ଯାଜପୁର, ୭।୩: ଯାଜପୁର ଜିଲ୍ଲାରେ ଜଣେ ମାଟ୍ରିକ୍ ପରୀକ୍ଷା ଛାତ୍ରୀ ଗର୍ଭବତୀ ହୋଇ ଏକ କନ୍ୟା ସନ୍ତାନକୁ ଜନ୍ମ ଦେଇଥିଲେ । ଜାତୀୟ ମାନବାଧିକାର ଆୟୋଗ (NHRC) ଏହି ଘଟଣାକୁ ଗୁରୁତର ସହ ନେଇଛି । ଓଡ଼ିଶା ଉଚ୍ଚ ନ୍ୟାୟାଳୟର ଆଡଭୋକେଟ୍ ତଥା ମାନବାଧିକାର କର୍ମୀ ଶ୍ରୀ ଅଖଣ୍ଡ ଦ୍ୱାରା ଅଭିଯୋଗ ଦାଖଲ କରାଯିବା ପରେ ଏନଏଚଆରସି ଯାଜପୁର ଏସପିଙ୍କୁ ଚାରି ସପ୍ତାହ ମଧ୍ୟରେ ରିପୋର୍ଟ ଦେବାକୁ କହିଛନ୍ତି ।
୨୬ ଫେବୃଆରୀ ୨୦୨୫ରେ ବରି ବ୍ଲକର ରାମପୁର ଗାଁର ପଞ୍ଚାୟତ ହାଇସ୍କୁଲ୍ରେ ପଢ଼ୁଥିବା ୧୦ମ ଶ୍ରେଣୀର ଜଣେ ଛାତ୍ରୀଙ୍କର ପେଟରେ ଯନ୍ତ୍ରଣା ହେବାରୁ ତାଙ୍କୁ ହସ୍ପିଟାଲ୍ ନିଆଯାଇଥିଲା । ସେଠାରେ ସେ ଏକ କନ୍ୟା ସନ୍ତାନକୁ ଜନ୍ମ ଦେଇଥିଲେ । ଏହାପରେ ଝିଅ ଓ ନବଜାତ ଶିଶୁଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା ।
ଅଭିଯୋଗକାରୀ ଅଖଣ୍ଡ କହିଛନ୍ତି ଯେ, ଛାତ୍ରୀ ଜଣକ ଗର୍ଭବତୀ ଥିଲେ ବୋଲି କେହି ଜାଣି ପାରିନଥିଲେ । ଏହା ଶିକ୍ଷକ, ଅଙ୍ଗନବାଡ଼ି କର୍ମଚାରୀ ଏବଂ ସ୍ଥାନୀୟ ପ୍ରଶାସନଙ୍କ ଅବହେଳା । ସେ କହିଛନ୍ତି ଯେ, ଏହା ପୋକ୍ସୋ ଆଇନ୍ ଅନୁଯାୟୀ, ଗୁରୁତର ଅପରାଧ ଓ ଶିଶୁ ସୁରକ୍ଷା ଉଲ୍ଲଂଘନ । ଏହି ମାମଲାରେ ଏନଏଚଆରସି ଯାଜପୁର ଏସ୍ପିଙ୍କୁ ୪ ସପ୍ତାହରେ ରିପୋର୍ଟ ତଲବ ନିର୍ଦ୍ଦେଶ ଦେଇଛନ୍ତି । ଘଟଣାର ଉଚ୍ଚସ୍ତରୀୟ ତଦନ୍ତ, ପୀଡ଼ିତାଙ୍କୁ କ୍ଷତିପୂରଣ ଓ ଥଇଥାନ, ରାଜ୍ୟରେ ଏଭଳି ଘଟଣା ବାରମ୍ବାର ହେଉଥିବାରୁ ଏହାକୁ ରୋକିବା ପାଇଁ ଉପଯୁକ୍ତ ପଦକ୍ଷେପ ନେବାକୁ ଶ୍ରୀ ଅଖଣ୍ଡ କମିଶନଙ୍କ ନିକଟରେ ନିବେଦନ କରିଥିଲେ ।
