ମସ୍କଟ, ୧/୧୨: ପୁରୁଷ ଜୁନିୟର ଏସିଆ କପ୍ ହକିରେ ଶନିବାର ଡିଫେଣ୍ଡିଂ ଚାମ୍ପିଅନ ଭାରତ ଗୋଲ ବର୍ଷା କରିଥିଲା । ପ୍ରତି କ୍ୱାର୍ଟରରେ ଦେଇ ଚାଲିଥିଲା ଗୋଲ୍ । ଅଣନିଶ୍ୱାସୀ ହୋଇ ପଡ଼ିଥିଲା ଚାଇନିଜ ତାଇପେ ଦଳ । ଶେଷରେ ଭାରତ ୧୬-୦ ଗୋଲରେ ମ୍ୟାଚ୍ ବିଜୟୀ ହୋଇଥିଲା । ଚଳିତ ଟୁର୍ଣ୍ଣାମେଣ୍ଟରେ ଏହା ଭାରତର ସବୁଠୁ ବଡ଼ ବିଜୟ । ପୂର୍ବରୁ ଥାଇଲାଣ୍ଡ ବିପକ୍ଷରେ ୧୧-୦ରେ ଏବଂ ଜାପାନ ବିପକ୍ଷରେ ୩-୨ ଗୋଲରେ ବିଜୟୀ ହୋଇଥିଲା ।
ତୃତୀୟ ରାଉଣ୍ଡ ଶେଷ ସୁଦ୍ଧା ଭାରତ ଅପରାଜେୟ ସହ ପୁଲ୍ ଏ’ରେ ୯ ପଏଣ୍ଟ ପାଇ ଶୀର୍ଷରେ ରହିଥିବାବେଳେ ଜାପାନ ୬ ପଏଣ୍ଟ ସହ ଦ୍ୱିତୀୟ ଏବଂ ଦକ୍ଷିଣ କୋରିଆ ସମାନ ପଏଣ୍ଟ ସହ ତୃତୀୟ ସ୍ଥାନରେ ରହିଛି । ପୁଲର ଶ୍ରେଷ୍ଠ ୨ ଦଳ ସେମି ଫାଇନାଲକୁ ଉନ୍ନୀତ ହେବେ ଏବଂ ଏହି ୨ ଦଳ ୨୦୨୫ ଜୁନିୟର ବିଶ୍ୱକପ୍କୁ ମଧ୍ୟ ଯୋଗ୍ୟତା ଲାଭ କରିବେ । ଆସନ୍ତାକାଲି ଭାରତ ଶେଷ ପୁଲ ମ୍ୟାଚ୍ରେ ଦକ୍ଷିଣ କୋରିଆକୁ ଭେଟିବ ।
ପ୍ରଥମ କ୍ୱାର୍ଟରର ସପ୍ତମ ମିନିଟରେ ଭାରତ ପ୍ରଥମ ଗୋଲ୍ ଦେଇଥିଲା । ଯୋଗେମ୍ବର ରାୱତ ଏହି ଗୋଲ୍ଟି ଦେଇଥିଲେ । ପେନାଲ୍ଟି କର୍ଣ୍ଣରକୁ ସେ ଗୋଲରୂପ ଦେଇଥିଲେ । ଚାଇନିଜ ତାଇପେ ପ୍ରଥମ ଗୋଲ ଖାଇବା ପରେ ଅଧିକ ରକ୍ଷଣାତ୍ମକ ପ୍ରଦର୍ଶନ କରିଥିଲା । ଫଳରେ ଏହି କ୍ୱାର୍ଟରରେ ଭାରତ ଆଉ ଗୋଲ୍ ଦେଇ ପାରିନଥିଲା ।
ଦ୍ୱିତୀୟ କ୍ୱାର୍ଟରରେ ୪ଟି ଗୋଲ୍ ହୋଇଥିଲା । ୧୭ ମିନିଟରେ ଦିଲରାଜ ସିଂ, ୨୦ ମିନିଟରେ ୨୦ ଓ ୨୮ ମିନିଟରେ ସୌରଭ ଆନନ୍ଦ ଏବଂ ୨୩ ମିନିଟରେ ରୋଶନ କୁଜୁର ଗୋଲ୍ ଦେଇଥିଲେ । ପ୍ରଥମାର୍ଦ୍ଧ ଶେଷ ସୁଦ୍ଧା ଭାରତ ୫-୦ ଗୋଲରେ ଅଗ୍ରଣୀ ହାସଲ କରିଥିଲା ।
ତୃତୀୟ କ୍ୱାର୍ଟରର ଆରମ୍ଭରୁ ଭାରତକୁ ମିଳିଥିଲା ପେନାଲ୍ଟି କର୍ଣ୍ଣର (ପିସି) । ୩୧ ମିନିଟରେ ମିଳିଥିଲା ଏହି ପିସିକୁ ପ୍ରିୟବ୍ରତ ତାଲେମ ଗୋଲରୂପ ଦେବାରେ ଆଦୌ ହେଳା କରିନଥିଲେ । ୩୨ ମିନିଟରେ ରୋଶନ ଆଉ ଏକ ଗୋଲ ଦେଇଥିଲେ । ୩୭ ମିନିଟରେ ତୀବ୍ର ଆକ୍ରମଣ କରି ଭାରତ ପୁଣି ପାଇଥିଲା ପିସି । ଅର୍ଶଦୀପ ସିଂ ଏହାକୁ ଗୋଲରେ ରୂପାନ୍ତରିତ କରି ଦଳକୁ ୮-୦ରେ ଅଗ୍ରଣୀ କରାଇଥିଲେ। ୩୯ ମିନିଟରେ ଭାରତ ଆକ୍ରମଣ କରି ବିପକ୍ଷ ଡି’ସର୍କଲରେ ପ୍ରବେଶ କରିଥିଲା । ଚାଇନିଜ ତାଇପେ ଖେଳାଳିଙ୍କ ତ୍ରୁଟି ଯୋଗୁ ପାଇଥିଲା ପେନାଲ୍ଟି ଷ୍ଟ୍ରୋକ । ସାରଦା ନନ୍ଦ ତିୱାରୀ ଏହି ନିଶ୍ଚିତ ଗୋଲ୍ ଦେବା ପରେ ଭାରତର ସ୍ଥିତି ଅଧିକ ଦୃଢ଼ ହୋଇଥିଲା ।
ପରବର୍ତ୍ତୀ ସମୟରେ ୪୦ (ଦିଲରାଜ), ୪୨ (ରୋଶନ), ୪୪ (ଅର୍ଶଦୀପ) ଓ ୪୫ (ଦିଲରାଜ) ମିନିଟରେ ଗୋଲ୍ ହୋଇଥିଲା । ଚାଇନିଜ ତାଇପେ ଭାରତର ଆକ୍ରମଣକୁ ପ୍ରତିହତ କରିବାରେ ସଂପୂର୍ଣ୍ଣ ବିଫଳ ରହିଥିଲା । ଶେଷରେ କ୍ୱାର୍ଟରରେ ତାଇପେ ଆଉ ୩ଟି ଗୋଲ୍ ଖାଇଥିଲା । ୫୪ ମିନିଟରେ ଅରଇଜିତ ସିଂ ହୁଣ୍ଡାଲ, ୫୭ ମିନିଟରେ ଦିଲରାଜ ଓ ୫୮ ମିନିଟରେ ସୌରଭ ଗୋଲ୍ ଦେଇ ଦଳକୁ ୧୬-୦ ରେ ଏକତରଫା ବିଜୟୀ କରିଥିଲେ । ଶେଷ ପର୍ଯ୍ୟନ୍ତ ତାଇପେ ଦଳ ଗୋଲ ଖାତା ଖୋଲି ପାରିନଥିଲା ।
ଭାରତ ପକ୍ଷରୁ ଦିଲରାଜ ସର୍ବାଧିକ ୪ଟି ଏବଂ ସୌରଭ ଓ ରୋଶନ ୩ଟି ଲେଖାଏଁ ଗୋଲ୍ ସ୍କୋର କରିଥିଲେ । ଅନ୍ୟ ମ୍ୟାଚ୍ରେ ଜାପାନ ୨-୦ରେ କୋରିଆକୁ ହରାଇଥିବାବେଳେ ବାଂଲାଦେଶ-ମାଲେସିଆ ମ୍ୟାଚ୍ ୨-୨ ଗୋଲରେ ଅମୀମାଂସିତ ରହିଥିଲା ।
