ଜଗଦଲପୁର,୨୯/୧୧: ମଧ୍ୟପ୍ରଦେଶ-ମହାରାଷ୍ଟ୍ର-ଛତିଶଗଡ ସ୍ପେଶାଲ ଜୋନାଲ କମିଟି (ଏମ୍ଏମ୍ସି) ନକ୍ସଲ ସଙ୍ଗଠନର ଶତାଧିକ ମାଓବାଦୀ ସରକାରଙ୍କ ନିକଟରେ ଆତ୍ମସମର୍ପଣ କରିବାକୁ ଆଗ୍ରହ ପ୍ରକାଶ କରିଛନ୍ତି । ଏମ୍ଏମ୍ସି ମୁଖପାତ୍ର ତଥା ମାଓନେତା ଅନନ୍ତଙ୍କ ପକ୍ଷରୁ ଏହି ମର୍ମରେ ଏକ ଚିଠି ମଧ୍ୟ ଜାରି କରାଯାଇଛି । ସେଥିରେ ସେ ଲେଖିଛନ୍ତି ସଙ୍ଗଠନର ଶତାଧିକ ସଦସ୍ୟ ଆସନ୍ତା ଜାନୁଆରୀ ୧ରେ ଆତ୍ମସମର୍ପଣ କରିବେ । ତେଣୁ ବର୍ତ୍ତମାନ ଜାରି ରହିଥିବା ନକ୍ସଲ ଦମନ ଅଭିଯାନକୁ ସେ ପର୍ଯ୍ୟନ୍ତ ବନ୍ଦ ରଖିବାକୁ ସେ ଛତିଶଗଡ଼ ସରକାରଙ୍କ ନିକଟରେ ଅପିଲ କରିଛନ୍ତି ।
ମାଓନେତା ଅନନ୍ତଙ୍କ ପକ୍ଷରୁ ଜାରି କରାଯାଇଥିବା ଏହି ଚିଠି ଏକ ସପ୍ତାହ ଭିତରେ ଦ୍ୱିତୀୟ । ଏହା ପୂର୍ବରୁ ଗତ ସପ୍ତାହରେ ସେ ଜାରି କରିଥିବା ଚିଠିରେ ଫେବ୍ରୁଆରୀ ୧୫ ସୁଦ୍ଧା ଆତ୍ମସମର୍ପଣ କରିବା କଥା ଉଲ୍ଲେଖ କରିଥିଲେ । କିନ୍ତୁ ବର୍ତ୍ତମାନ ଜାରି କରିଥିବା ନୂଆ ଚିଠିରେ ଜାନୁଆରୀ ୧ ତାରିଖରେ ଆତ୍ମସମର୍ପଣ କରିବାକୁ କହିଛନ୍ତି । ଯେଭଳି ଛତିଶଗଡରେ ସତୀଶ ଓ ମହାରାଷ୍ଟ୍ରରେ ସୋନୁ ଆତ୍ମସମର୍ପଣ କରିଛନ୍ତି ଠିକ୍ ସେହିଭଳି ସେମାନେ ମଧ୍ୟପ୍ରଦେଶ, ମହାରାଷ୍ଟ୍ର ଓ ଛତିଶଗଡର ମୁଖ୍ୟମନ୍ତ୍ରୀ କିମ୍ବା ଗୃହମନ୍ତ୍ରୀଙ୍କ ନିକଟରେ ଆତ୍ମସମର୍ପଣ କରିବା କଥା ଲେଖିଛନ୍ତି । କେବଳ ଏତିକି ନୁହେଁ ସେ ନିଜ ସାଥୀମାନଙ୍କ ସହିତ କଥାବାର୍ତ୍ତା କରିବା ଲାଗି ଏକ ବାଉଫେଙ୍ଗ୍ର ଖୋଲା ଫ୍ରିକ୍ୱେନ୍ସି ନମ୍ବର ୪୩୫.୭୧୫ ମଧ୍ୟ ଜାରି କରିଛନ୍ତି । ଯେଉଁଥିରେ ଜାନୁଆରୀ ୧ ତାରିଖ ପର୍ଯ୍ୟନ୍ତ ପ୍ରତିଦିନ ପୂର୍ବାହ୍ନ ୧୧ଟାରୁ ୧୧ଟା ୧୫ ମଧ୍ୟରେ ସେ ସାଥୀମାନଙ୍କ ସହ କଥାବାର୍ତ୍ତା କରିବେ । ପ୍ରଥମଥର ଲାଗି ନକ୍ସଲମାନେ ଏକ ଖୋଲା ଫ୍ରିକ୍ସେନ୍ସି ଜାରି କରିଛନ୍ତି । ବାଉଫେଙ୍ଗ ହେଉଛି ହାତରେ ଧରିପାରିବା ଭଳି ଏକ ୱାକିଟକି ବା ଛୋଟ ରେଡିଓ। ଯାହାରି ମାଧ୍ୟମରେ ଜଙ୍ଗଲ, ପାହାଡ କିମ୍ବା ସହରର ଭିଡ ଭିତରେ ବିନା ମୋବାଇଲ ନେଟୱାର୍କରେ ଦୁଇଜଣ ବ୍ୟକ୍ତି କଥାବାର୍ତ୍ତା କରିପାରିବେ ।
ଅନ୍ୟପକ୍ଷରେ ବସ୍ତର ଦଣ୍ଡକାରଣ୍ୟ ସ୍ପେଶାଲ ଜୋନାଲ କମିଟି ପକ୍ଷରୁ ଆଜି ଏକ ଚିଠି ଜାରି କରାଯାଇଛି । ସେଥିରେ କୁହାଯାଇଛି ଯେ ମାଓନେତା ଦେବଜୀଙ୍କୁ ଆନ୍ଧ୍ର ପୁଲିସ ଗିରଫ କରିଛି । ତାଙ୍କ ସହ ଅନ୍ୟ ୫୦ ଜଣ ମାଓବାଦୀଙ୍କୁ ମଧ୍ୟ ଧରାଯାଇଛି । ସେହିଭଳି ଏହି ଚିଠିରେ ଗତ ୧୮ ଓ ୧୯ ତାରିଖରେ ଆନ୍ଧପ୍ରଦେଶର ଆଲୁରି ସୀତାରାମ ରାଜୁ ଜିଲ୍ଲାରେ ହୋଇଥିବା ଏନ୍କାଉଣ୍ଟରକୁ ମିଥ୍ୟା ବୋଲି ଦର୍ଶାଯାଇଛି । ନକ୍ସଲମାନେ ଅଭିଯୋଗ କରିଛନ୍ତି କି ପୁଲିସ ମିଛ ଏନ୍କାଉଣ୍ଟର କାହାଣୀ କହୁଛି । ମାଣ୍ଡଭି ହିଡ୍ମା ଓ ଅନ୍ୟ ୧୩ ଜଣ ନକ୍ସଲଙ୍କୁ ପୁଲିସ ଧରିବା ପରେ ସେମାନଙ୍କୁ ଗୁଳିକରି ହତ୍ୟା କରିଛି । ଏହି ମିଥ୍ୟା ଏନ୍କାଉଣ୍ଟର ପ୍ରତିବାଦରେ ମାଓବାଦୀ ଆସନ୍ତା ୩୦ ତାରିଖରେ ଭାରତ ବନ୍ଦ ଡାକରା ଦେଇଛନ୍ତି ।
