ନୂଆଦିଲ୍ଲୀ: ଇରାନ ସହିତ ଆମେରିକା-ଇସ୍ରାଏଲ ଯୁଦ୍ଧ ଆରମ୍ଭ ହେବାର ପ୍ରାୟ ପାଞ୍ଚ ସପ୍ତାହରୁ ଅଧିକ ସମୟ ହୋଇଗଲାଣି। ହେଲେ ମଧ୍ୟପ୍ରାଚ୍ୟରେ ଏହି ସଂଘର୍ଷ ଏବଂ ଉତ୍ତେଜନାରେ ଏବେ ଯାଏଁ କୌଣସି ଅନ୍ତ ଦେଖାଯାଉନାହିଁ। ଏହି ସମୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ହର୍ମୁଜ୍ ପ୍ରଣାଳୀ ଖୋଲିବା ପାଇଁ ଇରାନକୁ ବଡ଼ ସାମରିକ କାର୍ଯ୍ୟାନୁଷ୍ଠାନ ପାଇଁ ଧମକ ଦେଇସାରିଛନ୍ତି। ହେଲେ ଏଭଳି ସମୟରେ କିନ୍ତୁ, ଆମେରିକାର ଅନେକ ସହଯୋଗୀ ଇରାନ ସହିତ ଯୁଦ୍ଧ କରିବାକୁ ମନା କରିଦେଇଛନ୍ତି। ଏହି ଦେଶ ଗୁଡ଼ିକ ମଧ୍ୟରେ ବ୍ରିଟେନ, ଜର୍ମାନୀ, ସ୍ପେନ୍, ଅଷ୍ଟ୍ରେଲିଆ ଏବଂ ବର୍ତ୍ତମାନ ଇଟାଲି ଯୋଡି ହୋଇଯାଇଛି।
ତେବେ ଇରାନ ସହିତ ଚାଲିଥିବା ଯୁଦ୍ଧରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବେ ଏକାକୀ ହୋଇଯାଉଥିବା ଦେଖିବାକୁ ମିଳୁଛି। ଅନ୍ୟପକ୍ଷରେ ରାଷ୍ଟ୍ରପତି ନିଜେ ଇରାନ ଉପରେ ଆକ୍ରମଣ କରିବାର ଆବଶ୍ୟକତା ବିଷୟରେ ବହୁତ ଦ୍ୱନ୍ଦ୍ୱରେ ଥିବା ପରି ମନେହେଉଛନ୍ତି। କେତେବେଳେ କହୁଛନ୍ତି ଯେ, ତାଙ୍କର ଲକ୍ଷ୍ୟ ଇରାନର ତେଲ ଏବଂ କେତେବେଳେ କହୁଛନ୍ତି ଏହାର ୟୁରାନିୟମ ଉପରେ ଆକ୍ରମଣ କରିବା। ଏହି ଯୁଦ୍ଧର ଆଭ୍ୟନ୍ତରୀଣ ବିରୋଧ ଖୋଦ୍ ଆମେରିକା ଭିତରେ ହିଁ ଆରମ୍ଭ ହୋଇଗଲାଣି। ଇରାନ ଉପରେ ଏତେ ବଡ଼ ଆକ୍ରମଣ କରିବା ପୂର୍ବରୁ ଟ୍ରମ୍ପ ନିଜ ଦେଶକୁ ବିଶ୍ୱାସକୁ ନେଇ ନଥିଲେ ଏବଂ ନ ଭାବି ଏହାକୁ ଆରମ୍ଭ କରିଥିଲେ, ଯାହାକୁ ଏକ ଗମ୍ଭୀର ଭୁଲ ବୋଲି କୁହାଯାଉଛି।
ଟ୍ରମ୍ପଙ୍କ ଆକଳନ ହର୍ମୁଜକୁ ଖୋଲିବା ପାଇଁ ଲମ୍ବା ସମୟ ଚାଲିବ ଯୁଦ୍ଧ...
ୱାଲ୍ ଷ୍ଟ୍ରିଟ୍ ଜର୍ନାଲ, ଜଣେ ଆମେରିକୀୟ ପ୍ରଶାସନିକ ଅଧିକାରୀଙ୍କୁ ଉଦ୍ଧୃତ କରି ରିପୋର୍ଟ କରିଛି ଯେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତାଙ୍କ ସହଯୋଗୀ ମାନଙ୍କୁ କହିଛନ୍ତି ଯେ ସେ ଇରାନ ବିରୁଦ୍ଧରେ ସାମରିକ ଅଭିଯାନ ସମାପ୍ତ କରିବାକୁ ପ୍ରସ୍ତୁତ, ଯଦିଓ ହରମୁଜ୍ ପ୍ରଣାଳୀ ଖୋଲି ଦିଆଯାଏ। ଟ୍ରମ୍ପଙ୍କ ଏହି ବିବୃତ୍ତି ଇରାନକୁ ଧମକ ଦେବାର ଗୋଟିଏ ଦିନ ପରେ ଆସିଛି ଯେ, ଯଦି ତେହେରାନ୍ ଜାହାଜ ଗୁଡ଼ିକୁ ହରମୁଜ୍ ପ୍ରଣାଳୀ ଦେଇ ଯିବାକୁ ଅନୁମତି ନଦିଏ ତେବେ ଆମେରିକା ତେହେରାନର ଶକ୍ତି କେନ୍ଦ୍ର ଏବଂ ତୈଳ କୂପ ଗୁଡ଼ିକୁ ନଷ୍ଟ କରିଦେବ।
ରିପୋର୍ଟ ଅନୁସାରେ, ଟ୍ରମ୍ପ କହିଛନ୍ତି ଯେ ସେ ଏହି ଗୁରୁତ୍ୱପୂର୍ଣ୍ଣ ମାର୍ଗକୁ ପୁନଃ ଖୋଲିବା ପାଇଁ ଜଟିଳ ଅଭିଯାନକୁ ସ୍ଥଗିତ ରଖିବେ, ଯାହା ବିଶ୍ୱର ପ୍ରାୟ ଏକ ପଞ୍ଚମାଂଶ ତୈଳ ଯୋଗାଣ ବହନ କରେ। ସେ ଆକଳନ କରିଛନ୍ତି ଯେ ଜବରଦସ୍ତି ପ୍ରଣାଳୀକୁ ପୁନଃ ଖୋଲିବା ମିଶନ୍ ତାଙ୍କର ଯୋଜନାବଦ୍ଧ ଚାରିରୁ ଛଅ ସପ୍ତାହ ସମୟସୀମା ବ୍ୟତୀତ ଯୁଦ୍ଧକୁ ଲମ୍ବାଇବ।
