କଟକ ୧୧/୦୯: ଦଶରା’କୁ ନେଇ ରହିଛି ଯେତେ ଗୀତ, ତାକୁ ନେଇ ରହିଛି ସେତେ କଥା ସେତେ କାହାଣୀ । ‘ତୁ ଝିଅ ନୁହେଁ ଗୋଟେ ଚାନ୍ଦି ମେଢ଼..ଚାଲିଗଲେ ତୋ ଆଗପଛେ ଭିଡ଼’ । ଏପରି କିଛି ମନଛୁଆଁ ଲାଇନ୍କୁ ନେଇ ଏକ ଗୀତ ଲେଖିଥିଲେ ବିଶିଷ୍ଟ ଗୀତିକାର ନିର୍ମଳ ନାୟକ । ୨୦୧୬ ମସିହାରେ ରିଲିଜ୍ ହୋଇଥିବା ଏହି ଗୀତର ସ୍ୱର ସଂଯୋଜନା କରିବା ସହ ନିଜେ କଣ୍ଠଦାନ କରିଥିଲେ ଅଭିଜିତ୍ ମଜୁମଦାର । କଟକର ଏମ୍ଆର୍ଆର୍ ଷ୍ଟୁଡିଓରେ ଏହି ଗୀତ ରେକର୍ଡିଂ ହୋଇଥିଲା । ଏହାକୁ ନେଇ ଥିବା ଅନୁଭୂତି ସମ୍ପର୍କରେ ଗୀତିକାର ଶ୍ରୀ ନାୟକ କହିଛନ୍ତି, କଟକର ଚାନ୍ଦି ମେଢ଼ର କାରୁକାର୍ଯ୍ୟ ସବୁଠୁ ସୁନ୍ଦର ଏବଂ ସ୍ୱତନ୍ତ୍ର । କଟକର କେବଳ ସୁନା ଚାନ୍ଦିର ମେଢ଼ ଦେଖିବାକୁ ଲୋକେ କଟକକୁ ଆସିଥାନ୍ତି । ତେଣୁ ଚାନ୍ଦିମେଢ଼କୁ ନେଇ ଏକ ଗୀତ କରିବାକୁ ଯୋଜନା ହୋଇଥିଲା । ଚାନ୍ଦି ମେଢ଼ର ଆକର୍ଷଣୀୟ ଶୋଭା ସହ ଝିଅଙ୍କ ସୁନ୍ଦରତାକୁ ତୁଳନା କରି ଏପରି ଏକ ଗୀତ ଲେଖିଥିଲି ।
ଅଭିଜିତ୍ ମଜୁମଦାର ଏହି ଗୀତକୁ ସୁନ୍ଦର ଭାବେ ସ୍ୱର ଦେଇ ନିଜେ ଗାଇଥିଲେ । ଗୀତ ରିଲିଜ୍ ହେବା ପରେ କ୍ୟାସେଟ୍ ମାର୍କେଟରେ ଭଲ ବିକ୍ରି ହୋଇଥିଲା । ଆଶାଥିଲା ପୂଜା ବଜାରରେ ଗୀତଟି ଧରିବ । କିଛି ଦିନ ପରେ ଏହି ଗୀତ ପୂଜା ବଜାରରେ ବାଜିବା ସହ ମେଲୋଡି ଏବଂ ଭସାଣି ଉତ୍ସବରେ ବାଜିଥିଲା । ପୂଜା ବଜାରରେ ନିଜ ଗୀତ ଶୁଣି ବହୁତ ଖୁସି ଲାଗିଥିଲା । କିନ୍ତୁ ଆମେ ଯେତେ ଗୀତ କରିଥିଲେ ମଧ୍ୟ ପୂଜା ବଜାରକୁ ନେଇ ସଙ୍ଗୀତକାର ସ୍ୱର୍ଗତ ଶ୍ରୀକାନ୍ତ ଦାସ କରିଥିବା ଗୀତ ସବୁଠୁ ଅଧିକ ହିଟ୍ ହୋଇଥିଲା । ତାଙ୍କ ଗୀତକୁ କେହି କାଟି ପାରିବେ ନାହିଁ । ପୂର୍ବରୁ ବହୁତ ଗୀତ ହିଟ୍ ହୋଇଛି । କିନ୍ତୁ ଆଜିର ସମୟରେ ଆଗଭଳି ହୋଇଥିବା ଏପରି ଗୀତ ଆଉ ତିଆରି ହେଉନି । ଚାହିଦା କମି ଯାଇଛି ।
