ନୂଆଦିଲ୍ଲୀ:- ପୂର୍ବ କ୍ରିକେଟର ନବଜୋତ ସିଂହ ସିଦ୍ଧୁ ସୋମବାର ଦିନ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏକ ଡାଏଟ ପ୍ଲାନକୁ ଶେୟାର କରିଛନ୍ତି । ଯାହା ବିଷୟରେ ସେ କହିଛନ୍ତି କି ତାଙ୍କ କର୍କଟ ପିଡିତ ପତ୍ନୀ ନବଜୋତ କୈରଙ୍କୁ ଏହି ଡାଏଟ ପ୍ଲାନ କର୍କଟ ସହ ଲଢେଇରେ ଅନେକ ସାହାଯ୍ୟ କରିଥିଲା । ମୋ ପାଇଁ ଡାକ୍ତର କୈଣସି ଭଗବାନଙ୍କ ଠାରୁ କମ ନୁହନ୍ତି ବୋଲି ସେ ଏହି ପୋଷ୍ଟରେ କହିଛନ୍ତି । “ଆଜି ମୁଁ ସମସ୍ତଙ୍କ ମଙ୍ଗଳ ପାଇଁ ଏହି ଡାଏଟ ପ୍ଲାନକୁ ସେୟାର କରୁଛି । ଏହି ଡାଏଟ ପ୍ଲାନକୁ ବନେଇବାରେ ମୋର କୈଣସି ହାତ ନାହିଁ, ଦୁନିଆର ଭିନ୍ନଭିନ୍ନ ଡାକ୍ତର ମାନଙ୍କ ଅଭିଜ୍ଞତା ଓ ସହାୟତାରେ ଏହି ଡାଏଟ ପ୍ଲାନ ପ୍ରସ୍ତୁତ କରାଯାଇଥିଲା ବୋଲି” ସେ ଏହି ପୋଷ୍ଟରେ କହିଛନ୍ତି ।
“ଆମେ ପାଇଥିବା ଖୁସି ଓ ଲାଭକୁ ଆମେ ସମସ୍ତଙ୍କ ସହ ବାଣ୍ଟିବାକୁ ଚାହୁଁ । ମୋ ପତ୍ନୀଙ୍କ କର୍କଟ ରୋଗରେ ଅସ୍ତ୍ରୋପଚାର, କେମୋଥେରାପି, ହରମୋନାଲ ଏବଂ ଟାର୍ଗେଟେଡ ଥେରାପି ସହ କର୍କଟ ରୋଗ ସହ ଲଢିବା ପାଇଁ ଦୃଢ ଇଚ୍ଛାଶକ୍ତି ବଳରେ ଏହି ରୋଗ ପ୍ରତିହତ ହୋଇଥିଲା । ପ୍ରାଚୀନ ଭାରତୀୟ ଆୟୁର୍ବେଦ ଓ ୟୋସିନୋରି ଓସୁମିଙ୍କ ନୋବେଲ ପୁରସ୍କାର ପ୍ରାପ୍ତ ରିସର୍ଚ୍ଚରେ ଥିବା ଉଲ୍ଲେଖ ସହ ଡାକ୍ତର ମାନଙ୍କ ସହାୟତାରେ ଏହି ଡାଏଟ ପ୍ଲାନ ପ୍ରସ୍ତୁତ କରାଯାଇଥିଲା ଯାହା ଏହି ରୋଗକୁ ହରାଇବାରେ ବହୁ ସହାୟକ ହୋଇଥିଲା” ବୋଲି ନବଜୋତ ସିଂହ ସିଦ୍ଧୁ କହିଛନ୍ତି ।
