ନୂଆଦିଲ୍ଲୀ,୨୯/୧୦: ଅହମ୍ମଦାବାଦରେ ବିମାନ ଦୁର୍ଘଟଣା ପରେ ସରକାରଙ୍କ ବଡ଼ ନିଷ୍ପତ୍ତି। ଭାରତରେ ପ୍ରତିଷ୍ଠା ହେବ ବିମାନ ସୁରକ୍ଷା କେନ୍ଦ୍ର। ବିମାନ ଦୁର୍ଘଟଣା ତଦନ୍ତ ଅଧିକାରୀ ଟିମକୁ ବିଶ୍ୱ ମାନଦଣ୍ଡରେ ତାଲିମ ଦେବା ପାଇଁ ଦେଶରେ ଏକ ଜାତୀୟ ବିମାନ ସୁରକ୍ଷା କେନ୍ଦ୍ର ପ୍ରତିଷ୍ଠା କରାଯିବ ବୋଲି ଜଣେ ଅଧିକାରୀ ସୂଚନା ଦେଇଛନ୍ତି ।
ବେସାମରିକ ବିମାନ ଚଳାଚଳ ସଚିବ ସମୀର କୁମାର ସିହ୍ନା କହିଛନ୍ତି ଯେ, ସରକାର ବିମାନ ସୁରକ୍ଷାକୁ ସୁଦୃଢ଼ କରିବା ପାଇଁ ନିୟାମକ ଏବଂ ତଦନ୍ତ ଭୂମିକାରେ ବୃତ୍ତିଗତଙ୍କ ସଂଖ୍ୟା ଦ୍ୱିଗୁଣିତ କରୁଛନ୍ତି।ଭାରତ ଏହି କ୍ଷେତ୍ରରେ ପ୍ରଥମ ଜାତୀୟ ବିମାନ ସୁରକ୍ଷା କେନ୍ଦ୍ର ପ୍ରତିଷ୍ଠା କରୁଛି, ଯାହା ବିମାନ ଦୁର୍ଘଟଣା ତଦନ୍ତକାରୀ ଏବଂ ବିମାନ ବୃତ୍ତିଗତମାନଙ୍କୁ ତାଲିମ ଦେବ। ଏହା ବିଶ୍ୱସ୍ତରୀୟ ସୁରକ୍ଷା ଭିତ୍ତିଭୂମି ଏବଂ ମାନବ ସମ୍ବଳ ନିର୍ମାଣ ପାଇଁ ଆମର ଦୀର୍ଘକାଳୀନ ଦୃଷ୍ଟିକୋଣକୁ ପ୍ରତିଫଳିତ କରେ ବୋଲି କହିଛନ୍ତି ।
ପ୍ରଥମ ଥର ପାଇଁ ଭାରତରେ ଅନୁଷ୍ଠିତ ହେଉଥିବା ଏସିଆ-ପ୍ରଶାନ୍ତ ମହାସାଗରୀୟ ଦୁର୍ଘଟଣା ତଦନ୍ତ ଗୋଷ୍ଠୀର ତ୍ରୟୋଦଶ ବୈଠକର ଉଦଘାଟନୀ ଅଧିବେଶନରେ ସିହ୍ନା ଏହି ମନ୍ତବ୍ୟ ଦେଇଥିଲେ। ଜୁନ୍ ୧୨ ତାରିଖରେ ଏୟାର ଇଣ୍ଡିଆ ବିମାନ ଦୁର୍ଘଟଣାରେ ମୃତ୍ୟୁବରଣ କରିଥିବା ୨୬୦ ଜଣଙ୍କ ସ୍ମୃତିରେ ଅଂଶଗ୍ରହଣକାରୀମାନେ ଦୁଇ ମିନିଟ୍ ନୀରବତା ପାଳନ କରିଥିଲେ। ଏହି ଦୁର୍ଘଟଣାର ତଦନ୍ତ ଏୟାରକ୍ରାଫ୍ଟ ଦୁର୍ଘଟଣା ତଦନ୍ତ ବ୍ୟୁରୋ ଦ୍ୱାରା କରାଯାଉଛି।AAIB ମହାନିର୍ଦ୍ଦେଶକ କହିଛନ୍ତି ଯେ ବିଭିନ୍ନ ଦେଶରେ ବିମାନ ଦୁର୍ଘଟଣା ତଦନ୍ତ ବ୍ୟୁରୋର ସୁପାରିଶଗୁଡ଼ିକର କାର୍ଯ୍ୟକାରିତା ଏବେ ବି ଏକ 'ଅସ୍ପଷ୍ଟ କ୍ଷେତ୍ର ହୋଇ ରହିଛି । ସେ କହିଛନ୍ତି, "ସମସ୍ତ ଦୁର୍ଘଟଣା ଆନ୍ତର୍ଜାତୀୟ ବେସାମରିକ ବିମାନ ଚଳାଚଳ ସଂଗଠନର ତତ୍ତ୍ୱାବଧାନରେ ଅଧ୍ୟୟନ କରାଯାଏ, କିନ୍ତୁ ଏହାର ସୁପାରିଶଗୁଡ଼ିକ ପ୍ରତ୍ୟେକ ଦେଶର ବିଚାରଧୀନ।"
