ନୂଆଦିଲ୍ଲୀ ୨୫/୧୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ଓଡିଶା ପର୍ବଠାରେ ଓଡ଼ିଆ ଚା ପିଇଛନ୍ତି । ପ୍ରଧାନମନ୍ତ୍ରୀ ବିଭିନ୍ନ ଷ୍ଟଲ୍ ବୁଲି ଦେଖିଥିଲେ । ପ୍ରଧାନମନ୍ତ୍ରୀଙ୍କୁ ଦେଖି ଷ୍ଟଲ୍ ମାଲିକମାନେ ଖୁସି ହୋଇଥିଲେ । ପ୍ରଧାନମନ୍ତ୍ରୀ ମୋଦିଙ୍କ ସହ ଥିଲେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ରେଳ, ଆଇଟି ମନ୍ତ୍ରୀ ଅଶ୍ୱିନୀ ବୈଷ୍ଣବ । ପ୍ରଧାନମନ୍ତ୍ରୀ ମୋଦି ବଲାଙ୍ଗିରର ରବି ଚା ଏବଂ କଫି ଷ୍ଟଲ୍କୁ ଯାଇ ଚା ପିଇଥିଲେ । ଷ୍ଟଲ୍ର ମାଲିକ ସୋମନାଥ ସାହୁ ପ୍ରଧାନମନ୍ତ୍ରୀ ଓ ମନ୍ତ୍ରୀମାନଙ୍କୁ ତିନୋଟି ମାଟି ପାତ୍ରରେ ଆମ୍ବକଷିଆ ଚା ପିଇବାକୁ ଦେଇଥିଲେ । ପ୍ରଧାନମନ୍ତ୍ରୀ ଓ ଅନ୍ୟ ଦୁଇ ମନ୍ତ୍ରୀ ସେଠାରେ କିଛି ସମୟ ଛିଡା ହୋଇ ଚା ପିଇଥିଲେ ।
ପ୍ରଧାନମନ୍ତ୍ରୀ ହିନ୍ଦୀରେ କହିଥିଲେ ‘ଚା ବହୁତ ବଢିଆ, ୟେ ସେ ଚାଏ କଭି ମୈନେ ପିଆ ନହିଁ ଥା ।' ଏଥିରେ ସୋମନାଥ ସାହୁ ବହୁତ ଖୁସି ହୋଇଥିଲେ । ପରେ ସେମାନେ ସଭା ସ୍ଥଳକୁ ଯାଇଥିଲେ । ସଭା ସ୍ଥଳରେ ପହଁଞ୍ଚିବା ପରେ ପ୍ରବାସୀ ଓଡିଆମାନେ ପ୍ରଧାନମନ୍ତ୍ରୀଙ୍କୁ ଉଚ୍ଛ୍ୱସିତ ସ୍ୱାଗତ କରିଥିଲେ । କାର୍ଯ୍ୟକ୍ରମ ଆରମ୍ଭରେ ପ୍ରଧାନମନ୍ତ୍ରୀ ମୋଦି ଓ ଅନ୍ୟ ମନ୍ତ୍ରୀମାନେ ପ୍ରଦୀପ ପ୍ରଜ୍ୱଳନ କରି ମହାପ୍ରଭୁ ଜଗନ୍ନାଥଙ୍କୁ ନମସ୍କାର କରିଥିଲେ । ଏହାପରେ ଓଡିଶାର କଳାକାରମାନେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିଲେ । ଏଥିରେ ଥିଲା ସମ୍ବଲପୁରୀ, ଓଡିଶୀ ଓ ଛଉ ନୃତ୍ୟ। କଳାକାରମାନେ ପ୍ରଧାନମନ୍ତ୍ରୀଙ୍କ ସମ୍ମୁଖରେ ରଙ୍ଗବତୀ, ଜଗନ୍ନାଥ ସ୍ୱାମୀ ନୟନ ପଥଗାମୀ ଓ ପ୍ରଧାନମନ୍ତ୍ରୀ ମୋଦିଙ୍କ ଲିଖିତ ‘ସୌଗନ୍ଧ ମୁଝେ ଇସି ମିଟିକି...’ ଗୀତ ଉପରେ ଆଧାରିତ ନୃତ୍ୟ ପରିବେଷଣ କରିଥିଲେ ।
