ନୂଆଦିଲ୍ଲୀ,୦୮/୧୦: ଭାରତ-ମାଳଦ୍ୱୀପ ସମ୍ପର୍କକୁ ମିଳିଛି ନୂଆ ଶକ୍ତି । ଦୁଇଦେଶ ମଧ୍ୟରେ ଆଉ ମନାନ୍ତର ନାହିଁ । ଯାହା କିଛି ଭୁଲ ବୁଝାମଣା ଥିଲା, ସେଥିରେ ପୂର୍ଣ୍ଣଚ୍ଛେଦ ପଡ଼ିଛି । ଭାରତ ଗସ୍ତରେ ଥିବା ମାଳଦ୍ୱୀପ ରାଷ୍ଟ୍ରପତି ମହମ୍ମଦ ମୁଇଜ୍ଜୁ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମଧ୍ୟରେ ସୋମବାର ବୈଠକ ପରେ ଦ୍ୱିପାକ୍ଷିକ ସମ୍ପର୍କ ସବଳ ହୋଇଛି । ଭାରତ ସରକାର ୩ ହଜାର କୋଟି ଟଙ୍କାର ଆର୍ଥିକ ସହାୟତା ଦେବାକୁ ନିଷ୍ପତ୍ତି ନେଇଛନ୍ତି । ଏଥିସହ ଦୁଇଦେଶ ମଧ୍ୟରେ ୪୦ କୋଟି ଡଲାରର ଦ୍ୱିପାକ୍ଷିକ କରେନ୍ସି ସ୍ୱାପ୍ ଚୁକ୍ତି ବି ସ୍ୱାକ୍ଷରିତ ହୋଇଛି ।
ଲିକ୍ୱିଡିଟି ସଙ୍କଟରେ ପଡ଼ି ଛଟପଟ ହେଉଥିବା ମାଳଦ୍ୱୀପକୁ ଉଦ୍ଧାର କରିଛି ଭାରତ । ଏକ ଭଲ ପଡ଼ୋଶୀ ଭାବେ ଭାରତ ସବୁବେଳେ ନିଜ ଦାୟିତ୍ୱ ନିର୍ବାହ କରିଥାଏ ବୋଲି ପ୍ରଧାନମନ୍ତ୍ରୀ ମୋଦି କହିଛନ୍ତି । ଭାରତଠାରୁ ଏଭଳି ସାହାଯ୍ୟ ଓ ସହଯୋଗ ପାଇ ମୁଇଜ୍ଜୁ କୃତଜ୍ଞତାରେ ବୁଡ଼ିଛନ୍ତି । ମୋଦି ସରକାରଙ୍କୁ ପ୍ରଶଂସାରେ ପୋତିଛନ୍ତି । ରାଷ୍ଟ୍ରପତି ହେବା ପରଠାରୁ ଭାରତ ପ୍ରତି ମୁଇଜ୍ଜୁଙ୍କ ମନରେ ଯେଉଁ ଭୁଲ ଧାରଣା ଥିଲା, ତାହା ବଦଳି ଯାଇଛି । ଚୀନ୍ ନୁହେଁ, ଭାରତ ହିଁ ସୁଖଦୁଃଖର ସାଥୀ ବୋଲି ତାଙ୍କର ହୃଦୟଙ୍ଗମ ହୋଇଛି ।
