ନୂଆପଡ଼ା,୨୬।୦୬: ବର୍ଷା ଋତୁ ଆରମ୍ଭ ହୋଇଗଲାଣି । ମଣ୍ଡିରେ ପଡ଼ିଛି କୁଇଣ୍ଟାଲ କୁଇଣ୍ଟାଲ ଧାନ । ରବି ଧାନ ସଂଗ୍ରହ କରିବାରେ ବିଫଳ ହୋଇଛନ୍ତି ରାଜ୍ୟ ସରକାର । ଚାଷୀଙ୍କ ଧାନ ନଉଠିଲେ ଆଗାମୀ ଦିନରେ ଆନ୍ଦୋଳନ ଭୟଙ୍କର ହେବ ବୋଲି କହିଛି ବିଜେଡି । ଏନେଇ ଆଜି ନୂଆପଡ଼ା ଜିଲ୍ଲା ଖୁଣ୍ଟିଆ ସମ୍ମିଳନୀ କକ୍ଷରେ ବିଜେଡି ପାକ୍ସ ସଭାପତି ଏକ ସମ୍ବାଦିକ ସମ୍ମିଳନୀ କରି ଚେତାବନୀ ଦେଇଛନ୍ତି । ପାକ୍ସ ସଂଘ ସଭାପତି ରାଜେଶ ନିଗମଙ୍କ ଅଧ୍ୟକ୍ଷତାରେ ଆୟୋଜିତ ପ୍ରେସ୍ ମିଟ୍ରେ ବିଜେଡି ଜିଲ୍ଲା ସଭାପତି ଅବନୀ ରଞ୍ଜନ ଯୋଶୀ, ନୂଆପଡ଼ା ବିଧାୟକ ପ୍ରତିନିଧି ଜୟ ଢୋଲକିଆ, ପାକ୍ସ ସଂଘର ଜିଲ୍ଲା ସମ୍ପାଦକ ଯୁବରାଜ ଜଗତ, ଭବାନୀପାଟଣା ଡିସିସିବି ବ୍ୟାଙ୍କ ଡାଇରେକ୍ଟର ମନୋଜ ସାହୁ, ପାକ୍ସ ସଭାପତି ଦିଲୀପ ନିର୍ମଲକର, ପ୍ରେମଲାଲ ନାଏକ, ଦେବୀପ୍ରସାଦ ମିଶ୍ର ପ୍ରମୁଖ ମଞ୍ଚାସିନ ଥିଲେ ।
ଏହି ସମ୍ବାଦିକ ସମ୍ମିଳନୀରେ ରାଜ୍ୟ ସରକାର ରବି ଧାନ ସଂଗ୍ରହରେ ସମ୍ପୂର୍ଣ୍ଣ ବିଫଳ ହୋଇଛନ୍ତି ବୋଲି ବିଜେଡି କହିଛି । ଜିଲ୍ଲାରେ ରବି ଧାନ ସଂଗ୍ରହରେ ଆରମ୍ଭରୁ ଅବ୍ୟବସ୍ଥା ଦେଖା ଦେଇଛି । ବର୍ତ୍ତମାନ ଜିଲ୍ଲାର ବିଭିନ୍ନ ମଣ୍ଡିରେ ୬୦ହଜାର କୁଇଣ୍ଟାଲ ଧାନ ପଡିରହିଛି । ଏବେ ଜିଲ୍ଲାରେ ମୌସୁମୀ ବର୍ଷା ଆରମ୍ଭ ହୋଇଥିବାରୁ ଲଗାଣ ବର୍ଷାରେ ଚାଷୀଙ୍କ ଧାନ ଭିଜି ଗଜା ହେବାରେ ଲାଗିଛି । ଜଣେ ଚାଷୀଙ୍କ ଠାରୁ ମାତ୍ର ୨୮ କୁଇଣ୍ଟାଲ ଧାନ ସଂଗ୍ରହ କରିବାକୁ ଜିଲ୍ଲା ପ୍ରଶାସନ ନିର୍ଦ୍ଦେଶ ଦେଇଛନ୍ତି । ସରକାରଙ୍କ ଏଭଳି ନୀତିକୁ ଜିଲ୍ଲା ବିଜେଡି ଓ ପାକ୍ସ ସଭାପତିମାନେ ବିରୋଧ କରିଛନ୍ତି । ଆଗାମୀ ଦିନରେ ଚାଷୀଙ୍କ ସମସ୍ତ ଧାନ ମଣ୍ଡିରୁ ନଉଠିଲେ ଆନ୍ଦୋଳନ ଜୋରଦାର ହେବ ବୋଲି ଚେତାବନୀ ଦେଇଛନ୍ତି ।
