ବ୍ରହ୍ମପୁର, ୦୨/୦୭ : ଅଶାନ୍ତ ହେଉଛି ଗଞ୍ଜାମ ଜିଲ୍ଲା। କଥା କଥାରେ ଗଡ଼ୁଛି ମୁଣ୍ଡ। ଜୁଲାଇ ପହିଲାରେ ଜିଲ୍ଲାରେ ୩ ଜଣଙ୍କୁ ହତ୍ୟା ଘଟଣା ଚାଞ୍ଚଲ୍ୟ ଖେଳାଇଥିବା ବେଳେ ଗତକାଲି ରାତିରେ ଆଉ ଏକ ମରଣାନ୍ତକ ଆକ୍ରମଣ ହୋଇଛି। ଥାନାରେ କେସ୍ ଦେବାରୁ ଗଞ୍ଜାମ ଥାନା ତେଲୁଗୁ ନୂଆଗାଁରେ ଘରେ ପଶି ଦୁର୍ବୃତ୍ତମାନେ ଭାଇ ଭଉଣୀଙ୍କୁ ହାଣି ଦେଇଛନ୍ତି। ସେମାନଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ବ୍ରହ୍ମପୁର ବଡ଼ ମେଡିକାଲରେ ଭର୍ତ୍ତି କରାଯାଇଛି।
ସୂଚନାନୁଯାୟୀ, ଗଞ୍ଜାମ ଥାନା ତେଲୁଗୁ ନୂଆଗାଁର ରିଙ୍କି ବେହେରାଙ୍କ ୧୩ବର୍ଷର ଝିଅ ପଡ଼ୋଶୀ ଗାଁ ଅଗସ୍ତିନୂଆ ଗାଁ ସ୍କୁଲରେ ପାଠ ପଢ଼ୁଛନ୍ତି। ମଙ୍ଗଳବାର ସ୍କୁଲ ବାହାରେ ଆଉ ଜଣେ ଝିଅ ସହ ତାର ଝଗଡ଼ା ହୋଇଥିଲା। ସେହି ଗ୍ରାମର ଜଣେ ଯୁବକ ଆସି ରିଙ୍କିଙ୍କ ଝିଅକୁ ମାଡ଼ ମାରିଥିଲେ। ଏନେଇ ରିଙ୍କି ତାଙ୍କ ସମ୍ପର୍କୀୟ ଭାଇ ଭୀମ ତରେଇଙ୍କ ସହ ଆସି ଥାନାରେ ଅଭିଯୋଗ କରିଥିଲେ। ପୁଲିସ ଅଭିଯୁକ୍ତମାନଙ୍କୁ ଥାନାକୁ ଡକାଇଥିଲା। ରିଙ୍କି ବୁଧବାର କେସ କରିବେ ବୋଲି କହିଥିଲେ। ଏହାପରେ ପୁଲିସ ଅଭିଯୁକ୍ତଙ୍କୁ ତାଗିଦ୍ କରି ବୁଧବାର ଆସିବାକୁ କହିଥିଲା। ସମସ୍ତେ ଫେରି ଆସିଥିଲେ। ରିଙ୍କି ଓ ଭୀମ ଗାଁରେ ପହଞ୍ଚିବା କ୍ଷଣି ଅଭିଯୁକ୍ତମାନେ ତାଙ୍କ ଘରକୁ ଆସି ସେମାନଙ୍କୁ ଖଣ୍ଡାରେ ଆକ୍ରମଣ କରିଥିଲେ। ରିଙ୍କି ଓ ଭୀମ ଗୁରୁତର ହୋଇଥିଲେ। ସେମାନଙ୍କୁ ଉଦ୍ଧାର କରି ବ୍ରହ୍ମପୁର ବଡ଼ ମେଡିକାଲରେ ଭର୍ତ୍ତି କରାଯାଇଛି। ଭୀମ ତରେଇଙ୍କ ସ୍ୱାସ୍ଥ୍ୟବସ୍ଥା ଗୁରୁତର ଥିବା ଡାକ୍ତର କହିଛନ୍ତି। ଗଞ୍ଜାମ ଥାନା ଆଇଆଇସି ସୁମିତ୍ରା ସାହୁ ଓ ଛତ୍ରପୁର ଏସଡିପିଓ ଡାକ୍ତରଖାନାରେ ପହଞ୍ଚି ଆହତଙ୍କ ବୟାନ ରେକର୍ଡ କରିଛନ୍ତି। ଘଟଣାରେ ସଂପୃକ୍ତ କିଛି ଅଭିଯୁକ୍ତଙ୍କୁ ପୁଲିସ ଉଠାଇ ଆଣିଛି। ଏହି ଘଟଣାକୁ ନେଇ ଗ୍ରାମରେ ଆଶାନ୍ତି ଲାଗି ରହିଛି।