ପ୍ରଧାନମନ୍ତ୍ରୀ ମୋଦି ଓ ମହମ୍ମଦ ମୁଇଜ୍ଜୁଙ୍କ ମଧ୍ୟରେ ଦ୍ୱିପାକ୍ଷିକ ବୈଠକ ପରିପ୍ରେକ୍ଷୀରେ ରିଜର୍ଭ ବ୍ୟାଙ୍କ ଏବଂ ମାଳଦ୍ୱୀପ ମନିଟାରି ପ୍ରାଧିକରଣ (ଏମ୍ଏମ୍ଏ) ମଧ୍ୟରେ କରେନ୍ସି ସ୍ୱାପ୍ ଚୁକ୍ତି ସ୍ୱାକ୍ଷରିତ ହୋଇଛି । ଏହି ଚୁକ୍ତି ଅନୁସାରେ, ଆର୍ବିଆଇଠାରୁ ଏମ୍ଏମ୍ଏ ଆମେରିକୀୟ ଡଲାର/ୟୁରୋ ସ୍ୱାପ୍ ୱିଣ୍ଡୋ ଅଧୀନରେ ୪୦ କୋଟି ଡଲାର ଏବଂ ଆଇଏନ୍ଆର୍ (ଭାରତୀୟ ଟଙ୍କା) ସ୍ୱାପ୍ ୱିଣ୍ଡୋ ଅଧୀନରେ ୩ ହଜାର କୋଟି ଟଙ୍କା ପାଇବାକୁ ଯୋଗ୍ୟ ହୋଇଛି । ଏହି ଚୁକ୍ତି ୨୦୨୭ ଜୁନ୍ ୧୮ ପର୍ଯ୍ୟନ୍ତ ବୈଧ ରହିବ । ଭାରତଠାରୁ ଏହି ସହାୟତା ପାଇବା ଦ୍ୱାରା ମାଳଦ୍ୱୀପର ବିଦେଶୀ ମୁଦ୍ରା ସଙ୍କଟ ଦୂର ହେବ ।
ମିଳିତ ସାମ୍ବାଦିକ ସମ୍ମିଳନୀରେ ପ୍ରଧାନମନ୍ତ୍ରୀ ମୋଦି କହିଛନ୍ତି, ମାଳଦ୍ୱୀପ ପ୍ରତି ବିପଦ ଆସିଲେ, ଭାରତ ପ୍ରଥମେ ପ୍ରତିକ୍ରିୟା ଦେଇଥାଏ । ସେହି ଦୃଷ୍ଟିରୁ କରେନ୍ସି ସ୍ୱାପ୍ ଚୁକ୍ତି ହୋଇଛି । ଏହାଛଡ଼ା ମାଳଦ୍ୱୀପର ଭିତ୍ତିଭୂମି ବିକାଶ ଓ ଡିଜିଟାଲ କନେକ୍ଟିଭିଟି ନେଇ ମଧ୍ୟ ଆଲୋଚନା ହୋଇଛି । ଭାରତ ସବୁବେଳେ ପଡ଼ୋଶୀ ହେବାର ଦାୟିତ୍ୱକୁ ବୁଝିବା ସହ ଏହାକୁ ତୁଲାଇଥାଏ । ଏଥିସହ ଭାରତ ସହଯୋଗରେ ନିର୍ମିତ ୭୦୦ରୁ ଅଧିକ ସାମାଜିକ ଆବାସ ୟୁନିଟ୍କୁ ଭାରତ ମାଳଦ୍ୱୀପକୁ ହସ୍ତାନ୍ତର କରିଥିବା ମୋଦି କହିଛନ୍ତି । ତାଙ୍କ ମୁତାବକ, ନିକଟରେ ମାଳଦ୍ୱୀପରେ ରୁପେ କାର୍ଡ ଶୁଭାରମ୍ଭ ହୋଇଥିଲା । ଆଗାମୀ ଦିନରେ ଦୁଇଦେଶ ୟୁପିଆଇ ଜରିଆରେ ବି ଯୋଡ଼ିହେବେ ।
ଏହାଛଡ଼ା ମାଳଦ୍ୱୀପର ଅଦ୍ଦୁଠାରେ ଭାରତୀୟ ଦୂତାବାସ ଏବଂ ବେଙ୍ଗାଲୁରୁରେ ମାଳଦ୍ୱୀପର ଦୂତାବାସ ଖୋଲିବା ନେଇ ଆଲୋଚନା ହୋଇଛି । ମୋଦି ଓ ମୁଇଜ୍ଜୁ ଭର୍ଚୁଆଲ୍ ଭାବେ ମାଳଦ୍ୱୀପର ହାନିମାଧୁ ବିମାନବନ୍ଦରରେ ଏକ ନୂଆ ରନ୍ୱେକୁ ଉଦ୍ଘାଟନ କରିଥିଲେ । ଏହାଛଡ଼ା ଭାରତର ରାଷ୍ଟ୍ରୀୟ ରକ୍ଷା ୟୁନିଭର୍ସିଟି ଓ ମାଳଦ୍ୱୀପର ନ୍ୟାସନାଲ କଲେଜ ଅଫ୍ ପୋଲିସିଂ ଆଣ୍ଡ୍ ଲ’ ଏନ୍ଫୋର୍ସମେଣ୍ଟ ମଧ୍ୟରେ ବୁଝାମଣା ହୋଇଛି । ସିବିଆଇ ଓ ମାଳଦ୍ୱୀପର ଆଣ୍ଟି-କରପ୍ସନ୍ କମିଶନ ମଧ୍ୟରେ ଏମ୍ଓୟୁ ହୋଇଥିବା ବେଳେ ଏନ୍ଜେଏଆଇ ଓ ଜେଏସ୍ସି ମଧ୍ୟରେ ବୁଝାମଣା ହୋଇଛି । ସେତିକି ନୁହେଁ, ଏକ ବ୍ୟାପକ ଅର୍ଥନୈତିକ ତଥା ସାମୁଦ୍ରିକ ସୁରକ୍ଷା ଭାଗୀଦାରିତା ନେଇ ମଧ୍ୟ ଚୁକ୍ତି ହୋଇଛି ।
ମୁଇଜ୍ଜୁ କହିଛନ୍ତି, ୩ ହଜାର କୋଟିର ସହାୟତା ଏବଂ ୪୦ କୋଟି ଡଲାରର କରେନ୍ସି ସ୍ୱାପ୍ ଚୁକ୍ତି ପାଇଁ ଭାରତ ସରକାରଙ୍କୁ ଧନ୍ୟବାଦ ଜଣାଉଛି । ଭାରତର ଏହି ସହାୟତା ଆମର ମୁଦ୍ରା ବିନିମୟ ସମସ୍ୟାର ପ୍ରତିକାର କରିବ । ଭାରତର ସୁରକ୍ଷାକୁ କୌଣସିମତେ କ୍ଷତି ପହଞ୍ଚାଇବାକୁ ଦେବୁନାହିଁ ବୋଲି ସେ ପ୍ରତିଶ୍ରୁତି ଦେଇଥିଲେ । ନୂଆଦିଲ୍ଲୀର ହାଇଦ୍ରାବାଦ ହାଉସ୍ରେ ଆଜି ଦ୍ୱିପାକ୍ଷିକ ଏବଂ ପ୍ରତିନିଧି ସ୍ତରୀୟ ଆଲୋଚନା ହୋଇଥିଲା ।
ମୋଦି ଆହୁରି କହିଥିଲେ, ଆମେ ମାଳଦ୍ୱୀପ ଲୋକଙ୍କ ପ୍ରାଥମିକତାକୁ ସବୁବେଳେ ଗୁରୁତ୍ୱ ଦେଇଥାଉ । ଚଳିତବର୍ଷ ଟ୍ରେଜରି ବେଞ୍ଚ୍ ଅଫ୍ ମାଲଦ୍ୱୀପ ପାଇଁ ଏସ୍ବିଆଇ ୧୦ କୋଟି ଡଲାର ସହାୟତା ଦେଇଥିଲା । ମୁଇଜ୍ଜୁ ଆଜି ପତ୍ନୀ ସଜିଧା ମହମ୍ମଦଙ୍କ ସହ ରାଷ୍ଟ୍ରପତି ଭବନ ଯାଇ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଭେଟିଥିଲେ । ପ୍ରଧାନମନ୍ତ୍ରୀ ମୋଦି ବି ସେମାନଙ୍କ ସହ ଉପସ୍ଥିତ ଥିଲେ
