ମୁମ୍ବାଇ,୧୫/୧୧: ପାଖାପାଖି ବର୍ଷେ ପରେ କ୍ରିକେଟ ମୈଦାନକୁ ଫେରିଥିବା ଭାରତର ଦ୍ରୁତ ବୋଲର ମହମ୍ମଦ ସାମି ଜବରଦସ୍ତ କମବ୍ୟାକ କରିଛନ୍ତି । ରଣଜୀ ଟ୍ରଫି ଜରିଆରେ କ୍ରିକେଟକୁ ଫେରିଥିବା ସାମି ମଧ୍ୟପ୍ରଦେଶ ବିପକ୍ଷ ମ୍ୟାଚରେ ୪ଟି ୱିକେଟ ନେଇଛନ୍ତି । ଭାରତୀୟ ଷ୍ଟାର ପେସ୍ ବୋଲରଙ୍କ ଏହି କମବ୍ୟାକ ଅଷ୍ଟ୍ରେଲିଆର ଆହ୍ବାନପୂର୍ଣ୍ଣ ଗସ୍ତରେ ମୁସ୍କିଲରେ ଥିବା ଭାରତୀୟ ଦଳକୁ ବଡ ଆଶ୍ବସ୍ତି ଦେଇଛି । ସେ ବର୍ଡର-ଗାଭାସ୍କର ଟ୍ରଫି ନେଇ ଭାରତୀୟ ଦଳରେ ଯୋଗ ଦେଇ ପାରନ୍ତି ।
ଆହତ ସମସ୍ୟାରୁ ମୁକୁଳି ବର୍ଷେ ପରେ ଫୁଲ ଫର୍ମରେ ନଜର ଆସିଛନ୍ତି ମହମ୍ମଦ ସାମି । ରଣଜୀ ଟ୍ରଫି ମ୍ୟାଚରେ ମଧ୍ୟପ୍ରଦେଶ ପ୍ରଥମ ଇନିଂସରେ ୧୯ ଓଭର ବୋଲିଂ କରି ମେଡେନ ସହ ୫୪ ରନ ଦେଇ ୪ଟି ୱିକେଟ ଅକ୍ତିଆର କରିଛନ୍ତି ମହମ୍ମଦ ସାମି । ମଧ୍ୟପ୍ରଦେଶର ଅଧିନାୟକ ଶୁଭମ ଶର୍ମା, ଅଲରାଉଣ୍ଡର ସାରାଂଶଙ୍କ ବ୍ୟତୀତ ଦୁଇ ନିମ୍ନକ୍ରମର ବ୍ୟାଟରଙ୍କୁ ଆଉଟ କରିଥିଲେ । ୩ ଜଣଙ୍କ କ୍ଲିନ ବୋଲ୍ଡ କରିଥିଲେ । ସାମିଙ୍କର ଏହି କମବ୍ୟାକ ଭାରତୀୟ ଦଳ ପାଇଁ ଭଲ ଖବର । ଚୟନକର୍ତ୍ତା ସାମିଙ୍କ ଉପରେ ନଜର ରଖିବେ ବୋଲି ଆଲୋଚନା ହେଉଛି ।
ରଣଜୀ ମ୍ୟାଚ ଶେଷ ଯାଏଁ ଦେଖିବାକୁ ପଡିବ କି ସାମି ସମ୍ପୂର୍ଣ୍ଣ ଫିଟ ଅଛନ୍ତି ନା ନାହିଁ । ଯଦି ସେ ସବ ମାନଦଣ୍ଡ ପୂରଣ କରନ୍ତି ତେବେ ଅଷ୍ଟ୍ରେଲିଆ ବିପକ୍ଷ ଦ୍ବିତୀୟ ଟେଷ୍ଟ ପୂର୍ବରୁ ମହମ୍ମଦ ସାମି ଭାରତୀୟ ଦଳରେ ସାମିଲ ହୋଇଯିବେ । ନଭେମ୍ବର ୧୬ରେ ରଣଜୀ ମ୍ୟାଚ ଶେଷ ହେବ । ଯଦି ସାମି ଜଲଦୀ ଅଷ୍ଟ୍ରେଲିଆରେ ପହଞ୍ଚି ଯାଆନ୍ତି ତେବେ ପ୍ରେସିଡେଣ୍ଟ ଏକାଦଶ ବିପକ୍ଷରେ ଦୁଇ ଦିନିଆ ଦିବାରାତ୍ର ଅଭ୍ୟାସ ମ୍ୟାଚ ଖେଳିବାର ସୁଯୋଗ ମିଳିବ ।
