋକ ମଧ୍ୟ ଆହତ ହୋଇଛନ୍ତି। ଟେମ୍ପୋରେ ୧୬ ଜଣ ଯାତ୍ରୀ ଥିଲେ। ସେ ଏକ ଧାର୍ମିକ କାର୍ଯ୍ୟକ୍ରମରେ ଯୋଗଦେବା ପରେ ଫେରୁଥିବା ବେଳେ ଏହି ଘଟଣା ଘଟିଥିଲା ।
