ନୂଆଦିଲ୍ଲୀ,୦୯/୦୮: ଆର୍ଟିଫିସିଆଲ୍ ଇଣ୍ଟେଲିଜେନ୍ସ (ଏଆଇ) ବର୍ତ୍ତମାନ ନୂଆ ଶିଳ୍ପ ବିପ୍ଳବ ହୋଇଛି । ସାର୍ବଜନୀନ ଡିଜିଟାଲ ଭିତ୍ତିଭୂମି ସହ ଏଆଇକୁ କିଭଳି ସମନ୍ୱିତ କରାଯାଇ ପାରିବ, ସେଥିପାଇଁ ଅଂଶୀଦାରମାନେ ନିଜ ଚିନ୍ତାଧାରା ବିନିମୟ କରିବା ଆବଶ୍ୟକ । ନୂଆଦିଲ୍ଲୀରେ ମଙ୍ଗଳବାର ଅନୁଷ୍ଠିତ ‘ଆଧାର ସମ୍ବାଦ’ରେ ଯୋଗଦେଇ କେନ୍ଦ୍ର ଆଇଟି ମନ୍ତ୍ରୀ ଅଶ୍ୱିନୀ ବୈଷ୍ଣବ ଏହା କହିଛନ୍ତି ।
ମନ୍ତ୍ରୀ କହିଛନ୍ତି, ବର୍ତ୍ତମାନ ଅନେକ ପଦକ୍ଷେପର ‘ଆଧାର’ ହୋଇଛି ଆଧାର । ସାର୍ବଜନୀନ ଡିଜିଟାଲ ଭିତ୍ତିଭୂମିର ମୂଳଭିତ୍ତି ସାଜିଛି । ଜୀବନକୁ କିଭଳି ଆହୁରି ସହଜ କରିହେବ, ତାହା ଉପରେ ସରକାର ପ୍ରାଥମିକତା ଦେଉଛନ୍ତି । ଏହି ପରିପ୍ରେକ୍ଷୀରେ ସେ ନୂଆ ‘ଆଧାର ଫେସ୍ ଅଥେଣ୍ଟିକେସନ’ର ଉଦାହରଣ ଦେଇଛନ୍ତି । ଅଶ୍ୱିନୀଙ୍କ ଦ୍ୱାରା ଆଜି ଫେସ୍ ଆଇଡି ଥିବା ଆଧାର ମୋବାଇଲ ଆପ୍ ଶୁଭାରମ୍ଭ ହୋଇଛି । ଏହି ଆପ୍ ଦ୍ୱାରା ୟୁଜରମାନେ ସେମାନଙ୍କ ଆଧାର ବିବରଣୀ ଡିଜିଟାଲ ଭାବେ ସେୟାର କରିପାରିବେ । ସେମାନଙ୍କୁ ଆଧାର କାର୍ଡ କିମ୍ବା ଏହାର କପି ଦେବାକୁ ପଡ଼ିବ ନାହିଁ । ଏଥିରେ ତଥ୍ୟ ଲିକ୍ ହେବନାହିଁ ।
ଏହା ମଧ୍ୟ ପଢନ୍ତୁ- ସପାର ପୂର୍ବତନ ବିଧାୟକ ଅବଦୁଲ୍ଲା ଆଜମ ଖାନଙ୍କ ବଢିଲା ଅଡ଼ୁଆ, ଷ୍ଟାମ୍ପ ଚୋରି ମାମଲାରେ ୩ କୋଟି ୭୧ ଲକ୍ଷ ଟଙ୍କା ଜରିମାନା ଲଗାଇଲେ କୋର୍ଟ…
କେନ୍ଦ୍ର ଆଇଟି ମନ୍ତ୍ରୀ ଅଶ୍ୱିନୀ ‘ଆଧାର ସମ୍ବାଦ’ ସମ୍ମିଳନୀକୁ ଉଦ୍ଘାଟନ କରିଥିଲେ । ଏଥିରେ ପ୍ରାୟ ୭୫୦ ବରିଷ୍ଠ ନୀତି ନିର୍ଦ୍ଧାରକ, ବିଶେଷଜ୍ଞ, ଟେକ୍ନୋକ୍ରାଟ, ବିଭିନ୍ନ କ୍ଷେତ୍ରର ପ୍ରତିନିଧି ଓ ପେସାଦାର ସାମିଲ ହୋଇଥିଲେ । କେନ୍ଦ୍ର ଆଇଟି ସଚିବ ଏସ୍ କ୍ରିଷ୍ଣନ କହିଥିଲେ, ଅନ୍ତର୍ଭୁକ୍ତିକରଣକୁ ଆଧାର ଗତିଶୀଳ କରାଇବା ସହ ଅର୍ଥନୈତିକ ଅଭିବୃଦ୍ଧିରେ ସହାୟକ ହେଉଛି । ତା’ଛଡ଼ା ଆଧାର ଏଭଳି ଏକ ପରିଷ୍କୃତ ପ୍ରଣାଳୀ, ଯାହା ଗୋପନୀୟତାକୁ ସୁରକ୍ଷିତ ରଖିବା ସହ ପରିଚୟକୁ ପ୍ରମାଣିତ କରୁଛି । ସମ୍ମିଳନୀରେ ପରିସଂଖ୍ୟାନ ଓ କାର୍ଯ୍ୟାନ୍ୱୟନ ମନ୍ତ୍ରଣାଳୟର ସଚିବ ଡ. ସୌରଭ ଗର୍ଗ, ୟୁଆଇଡିଏଆଇ ଅଧ୍ୟକ୍ଷ ନୀଳକଣ୍ଠ ମିଶ୍ର, ୟୁଆଇଡିଏଆଇ ସିଇଓ ଭୁବନେଶ କୁମାର ଏବଂ ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।