ଡାଏଟ ପ୍ଲାନ ସେୟାର କରିବା ସହ ସେ ଲେଖିଛନ୍ତି, “ଆପଣ ପିଉଥିବା ପାଣିର ଆଦର୍ଶ ପିଏଚ ସ୍ତର ୭ ରହିବା ଦରକାର ଯାହାଦ୍ବାରା ଆପଣ ଜଲଦି ଠିକ ହେବାରେ ସାହାଯ୍ୟ କରିଥାଏ । ଚାହା ବିକଳ୍ପରେ ଗୁଜୁରାତି, ତୁଳସୀ, ପୋଦିନା, ଅଦା ଓ ଡାଳଚିନିର କାଢ଼ା ସେବନ କରନ୍ତୁ । ରାତ୍ରୀ ଭୋଜନ ଓ ସକାଳ ଜଳଖିଆ ମଧ୍ୟରେ ୧୨ରୁ ୧୭ ଘଣ୍ଟାର ବ୍ୟବଧାନ ରହିବା ଦରକାର। ରାତ୍ରୀ ଭୋଜନ ସୂର୍ଯ୍ୟାସ୍ତ ପୂର୍ବରୁ ଓ ସକାଳ ଜଳଖିଆ ସକାଳ ୧୦ଟା ମଧ୍ୟରେ କରିବା ଦରକାର । ସକାଳୁ ଗରମ ପାଣିରେ ଫାଳେ ଲେମ୍ବୁ ଓ ଚାମଚେ ଆପଲ ସାଇଡର ଭିନେଗାର ଦେଇ ପିଇବା ସହ ରସୁଣ ଦୁଇ କୋଲା ପ୍ରତି ଦୁଇଦିନ ଅନ୍ତରରେ ଥରେ ଖାଇବା କଥା । ଏହା ପରଦିନ ଖଣ୍ଡେ କଞ୍ଚା ହଳଦୀ କିମ୍ବା ହଳଦୀ ଗୁଣ୍ଡ ସହ ୯ରୁ ୧୦ଟି ନିମ୍ବପତ୍ର ସେବନ କରନ୍ତୁ। ତୁତ୍ କୋଳି, ବ୍ଲାକ ବେରି, ଷ୍ଟ୍ରବେରି ଅଥବା ଡାଳିମ୍ବ ଭଳି ଫଳ ସହ ଗାଜର, ବିଟ, ଅଁଳା, ତୈଳବୀଜ ଆଦିର ସେବନ କରିବା ସ୍ବାସ୍ଥ୍ୟ ପକ୍ଷେ ଅତ୍ୟନ୍ତ ହିତକର । ”
ଦ୍ବିପ୍ରହର ସମୟରେ ଭୋକ ଲାଗିଲେ ଲାଉରସ କିମ୍ବା କମଳା ରସ, ହଳଦୀ ଓ ଅଦାର ଜୁସ କିମ୍ବା ସପୁରୀ, କକୁଡି ଓ ଅଦାର ଜୁସ ପିଇ ପାରିବେ । ଦିନରେ ଥରେ ହନୁମାନ ଫଳ ଅଥବା ଗଙ୍ଗଶିଉଳି ପତ୍ରର କାଢ଼ା ସେବନ କରିବାର ଆବଶ୍ୟକତା ରହିଛି । ଶରୀରର ଓଜନର ଏକ ପ୍ରତିଶତ ଭଳି ଓଜନର ସାଲାଡ ଖାଆନ୍ତୁ । କୌଣସି ବି ସୋଡା ଅଥବା କାର୍ବୋନେଟେଡ ମୃଦୁ ପାନୀୟକୁ ସେବନ କରନ୍ତୁ ନାହିଁ । ସାଧାରଣ ଲୁଣ ବଦଳରେ ସୈନ୍ଧବ ଲବଣର ବ୍ୟବହାର କରନ୍ତୁ । ଦୈନିକ ବ୍ୟାୟାମ କରନ୍ତୁ ଓ ପନିପରିବା ଗୁଡିକୁ ସିଧାସଳଖ ନରାନ୍ଧି ବେକିଂ ପାଣିରେ ଧୋଇ ରାନ୍ଧନ୍ତୁ । ବିନା ଚିନିଯୁକ୍ତ ଖଜୁରୀ କେବେକେବେ ନିଜ ଡାଏଟରେ ନେଇପାରିବେ । ରୁଟି ବନେଇବା ପାଇଁ କ୍ବିନୋଆ, ଆଲମଣ୍ଡ କିମ୍ବା ପାଣିଫଳର ଅଟାକୁ ବ୍ୟବହାର କରିବା ସହ ରନ୍ଦା ଖାଦ୍ୟକୁ ସୀମିତ ଭାବେ ସେବନ କରିବା ପାଇଁ ସେ ଏହି ପୋଷ୍ଟରେ କହିଛନ୍ତି ।
