ଭୁବନେଶ୍ୱର,୨୭/୦୩: ରାଜ୍ୟରେ ଆସିବ ନୂଆ ବଦଳି ନୀତି । ରାଜନୈତିକ ଛତ୍ରଛାୟା ତଳେ ବହୁ ବର୍ଷ ହେବ ନିର୍ଦ୍ଦିଷ୍ଟ ସ୍ଥାନରେ ରହିଥିବା ଅଧିକାରୀଙ୍କ ବଦଳି କରାଯିବ । ସରକାରୀ କର୍ମଚାରୀମାନଙ୍କର ଏକ ନୂଆ ବଦଳି ନୀତି ଆସିବ । ଯାହା ଦ୍ୱାରା ରାଜ୍ୟରେ ଥିବା ପ୍ରଶାସନିକ ଆବଶ୍ୟକତା ଓ କର୍ମଚାରୀଙ୍କ ମଙ୍ଗଳ ହୋଇପାରିବ । ସେହିପରି ୨୦୩୬ ସୁଦ୍ଧା ଓଡ଼ିଶା ହେବ ଦେଶର ଏକ ନମ୍ବର ରାଜ୍ୟ । ସେଥିପାଇଁ ଆମ ସରକାର ଶାସନକୁ ଆସିବାର ପ୍ରଥମ ଦିନରୁ "ଦୁର୍ନୀତି ପ୍ରତି ଜିରୋ ଟଲରେନ୍ସ୍' ନୀତି ଅବଲମ୍ୱନ କରି ଆସୁଛି । କେବଳ କଥାରେ ନୁହେଁ, କାର୍ଯ୍ୟରେ ବି ଦୁର୍ନୀତି ବିରୋଧରେ ଯୁଦ୍ଧ ଜାରି ରଖିଛି ବୋଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି ।
ବୁଧବାର ବିଧାନସଭାରେ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗର ଖର୍ଚ୍ଚ ଦାବି ଆଲୋଚନା ବେଳେ ମୁଖ୍ୟମନ୍ତ୍ରୀ କହିଛନ୍ତି, ୨୦୨୪ ଜୁନ୍ରୁ ଏ ପର୍ଯ୍ୟନ୍ତ ମୋଟ ୩୧୨ ଜଣଙ୍କ ବିରୋଧରେ ୧୭୩ଟି ମାମଲା ରୁଜୁ କରାଯାଇଛି । ୧୫୬ ଜଣ ବ୍ୟକ୍ତିଙ୍କୁ ବିଭିନ୍ନ ମକଦ୍ଦମାରେ ଗିରଫ କରାଯାଇଛି । ଏହି ସମୟରେ ୨୯୭ଟି ମାମଲାରେ ତଦନ୍ତ ଶେଷ କରି ଅଭିଯୋଗ ଫର୍ଦ୍ଦ ଦାଖଲ କରାଯାଇଛି । ୮୨ଟି ମକଦ୍ଦମାରେ ସମୁଦାୟ ୧୨୩ ଜଣ ଦୋଷୀ ସାବ୍ୟସ୍ତ ହୋଇଛନ୍ତି । ଭିଜିଲାନ୍ସ ଅଦାଲତର ଦଣ୍ଡାଦେଶ ଯୋଗୁଁ ୧୧ ଜଣଙ୍କୁ ଚାକିରିରୁ ବହିଷ୍କାର କରାଯାଇଛି । ଏହା ବ୍ୟତୀତ, ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ୯୭ ଜଣଙ୍କ ବିରୋଧରେ ୫୩ଟି ମକଦ୍ଦମା ରୁଜୁ ହୋଇଛି । ଯେଉଁଥିରେ ପ୍ରାୟ ୧୩୧ କୋଟି ୯୦ ଲକ୍ଷ ଟଙ୍କାର ଆୟ ବହିର୍ଭୂତ ସମ୍ପତ୍ତି ଠାବ କରାଯାଇଛି ।
ରାଜ୍ୟ ଦୁର୍ନୀତି ନିବାରଣ ନିର୍ଦ୍ଦେଶାଳୟକୁ ସଶକ୍ତ କରିବା ପାଇଁ ଚଳିତ ଆର୍ଥିକ ବର୍ଷରେ ମୋଟ ୧୩୩ କୋଟି ୩୭ ଲକ୍ଷ ଟଙ୍କା ବ୍ୟୟ ବରାଦ ହୋଇଛି । ଏହାଛଡ଼ା, ଦୁର୍ନୀତି ନିବାରଣ ନିର୍ଦ୍ଦେଶାଳୟର ଅଣ-ଆବାସିକ ତଥା ଆବାସିକ ଭିତ୍ତିଭୂମିର ବିକାଶ ପାଇଁ ୩୬ କୋଟି ୭୦ ଲକ୍ଷ ଟଙ୍କା ବ୍ୟୟବରାଦ କରାଯାଇଛି । ଆମ ସରକାରଙ୍କ ଲକ୍ଷ୍ୟ ହେଉଛି, ଦୁର୍ନୀତିଗ୍ରସ୍ତ ଅଫିସର ଏବଂ ଦୁର୍ନୀତିଗ୍ରସ୍ତଙ୍କ ମନରେ ଭୟ ସଞ୍ଚାର କରିବା । ଗତ ସରକାର ଅମଳରେ ଦୁର୍ନୀତି ଉପାୟରେ ଯେଉଁମାନେ ଟଙ୍କା, ସୁନା, ଗହଣା, ପ୍ଳଟ, ଫ୍ଲାଟ ଉପାର୍ଜନ କରିଛନ୍ତି, ଆଜି ସେମାନେ ପ୍ରତି ମୁହୂର୍ତ୍ତରେ ଭୟାତୁର ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ସେହିପରି ପୂର୍ବ ସରକାର ବେଳେ ୧୬ ବର୍ଷ ହେବ ଅଭିଯୋଗ ପ୍ରକୋଷ୍ଠ ଆସୁନଥିଲେ ତତ୍କାଳୀନ ମୁଖ୍ୟମନ୍ତ୍ରୀ । ମାତ୍ର ଏବେ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠ ଚଳ ଚଞ୍ଚଳ ହୋଇଉଠିଛି । ଏହି ନିଷ୍ପତ୍ତି ଯୋଗୁ ୨୦୨୪ ଜୁଲାଇରୁ ଏ ପର୍ଯ୍ୟନ୍ତ ୯୩୭୭ଟି ଅଭିଯୋଗର ଶୁଣାଣି କରାଯାଇଛି । ମିଳିଥିବା ଅଭିଯୋଗରୁ ପ୍ରାୟ ୮୩ ପ୍ରତିଶତ ଅଭିଯୋଗର ତ୍ୱରିତ ସମାଧାନ ହୋଇଛି । ଏହା ବ୍ୟତୀତ ଅଭିଯୋଗ ପଞ୍ଜୀକରଣ ପ୍ରକ୍ରିୟାକୁ ସହଜ ଓ ସମୟ ଉପଯୋଗୀ କରିବା ପାଇଁ, ଅଗ୍ରୀମ ଅନ୍ଲାଇନ୍ ବୁକିଂ ବ୍ୟବସ୍ଥା ଆରମ୍ଭ କରାଯାଇଛି ବୋଲି ମୁଖ୍ୟମନ୍ତ୍ରୀ କହିଛନ୍ତି ।
