ନୂଆଦିଲ୍ଲୀ,୦୨/୧୧: ନାଇଜେରିଆରେ ମୁଦ୍ରାସ୍ଫୀତି ଏତେ ବୃଦ୍ଧି ପାଇଛି ଯେ ଲୋକମାନେ ରାଜରାସ୍ତାକୁ ଓହ୍ଲାଇ ଆସିଛନ୍ତି। ଶୁକ୍ରବାର ଦିନ ମୁଦ୍ରାସ୍ଫୀତି ବିରୋଧରେ ପ୍ରଦର୍ଶନ କରୁଥିବା ୨୯ ଜଣ ନାବାଳକଙ୍କୁ ଅଭିଯୁକ୍ତ ଦର୍ଶାଯିବା ସହିତ ଗିରଫ କରାଯାଇଛି ଏବଂ ଯଦି ସେମାନେ ଦୋଷୀ ସାବ୍ୟସ୍ତ ହୁଏ ତେବେ ସେମାନଙ୍କୁ ମୃତ୍ୟୁଦଣ୍ଡ ଦିଆଯାଇପାରେ। ଯେତେବେଳେ ନାବାଳକମାନଙ୍କୁ କୋର୍ଟକୁ ଅଣାଯାଇଥିଲା, ସେମାନଙ୍କ ଅବସ୍ଥା ଏପରି ଥିଲା ଯେ ସେମାନଙ୍କ ମଧ୍ୟରୁ ଚାରିଜଣ ଯୁକ୍ତି ଉପସ୍ଥାପନ କରିବା ପୂର୍ବରୁ ଚେତାଶୂନ୍ୟ ହୋଇଯାଇଥିଲେ। ନ୍ୟୁଜ୍ ଏଜେନ୍ସି ଆସୋସିଏଟ୍ ପ୍ରେସ୍ ଦ୍ବାରା ଦାଖଲ ହୋଇଥିବା ତଥ୍ୟ ଅନୁଯାୟୀ, ନାଇଜେରିଆରେ ଆକାଶଛୁଆଁ ମୁଦ୍ରାସ୍ଫୀତି ବିରୋଧରେ ପ୍ରଦର୍ଶନ କରାଯାଉଛି, ଯାହାକି ଏବେ ହିଂସାତ୍ମକ ରୂପ ନେଇଛି। ଦେଶଦ୍ରୋହ, ସମ୍ପତ୍ତି ନଷ୍ଟ କରିବା, ଦଙ୍ଗା ଏବଂ ବିଦ୍ରୋହ ସମେତ ୧୦ ଟି ଗୁରୁତର ଅଭିଯୋଗରେ ନାଇଜେରିଆ ସରକାର ମୋଟ ୭୬ ଜଣ ପ୍ରଦର୍ଶନକାରୀଙ୍କୁ ଦୋଷୀ ସାବ୍ୟସ୍ତ କରିଥିଲେ। ତଥ୍ୟ ଅନୁଯାୟୀ ନାବାଳକଙ୍କ ବୟସ ୧୪ ରୁ ୧୭ ବର୍ଷ ମଧ୍ୟରେ ବୋଲି ଦର୍ଶାଯାଇଛି।
ମୁଦ୍ରାସ୍ଫୀତି ବୃଦ୍ଧି ହେତୁ ନାଇଜେରିଆର ଲୋକଙ୍କ ପାଇଁ ଜୀବନ କଷ୍ଟସାଧ୍ୟ ହୋଇପଡ଼ିଛି ଏବଂ ସେମାନଙ୍କୁ ମୌଳିକ ସୁବିଧା ପାଇଁ ମଧ୍ୟ ସଂଘର୍ଷ କରିବାକୁ ପଡ଼ୁଛି। ଯେଉଁ କାରଣରୁ ଗତ କିଛି ମାସ ମଧ୍ୟରେ ବଡ଼ ଧରଣର ପ୍ରଦର୍ଶନ କରାଯାଇଥିଲା। ଦେଶର ଯୁବକମାନେ ନିଜ ପାଇଁ ଚାକିରି ଦାବି କରୁଛନ୍ତି। ସରକାର ବିରୋଧୀ ପ୍ରଦର୍ଶନକୁ ଦମନ କରିବାକୁ ଲାଗିଲେ, କିନ୍ତୁ ବର୍ତ୍ତମାନ କୁହାଯାଉଛି ଯେ ଏହି ପ୍ରଦର୍ଶନରେ ଗିରଫ ହୋଇଥିବା ଅଭିଯୁକ୍ତଙ୍କୁ ମୃତ୍ୟୁଦଣ୍ଡ ଦିଆଯିବ। ସୂଚନାଥାଉକି, ୧୯୭୦ ଦଶକରେ ନାଇଜେରିଆରେ ମୃତ୍ୟୁଦଣ୍ଡ ପ୍ରଣୟନ କରାଯାଇଥିଲା, କିନ୍ତୁ ୨୦୧୬ ପରଠାରୁ ଦେଶରେ କାହାକୁ ମୃତ୍ୟୁଦଣ୍ଡ ଦିଆଯାଇ ନାହିଁ।
ଜଣେ ଅଭିଯୁକ୍ତଙ୍କ ବ୍ୟକ୍ତିଗତ ଓକିଲ ଅକିନଟାୟୋ ବାଲୁଗୁନ୍ ନ୍ୟୁଜ୍ ଏଜେନ୍ସିକୁ କହିଛନ୍ତି ଯେ ଶିଶୁ ଅଧିକାର ଅଧିନିୟମ ଅନୁଯାୟୀ କୌଣସି ନାବାଳିକାଙ୍କ ବିରୋଧରେ କୌଣସି ଅପରାଧିକ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରିବ ନାହିଁ କିମ୍ବା ତାଙ୍କୁ ମୃତ୍ୟୁଦଣ୍ଡ ମଧ୍ୟ ଦିଆଯାଇପାରିବ ନାହିଁ। ବାଲୁଗୁନ୍ ଆହୁରି ମଧ୍ୟ କହିଛନ୍ତି, ତେଣୁ ନାବାଳକଙ୍କୁ ଦେଶର ହାଇକୋର୍ଟରେ ଉପସ୍ଥାପନ କରିବା ଭୁଲ୍। ଅଭିଯୁକ୍ତ ନାବଳାକଙ୍କ ପ୍ରତିନିଧିତ୍ୱ କରୁଥିବା ଦ୍ୱିତୀୟ ଓକିଲ ମାର୍ଶଲ ଆବୁବାକର କହିଛନ୍ତି ଯେ କୋର୍ଟ ସମସ୍ତଙ୍କୁ ଜାମିନ ପ୍ରଦାନ କରିଛନ୍ତି ଏବଂ ସେମାନଙ୍କ ଉପରେ ଅନେକ କଡ଼ା ସର୍ତ୍ତ ରଖିଛନ୍ତି। ଆବୁ ବକର କହିଛନ୍ତି, “ଦେଶର କର୍ତ୍ତବ୍ୟ ହେଉଛି ଏହାର ପିଲାମାନଙ୍କୁ ଶିକ୍ଷା ଦେବା ଏବଂ ନାଇଜେରିଆ ଏହି ପିଲାମାନଙ୍କୁ ଦଣ୍ଡ ଦେବା ପାଇଁ ନିଷ୍ପତ୍ତି ନେଉଛି। ଏହି ପିଲାମାନେ ୯୦ ଦିନ ଧରି ଖାଦ୍ୟ ବିନା ଜେଲରେ ଅଛନ୍ତି।
