ନୂଆଦିଲ୍ଲୀ:୨୬/୧୧ ମୁମ୍ବାଇ ଆକ୍ରମଣର ମାଷ୍ଟରମାଇଣ୍ଡ ତହବୁର ରାଣା ବର୍ତ୍ତମାନ ଏନଆଇଏ ହେପାଜତରେ ଅଛି। ସୂତ୍ର ଅନୁଯାୟୀ, ଆଜି (ଶୁକ୍ରବାର) ତାକୁ ୪ ଘଣ୍ଟା ଧରି ପଚରାଉଚରା କରାଯାଇଥିଲା । ହେଲେ ସେ କିନ୍ତୁ ତଦନ୍ତରେ ସହଯୋଗ କରିନଥିଲା । ତହବୁରକୁ ପଚରାଉଚରା ସକାଳ ୧୧.୧୫ ରେ ଆରମ୍ଭ ହୋଇଥିଲା। ପ୍ରାୟ ୧୧.୧୦ ସମୟରେ ତାକୁ ତାର କୋଠରୀରୁ ବାହାର କରି ପଚରାଉଚରା କୋଠରୀକୁ ନିଆଯାଇଥିଲା।

ପୂର୍ବରୁ, ସକାଳ ୧୦.୩୦ ରୁ ୧୧ ଟା ମଧ୍ୟରେ NIA ଅଧିକାରୀଙ୍କ ଏକ ବୈଠକ ଅନୁଷ୍ଠିତ ହୋଇଥିଲା, ଯେଉଁଥିରେ ତହବୁର ରାଣାଙ୍କୁ ପଚରାଉଚରା ପାଇଁ ଏକ ମ୍ୟାପ୍ ପ୍ରସ୍ତୁତ କରାଯାଇଥିଲା। ସୂତ୍ର ଅନୁଯାୟୀ, ତହବୁର ଜେରା ସମୟରେ ତାର ଅସୁସ୍ଥତାର କାରଣ ଦର୍ଶାଇ ତଦନ୍ତକୁ ଏଡାଇବାକୁ ଚେଷ୍ଟା କରିଥିଲା। ଆମେରିକାରୁ ପ୍ରତ୍ୟର୍ପଣ ପରେ କୋର୍ଟ ରାଣାକୁ ୧୮ ଦିନିଆ NIA ହେପାଜତକୁ ପଠାଇ ଦେଇଥିଲେ। ଏହା ପରେ ତାଙ୍କୁ ଶୁକ୍ରବାର ସକାଳେ NIA ମୁଖ୍ୟାଳୟକୁ ଅଣାଯାଇଥିଲା।

ଭାରତରେ ଆତଙ୍କବାଦୀ ନେଟୱାର୍କ ଏବଂ ୨୬/୧୧ ଆକ୍ରମଣର ଷଡ଼ଯନ୍ତ୍ର ସହ ଜଡିତ ସମସ୍ତ ଦିଗ ଉପରେ NIA ତହବୁର ରାଣା ଠାରୁ ସୂଚନା ପାଇବାକୁ ଚାହୁଁଛି । ତଦନ୍ତକାରୀ ସଂସ୍ଥା ସନ୍ଦେହ କରୁଛି ଯେ ତହବୁର ରାଣା ଭାରତର ଅନେକ ସହରକୁ ଟାର୍ଗେଟ କରିବା ପାଇଁ ୨୬/୧୧ ମୁମ୍ବାଇ ଆକ୍ରମଣ ପରି ଏକ ଆତଙ୍କବାଦୀ ଷଡ଼ଯନ୍ତ୍ର ରଚିଥିଲା । କୋର୍ଟ ତାଙ୍କ ଆଦେଶରେ NIAକୁ ପ୍ରତି ୨୪ ଘଣ୍ଟାରେ ତହୱୁର ରାଣାର ଡାକ୍ତରୀ ପରୀକ୍ଷା କରିବାକୁ ଏବଂ ପ୍ରତି ଦୁଇ ଦିନରେ ତାଙ୍କୁ ତାଙ୍କ ଓକିଲଙ୍କୁ ଭେଟିବାକୁ ଅନୁମତି ଦେବାକୁ ନିର୍ଦ୍ଦେଶ ଦେଇଛନ୍ତି।