ନୂଆଦିଲ୍ଲୀ, ୧୮/୦୨: ବିବିସି ଭାରତୀୟ ମହିଳା କ୍ରୀଡ଼ା ପୁରସ୍କାର ପ୍ରଦାନ ଉତ୍ସବ-୨୦୨୪ ନୂଆଦିଲ୍ଲୀରେ ଆୟୋଜିତ ହୋଇଯାଇଛି। ଅଲିମ୍ପିଆନ ସୁଟର ମନୁ ଭାକର ବର୍ଷର ଶ୍ରେଷ୍ଠ ମହିଳା କ୍ରୀଡ଼ାବିତ ଭାବେ ପୁରସ୍କୃତ ହୋଇଛନ୍ତି । ସେମିତି ପାରା କ୍ରୀଡ଼ାରେ ଅବନୀ ଲେଖରା ଶ୍ରେଷ୍ଠ କ୍ରୀଡ଼ାବିତ ହେବାର ଗୌରବ ଲାଭ କରିଛନ୍ତି ।
ମନୁ ପ୍ୟାରିସ ଅଲିମ୍ପିକ୍ସରେ ଡବଲ ପଦକ ଜିତି ଦେଶ ପାଇଁ ଇତିହାସ ରଚିଥିଲେ । ଭାରତର ପ୍ରଥମ ମହିଳା ଭାବେ ଗୋଟିଏ ଅଲିମ୍ପିକ୍ସରେ ଦୁଇଟି ପଦକ ଜିତିଥିଲେ । ସେ ୨୦୨୧ରେ ଉଦୀୟମାନ କ୍ରୀଡ଼ାବିତ ପୁରସ୍କାର ଜିତିଥିଲେ । ଅବନୀ ୨୦୨୦ ପାରା ଅଲିମ୍ପିକ୍ସରେ ଗୋଟିଏ ସ୍ୱର୍ଣ୍ଣ ଓ ଗୋଟିଏ ବ୍ରୋଞ୍ଜ ଏବଂ ୨୦୨୪ରେ ସ୍ୱର୍ଣ୍ଣ ଜିତିଥିଲେ । ପ୍ରଥମ ଭାରତୀୟ ପାରା ମହିଳା ସୁଟର ଭାବେ ସେ ଅଲିମ୍ପିକ୍ସରେ ୩ଟି ପଦକ ଜିତିଛନ୍ତି । ପାରା ତୀରନ୍ଦାଜ ଶୀତଲ ଦେବୀ ଉଦୀୟମାନ କ୍ରୀଡ଼ାବିତ ଏବଂ ମହିଳା କ୍ରିକେଟର ମିଥାଲୀ ରାଜ ଲାଇଫ୍ ଟାଇମ ପୁରସ୍କାର ପାଇଛନ୍ତି ।
