ଭୁବନେଶ୍ୱର,୨୨/୧୨: ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ(ଓୟୁଏଟି) କୁ ଘାରିଛି ଅଧ୍ୟାପକ ଚିନ୍ତା । ଆସନ୍ତା ଶିକ୍ଷାବର୍ଷ(୨୦୨୫-୨୬)ରେ ଓୟୁଏଟି ଅନ୍ତର୍ଗତ କୃଷି, ପ୍ରାଣୀ ଚିକିତ୍ସା ବିଜ୍ଞାନ (ଭେଟେରିନାରୀ) ଓ କୃଷି ଯାନ୍ତ୍ରିକ (ଏଗ୍ରି ଇଞ୍ଜିନିୟରିଂ)ରେ କାର୍ଯ୍ୟରତ ୩୯ ଜଣ ବରିଷ୍ଠ ପ୍ରଫେସର ଅବସର ନେବେ । ଏହାପରେ ଏହି ବିଶ୍ୱବିଦ୍ୟାଳୟର ଭାଗ୍ୟ କେବଳ ଆସୋସିଏଟ୍ ଓ ଆସିଷ୍ଟାଣ୍ଟ ପ୍ରଫେସରଙ୍ ଉପରେ ନିର୍ଭର କରିବ । ଗତ ୬ ବର୍ଷ ହେବ ବିଶ୍ୱବିଦ୍ୟାଳୟରେ କ୍ୟାରିଅର ଆଡ୍ଭାନ୍ସମେଣ୍ଟ ସ୍କିମ୍(ସିଏଏସ୍)ରେ ସହଯୋଗୀ ଓ ସହକାରୀ ପ୍ରଫେସରଙ୍କୁ ପଦୋନ୍ନତି ମିଳୁନି । ଫଳରେ ସେମାନେ ଯେଉଁଠି ଥିଲେ ସେହିଠାରେ ଅଛନ୍ତି । ତେଣୁ ଛାତ୍ରଛାତ୍ରୀମାନଙ୍କୁ ଗବେଷଣା, ଶିକ୍ଷା ଓ ସଂପ୍ରସାରଣ ଉପରେ ଗୁଣାତ୍ମକ ଶିକ୍ଷା କେମିତି ଦିଆଯିବ ତାକୁ ନେଇ ଚିନ୍ତାରେ ଅଛନ୍ତି କର୍ତ୍ତୃପକ୍ଷ ।
୧୫ରୁ ୨୦ ବର୍ଷ ଧରି ଶିକ୍ଷା ଓ ଗବେଷଣା କ୍ଷେତ୍ରରେ ଅଭିଜ୍ଞତାସମ୍ପନ୍ନ ପ୍ରଫେସର ରହିଲେ ବିଶ୍ୱବିଦ୍ୟାଳୟ ନ୍ୟାସନାଲ୍ ଇନ୍ଷ୍ଟିଚ୍ୟୁଟ୍ ଅଫ ର୍ୟାଙ୍କିଂ ଫ୍ରେମ୍ୱାର୍କ(ଏନଆଇଆରଏଫ୍) ରେ ଉତ୍ତମ ସ୍ଥାନ ପାଇବାକୁ ଯୋଗ୍ୟ ବିବେଚିତ ହେବ । କାରଣ ଗତବର୍ଷ ଏହି ବିଶ୍ୱବିଦ୍ୟାଳୟ ଏନଆଇଆରଏଫ୍ରେ ୧୫ତମ ସ୍ଥାନରେ ଥିଲା । ହେଲେ ପ୍ରଫେସର ଖାଲି ହୋଇଗଲେ ଆଗାମୀ ଦିନରେ ଓୟୁଏଟି ଏନଆଇଆରଏଫ୍ରେ ଏହି ସ୍ଥାନ ପାଇବନି । କେବଳ ସେତିକି ନୁହେଁ, ବାରମ୍ବାର ଦାବି ସତ୍ତେ୍ୱ ପ୍ରଫେସରମାନଙ୍କ ଅବସର ବୟସ ସୀମା ବଢୁନି । ବର୍ତ୍ତମାନ ଅବସର ବୟସ ସୀମା ୬୦ ରହିଛି । ପୂର୍ବରୁ ଓୟୁଏଟି ଶିକ୍ଷକ ନିଯୁକ୍ତ କରୁଥିଲା । ହେଲେ ୨୦୨୦ରୁ ଓପିଏସ୍ସିକୁ ସରକାର ଏହି ଦାୟିତ୍ୱ ଦେଲେ । ଯାହାକୁ ନେଇ ୟୁଜିସି(ୟୁନିଭର୍ସିଟି ଗ୍ରାଣ୍ଟ କମିଶନ୍) ଏହା ବିରୋଧରେ ସୁପ୍ରିମକୋର୍ଟର ଦ୍ୱାରସ୍ଥ ହେଲା । ଫଳରେ ୪ବର୍ଷ ହେବ ଅଧ୍ୟାପକ ନିଯୁକ୍ତି ବନ୍ଦ ପଡ଼ିଛି ।
ବର୍ତ୍ତମାନ ଓୟୁଏଟି ଅଧୀନରେ ଭୁବନେଶ୍ୱରରେ ତିନିଟି ଶିକ୍ଷାନୁଷ୍ଠାନ ରହିଛି । ସେଥିମଧ୍ୟରେ କୃଷି (ଏଗ୍ରିକଲଚର), ପ୍ରାଣୀ ଚିକିତ୍ସା ବିଜ୍ଞାନ (ଭେଟେରିନାରୀ) ଓ କୃଷି ଯାନ୍ତ୍ରିକ (ଏଗ୍ରି ଇଞ୍ଜିନିୟରିଂ) ଏବଂ ବନ ମହାବିଦ୍ୟାଳୟ ଅଛି । ଏଠାରେ ମୋଟ ପ୍ରଫେସର ପଦବି ହେଉଛି ୪୫ । ସେଥିମଧ୍ୟରୁ ବନ ମହାବିଦ୍ୟାଳୟରେ ପ୍ରଫେସର ସଂଖ୍ୟା ହେଉଛି ୫ । ଏଠାରେ କୌଣସି ପ୍ରଫେସର ନଥିବା ବେଳେ ୨୦୨୪ ଶେଷ ସୁଦ୍ଧା ଅନ୍ୟ ତିନି ଶିକ୍ଷାନୁଷ୍ଠାନ (କୃଷି, ପ୍ରାଣୀ ବିଜ୍ଞାନ ଓ କୃଷି ଯାନ୍ତ୍ରିକ)ରେ ମାତ୍ର ୮ଜଣ ପ୍ରଫେସର ଅଛନ୍ତି । ୨୦୨୫ ଶେଷ ସୁଦ୍ଧା ୨ ଜଣ ପ୍ରଫେସର ଓ ୨୦୨୬ ଶେଷ ସୁଦ୍ଧା ଜଣେ ପ୍ରଫେସର ଥିବେ । ୩୯ ଜଣ ପ୍ରଫେସର ଅବସର ନେଇଯିବେ ।
ଅନ୍ୟ ଶିକ୍ଷାନୁଷ୍ଠାନ ମଧ୍ୟରେ ଓୟୁଏଟି ଅନ୍ତର୍ଗତ କମ୍ୟୁନିଟି ବିଜ୍ଞାନ ମହାବିଦ୍ୟାଳୟ, ମୌଳିକ ବିଜ୍ଞାନ(ବେସିକ୍ ସାଇନ୍ସ) ମହାବିଦ୍ୟାଳୟ, ଚିପିଲିମା ଓ ଭବାନୀପାଟଣା କୃଷି ମହାବିଦ୍ୟାଳୟ, ଚିପିଲିମା ଉଦ୍ୟାନକୃଷି ମହାବିଦ୍ୟାଳୟ, ରଙ୍ଗେଇଲୁଣ୍ଡା ମତ୍ସ୍ୟ ବିଜ୍ଞାନ ମହାବିଦ୍ୟାଳୟ, କୃଷି ବ୍ୟବସାୟ ପରିଚାଳନା ବିଭାଗ, ଆଞ୍ଚଳିକ ଗବେଷଣା ଓ ବୈଷୟିକ ଜ୍ଞାନ ସଂପ୍ରସାରଣ କେନ୍ଦ୍ର ଓ ସର୍ବଭାରତୀୟ ସମନ୍ୱୟ କୃଷି ଗବେଷଣା ପ୍ରକଳ୍ପ ମଧ୍ୟ ଅଛି । ଏସବୁ ସ୍ଥାନରେ ପ୍ରଫେସର ପଦବି ସଂଖ୍ୟା ମଧ୍ୟ ୪୦ । ହେଲେ ୩୮ ପଦବି ଖାଲି ପଡ଼ିଛି ବୋଲି ବିଧାନସଭା ତଥ୍ୟ କହୁଛି ।
ଅପରପକ୍ଷେ, ଓୟୁଏଟିର ସମସ୍ତ ଶିକ୍ଷାନୁଷ୍ଠାନରେ ୨୧୮ ସହଯୋଗୀ ପ୍ରଫେସର(ଆସୋସିଏଟ୍) ଙ୍କ ମଧ୍ୟରୁ ୧୩୩ ଏବଂ ୪୩୧ ସହକାରୀ ପ୍ରଫେସର(ଆସିଷ୍ଟାଣ୍ଟ)ଙ୍କ ମଧ୍ୟରୁ ୧୮୨ ପଦବି ଖାଲି ଅଛି । ଓୟୁଏଟିରୁ ଛାତ୍ରଛାତ୍ରୀଙ୍କୁ ଶସ୍ୟ, ମତ୍ସ୍ୟ, ପ୍ରାଣୀ, ଉଦ୍ଭିଦ, କୃଷି ଯନ୍ତ୍ରପାତି, ଉଦ୍ୟାନ କୃଷି, ବନୀକରଣ ଉପରେ ଶିକ୍ଷାଦାନ ମିଳୁଛି । ଛାତ୍ରଛାତ୍ରୀମାନେ ଏଠାରେ ୟୁଜି ସହ ପିଜି କରୁଛନ୍ତି । ପିଏଚ୍ଡି ମଧ୍ୟ ଚାଲିଛି । ତେଣୁ ପ୍ରଫେସରମାନଙ୍କ ଭୂମିକା ବହୁ ଗୁରୁତ୍ୱପୂର୍ଣ୍ଣ । ତେବେ ୨୦୧୮ ରେ ବିଶ୍ୱବିଦ୍ୟାଳୟ ପକ୍ଷରୁ ସ୍କୋରକାର୍ଡ ହେବା ସହ ସିଏଏସ୍ ମାଧ୍ୟମରେ ଆସିଷ୍ଟାଣ୍ଟ ପ୍ରଫେସରଙ୍କୁ ପଦୋନ୍ନତି ମିଳୁଥିଲା । ସେମାନେ ପରବର୍ତ୍ତୀ ସମୟରେ ପ୍ରଫେସର ହେଉଥିଲେ । ଏହି ବ୍ୟବସ୍ଥା ସେହି ସମୟରେ ବନ୍ଦ ହୋଇଗଲା । ଏବେ ଯେଉଁମାନେ ଆସିଷ୍ଟାଣ୍ଟ ପ୍ରଫେସର ଅଛନ୍ତି ସେମାନଙ୍କର ପ୍ରଫେସର ହେବାର ଯୋଗ୍ୟତା ନାହିଁ ।
