ବାଉଁଶୁଣୀ, ୧୧/୦୬: ବୁଧବାର ସକାଳ ୯ ଘଣ୍ଟା ସମୟରେ ବୌଦ୍ଧ ବ୍ଲକ ବାଉଁଶୁଣୀ ଛକ ଜଗନ୍ନାଥ ମନ୍ଦିର ନିକଟରେ ବିରାଜିତ ଶ୍ରୀ ଜଗନ୍ନାଥଙ୍କ ସ୍ନାନ ଉତ୍ସବ ଭକ୍ତି ଓ ନିଷ୍ଠାର ସହ ପାଳିତ ହୋଇଯାଇଛି । ବୁଧବାର ସକାଳେ ବ୍ରାହ୍ମଣମାନେ କଳସ ଧରି ମହାନଦୀର ବାଉଁଶୁଣୀ ଘାଟକୁ ଯାଇ ପାରମ୍ପରିକ ପୂଜାର୍ଚ୍ଚନା କରି ଜଳ ଧରି ନାମ ସଂକୀର୍ତ୍ତନ ସହ ଶୋଭାଯାତ୍ରାରେ ମନ୍ଦିର ନିକଟ ସ୍ନାନ ମଣ୍ଡପକୁ ଆସିଥିଲେ । ଚତୁର୍ଦ୍ଧାମୂର୍ତ୍ତିଙ୍କୁ ସ୍ନାନ ମଣ୍ଡପରେ ବିଜେ କରାଇ ସ୍ନାନ କରାଇଥିଲେ ।
ଆଜିର ସ୍ନାନ ଉତ୍ସବରେ ବହୁ ସଂଖ୍ୟାରେ ଶ୍ରଦ୍ଧାଳୁ ଠାକୁରଙ୍କ ଦର୍ଶନ କରୁଥିବା ବେଳେ ସମସ୍ତ ପୂଜା ପୂଜକ ଗୋବର୍ଦ୍ଧନ ଦାଶ କରିଥିଲେ । ସେହିପରି କର୍ତ୍ତା ଭାବରେ ନେତ୍ରାନନ୍ଦ ମେହେର ଓ ତାଙ୍କ ପତ୍ନୀ ସବିତା ମେହେର ସ୍ନାନ ଉତ୍ସବରେ ଭୂମିକା ନିର୍ବାହ କରିଥିଲେ । ଏହି ସ୍ନାନ ଉତ୍ସବ ରେ ବାଉଁଶୁଣୀ ରାମଲୀଳା ନାଟ୍ୟ ସଂସଦ ସମସ୍ତ ସଦସ୍ୟଙ୍କ ସହ ଅଞ୍ଚଳର ବହୁ ଭକ୍ତ ମାନେ ସହଯୋଗ କରିଥିଲେ । ପ୍ରଭୁଙ୍କୁ ଦର୍ଶନ କରିବାକୁ ଶହ ଶହ ଭକ୍ତଙ୍କ ଭିଡ଼ ଦେଖିବାକୁ ମିଳିଥିଲା ।
