ନୂଆଦିଲ୍ଳୀ,୧୭/୧୦: ଓଡିଶାରୁ ରାଜଧାନୀ ଦିଲ୍ଲୀକୁ କାମ କରିବା ପାଇଁ ବର୍ଷକ ତଳେ ଆସିଥିବା ଜଣେ ମହିଳାଙ୍କୁ ଦୁଷ୍କର୍ମ କରାଯାଇଥିବା ଅଭିଯୋଗ ହେବା ପରେ ଜାତୀୟ ମାନବାଧିକାର କମିଶନ ବୁଧବାର ଦିଲ୍ଲୀ ସରକାରଙ୍କ ପ୍ରମୁଖ ଶାସନ ସଚିବ ଓ ଦିଲ୍ଲୀ ପୁଲିସ କମିଶନରଙ୍କୁ ନୋଟିସ୍ ଜାରି କରି ଦୁଇ ସପ୍ତାହ ମଧ୍ୟରେ ତଦନ୍ତ କରି ରିପୋର୍ଟ ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି । ଗତ ସପ୍ତାହରେ ଏହି ୩୪ ବର୍ଷୀୟା ମହିଳାଙ୍କ ସହ ବଳାତ୍କାର ଘଟିଥିବା ଅଭିଯୋଗ ହୋଇଥିଲା । ତେବେ ମହିଳାଙ୍କ ପରିବାର ଲୋକ ଏହାକୁ ପ୍ରଥମେ ଖଣ୍ଡନ କରିଥିଲେ କିନ୍ତୁ ପରେ ଏହି ଅଭିଯୋଗ ଉପରେ ତଦନ୍ତ ଶେଷ ନ ହେବା ପର୍ଯ୍ୟନ୍ତ କିଛି କହିବା ପାଇଁ ମନା କରିଦେଇଥିଲେ । ମହିଳା ଏବେ ଦିଲ୍ଲୀ ଏମ୍ସର ଟ୍ରମା ସେଣ୍ଟରରେ ଚିକିତ୍ସାଧୀନ ଅଛନ୍ତି । ଦିଲ୍ଲୀ ପୁଲିସ ତାଙ୍କ ଉପରେ ନଜର ରଖିଛନ୍ତି । ଏହି ମହିଳାଙ୍କୁ ଅର୍ଦ୍ଧ ଚେତା ଅବସ୍ଥାରେ ଏମ୍ସର ଟ୍ରମା ସେଣ୍ଟରକୁ ଅଣାଯାଇଥିଲା । ସେ ଦିଲ୍ଲୀ ପୁଲିସକୁ ଏପର୍ଯ୍ୟନ୍ତ ତାଙ୍କର ସମ୍ପୂର୍ଣ୍ଣ ବକ୍ତବ୍ୟ ଦେବା ଅବସ୍ଥାରେ ନାହାନ୍ତି । ମହିଳାଙ୍କ ସାମାନ୍ୟ ଚେତା ଆସିବା ପରେ ଦିଲ୍ଲୀ ପୁଲିସ ପକ୍ଷରୁ ତାଙ୍କୁ କିଛି ପ୍ରଶ୍ନ ପଚରାଯାଇଥିଲା ।
ସୂତ୍ରରୁ ଜଣାପଡିଛି ଯେ, ସେ ସମ୍ପୂର୍ଣ୍ଣ ଭଲ ହେବା ପରେ ଦିଲ୍ଲୀ ପୁଲିସ ତାଙ୍କ ଠାରୁ ଏହି ଅଭିଯୋଗ ପ୍ରସଙ୍ଗରେ ସମସ୍ତ ତଥ୍ୟ ଆଦାୟ କରିବ । ଓଡିଶା ସରକାରଙ୍କ ପକ୍ଷରୁ ଓଡିଶା ଭବନର ପ୍ରମୁଖ ଆବାସିକ କମିଶନର ବିଶାଲ ଗଗନ ମହିଳାଙ୍କୁ ସମସ୍ତ ସହାୟତା ଯୋଗାଇ ଦେଇଛନ୍ତି । ସେ ମଧ୍ୟ ଲଗାତାର ଏହି ମହିଳାଙ୍କ ପରିବାର ସଦସ୍ୟଙ୍କ ସହ ଯୋଗଯୋଗରେ ଅଛନ୍ତି । ତେବେ ଆନୁଷ୍ଠାନିକ ଭାବେ ଏହି ଘଟଣା ପ୍ରସଙ୍ଗରେ ଓଡିଶା ଭବନ ପ୍ରମୁଖ ଆବାସିକ କମିଶନରଙ୍କ କାର୍ଯ୍ୟାଳୟ ପକ୍ଷରୁ କିଛି କୁହାଯାଇନାହିଁ ।
ଜଣାପଡିଛି ଯେ, ମହିଳାଙ୍କ ଘର ପୁରୀରେ । ସେ ଅବିବାହିତା । ବର୍ଷକ ତଳେ ଘରେ ଝଗଡା ହେବା ପରେ କାମ ପାଇଁ ସେ ଦିଲ୍ୱୀ ଆସିଥିଲେ । ଏଠାରେ ସେ କଟୁୱାରିଆ ସରାଇଠାରେ ଜଣଙ୍କ ଘରେ ରହୁଥିଲେ । ସେଠାରେ ମଧ୍ୟ ଝଗଡା ହେବା ପରେ ସେ ସେଠାରୁ ବାହାରି ଆସି ଏକ ରାସ୍ତାପାଶ୍ୱର୍ରେ ରହିବାକୁ ଆରମ୍ଭ କରିଥିଲେ । ସେହି ସମୟରେ ସେ ଜଣେ ବାବା-ମାତାଙ୍କ ସଂସ୍ପର୍ଶରେ ଆସିଥିଲେ । ସେମାନେ ତାଙ୍କ ଠାରୁ ସମସ୍ତ ବିଷୟ ଜାଣିବା ପରେ ତାଙ୍କ ପରିବାରଙ୍କ ସହ ଯୋଗାଯୋଗ କରିଥିଲେ । ଫଳରେ ଏହି ମହିଳାଙ୍କ ଭାଇ ଓ ମାଉସୀ ତାଙ୍କୁ ନେବା ପାଇଁ ଦିଲ୍ଲୀ ଆସିଥିଲେ । ମହିଳା ଜଣେ ମାନସିକ ରୋଗୀ ବୋଲି କୁହାଯାଉଛି । ସେ ଘରକୁ ଫେରିବାକୁ ରାଜି ହୋଇନଥିଲେ । ଫଳରେ ତାଙ୍କ ପରିବାର ଫେରି ଯାଇଥିଲେ । ପରେ ତାଙ୍କ ସହ ଦୁଷ୍କର୍ମ ହୋଇଛି ବୋଲି ଅଭିଯୋଗ ହୋଇଥିଲା ।
ଏବେ ତାଙ୍କ ଭାଇ ଓ ମାଉସୀ ପୁଣି ଥିରେ ଦିଲ୍ଲୀରେ ଆସି ପହଞ୍ଚିଛନ୍ତି । ସେମାନେ ଟ୍ରମା ସେଣ୍ଟରଠାରେ ରହିଛନ୍ତି । ମହିଳାଙ୍କ ଭାଇଙ୍କ ସହ ପ୍ରମେୟ ପକ୍ଷରୁ ଯୋଗାଯୋଗ କରାଯିବାରୁ ସେ ଏହି ଅଭିଯୋଗ ପ୍ରସଙ୍ଗରେ କିଛି କହିବା ପାଇଁ ମନା କରିଦେଇଥିଲେ । ଇତିମଧ୍ୟରେ ଏହି ମାମଲାକୁ କେନ୍ଦ୍ର କରି ସୁପ୍ରିମକୋର୍ଟର ଓକିଲ ତଥା ମାନବାଧିକାର କର୍ମୀ ରାଧାକାନ୍ତ ତ୍ରିପାଠୀ ଜାତୀୟ ମାନବାଧିକାର କମିଶନରେ ଏକ ଆବେଦନ ଦାଖଲ କରିଛନ୍ତି । ସେ ତାଙ୍କ ଆବେଦନରେ ବାସହୀନ, ପରିତ୍ୟକ୍ତା ଓ ମାନସିକ ରୋଗଗ୍ରସ୍ତ ମହିଳାମାନଙ୍କ ଦୁରବସ୍ଥା ପ୍ରସଙ୍ଗ ଉଲ୍ଳେଖ କରିଛନ୍ତି । ଏଭଳି ମହିଳାମାନଙ୍କୁ କିଭଳି ଥଇଥାନ କରାଯାଇପାରିବ ସେ ପ୍ରସଙ୍ଗରେ କମିଶନଙ୍କ ଧ୍ୟାନ ଆକର୍ଷଣ କରିଛନ୍ତି । ଦିଲ୍ଲୀ ସରକାର ଏଭଳି ମହିଳାମାନଙ୍କୁ ଆବଶ୍ୟକ ସହାୟତା ଯୋଗାଇ ଦେବାକୁ ବିଫଳ ହୋଇଛନ୍ତି ବୋଲି ସେ ତାଙ୍କ ଆବେଦନରେ ଦର୍ଶାଇଛନ୍ତି।
ଶ୍ରୀ ତ୍ରିପାଠୀଙ୍କର ଏହି ଆବେଦନ ଫଳରେ ଜାତୀୟ ମାନବାଧିକାର କମିଶନ ଦିଲ୍ଲୀ ସରକାରଙ୍କ ପ୍ରମୁଖ ଶାସନ ସଚିବ ଓ ଦିଲ୍ଲୀ ପୁଲିସ କମିଶନରଙ୍କୁ ନୋଟିସ୍ ଜାରିକରି ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି । ଶ୍ରୀ ତ୍ରିପାଠୀ ପ୍ରମେୟକୁ କହିଛନ୍ତି ଯେ, ଏହି ଘଟଣା ଦିଲ୍ଲୀର ନିର୍ଭୟା କାଣ୍ଡ ସହ ସମାନ । ଏହି ଘଟଣାର ଶୀଘ୍ର ତଦନ୍ତ କରାଯିବା ସହ ପୀଡିତା ମହିଳାଙ୍କୁ ସହାୟତା ଯୋଗାଇ ଦେବାର ଆବଶ୍ୟକତା ରହିଛି । ଏହି ଘଟଣା ଘଟିବା ପରେ ଦିଲ୍ଲୀ ସ୍ଥିତ ଓଡିଶା ମହାମଞ୍ଚର ସଭାପତି ଗୋବର୍ଦ୍ଧନ ଧଳ ଏମ୍ସର ଟ୍ରମା ସେଣ୍ଟରକୁ ଯାଇ ମହିଳାଙ୍କ ଭାଇଙ୍କ ସହ କଥାବାର୍ତ୍ତା କରି ତାଙ୍କ ଅବସ୍ଥା ପଚାରି ବୁଝିଥିଲେ । ଓଡିଶା ମହାମଞ୍ଚ ପକ୍ଷରୁ ତାଙ୍କୁ ସହାୟତା ଯୋଗାଇ ଦିଆଯିବ ବୋଲି ସେ ପ୍ରତିଶ୍ରୁତି ଦେଇଛନ୍ତି।
