ନୂଆଦିଲ୍ଲୀ, ୧।୨: କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ କେନ୍ଦ୍ରୀୟ ବଜେଟ୍ ୨୦୨୫-୨୬ ଉପସ୍ଥାପନ କରୁଛନ୍ତି । ଏହି ବଜେଟ୍ ଉପସ୍ଥାପନ ଅବସରରେ ଅର୍ଥମନ୍ତ୍ରୀ ସ୍ୱତନ୍ତ୍ର ଯୋଜନା ଆଣିଥିବା ଆଶା କରାଯାଉଛି । ଚଳିତ ବର୍ଷ ସରକାର ମହଙ୍ଗା ଓ ଟ୍ୟାକ୍ସ ଉପରେ ଏକାଧିକ ଆଶ୍ୱସନା ଦେବା ନେଇ ଘୋଷଣା କରିଛନ୍ତି । ବିତ୍ତୀୟ ମନ୍ତ୍ରୀ ନିର୍ମଳା ସୀତାରମଣ ସକାଳ ୧୧ଟା ସମୟରେ ବଜେଟ୍ ଉପସ୍ଥାପନ କରିଥିଲେ । ଗତ ୪ ବଜେଟ୍ ଓ ଅନ୍ତରୀଣ ଭଳି ଏହି ବଜେଟ୍ ମଧ୍ୟ ପେପରଲେସ୍ ରହିଛି ।
ଚଳିତ ବଜେଟ୍ରେ ସ୍ୱାସ୍ଥ୍ୟ କ୍ଷେତ୍ର ପାଇଁ ନୂଆ କ’ଣ ?
ଆଗାମୀ ୩ ବର୍ଷରେ ସମସ୍ତ ଜିଲ୍ଲାରେ ଡେ କେୟାର କ୍ୟାନସର ସେଣ୍ଟର ଡାକ୍ତରଖାନା ନିର୍ମାଣ କରିବାକୁ ଯୋଜନା ରଖିଛନ୍ତି ସରକାର । ଶନିବାର ବଜେଟ୍ ଉପସ୍ଥାପନରେ ୨୦୨୫-୨୬ରେ ଦେଶରେ ଚଳିତ ବର୍ଷ ୨୦୦ ଡେ କେୟାର କ୍ୟାନସର ସେଣ୍ଟର ନିର୍ମାଣ କରିବାକୁ ଘୋଷଣା କରିଛନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତରମଣ । ୨୦୨୫-୨୬ ବଜେଟ୍ ଉପସ୍ଥାପନ ବେଳେ ଅର୍ଥମନ୍ତ୍ରୀ କହିଛନ୍ତି, ପିଏମ୍ ଜନ ଆରୋଗ୍ୟ ଯୋଜନା ଅଧିନରେ ପାଖାପାଖି ୧ କୋଟି ଠିକା କର୍ମଚାରୀ ଚିକିତ୍ସାର ଲାଭ ପାଇବେ । ଆଗାମୀ ବର୍ଷରେ ମେଡିକାଲ କଲେଜ ଓ ହସ୍ପିଟାଲରେ ୧୦ ହଜାର ସିଟ୍ ଦିଆଯିବା ସହ ଆଗାମୀ ୫ ବର୍ଷରେ ଏହା ୭୫ ହଜାରକୁ ବୃଦ୍ଧି ପାଇବ ବୋଲି ଘୋଷଣା କରିଛନ୍ତି । ଆଗାମୀ ୧୦ ବର୍ଷରେ ଡାକ୍ତରୀ ଶିକ୍ଷା ପାଇଁ ୧୩୦ ପ୍ରତିଶତ ବୃଦ୍ଧି ପାଇ ୧ ଲକ୍ଷ ୟୁଜି-ପିଜି ସିଟ୍ ଦିଆଯିବାକୁ ଯୋଜନା କରାଯାଇଛି । ଏଥିସହ ଆଗାମୀ ୩ ବର୍ଷରେ ପ୍ରତ୍ୟେକ ଜିଲ୍ଲାରେ ଡେ କେୟାର କ୍ୟାନସର ସେଣ୍ଟର ନିର୍ମାଣ କରିବାକୁ ଯୋଜନା କରାଯାଇଛି । ଅର୍ଥମନ୍ତ୍ରୀଙ୍କ କହିବାନୁସାରେ, ସମସ୍ତ ସରକାରୀ ମାଧ୍ୟମିକ ବିଦ୍ୟାଳୟ ଓ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରଗୁଡ଼ିକୁ ବ୍ରଡବ୍ୟାଣ୍ଡ କନେକ୍ଟିଭିଟି ପ୍ରଦାନ କରାଯିବ ।
ଅନ୍ୟପଟେ ଗମ୍ଭୀର ରୋଗର ଚିକିତ୍ସା ପାଇଁ ଥିବା ୩୬ଟି ଔଷଧ ଉପରେ କଷ୍ଟମ ଡ୍ୟୁଟି ଟ୍ୟାକ୍ସରେ ଛାଡ଼ କରାଯାଇଛି । ୩୬ଟି ଜୀବନ ରକ୍ଷକ ଔଷଧ ଉପରେ କଷ୍ଟମ ଡ୍ୟୁଟି ଟ୍ୟାକ୍ସକୁ ସମ୍ପୂର୍ଣ୍ଣ ରୂପେ ହଟାଇ ଦିଆଯାଇଥିବା କହିଛନ୍ତି ଅର୍ଥମନ୍ତ୍ରୀ ନିର୍ମଳା ସୀତାରମଣ । ଦେଶର ସମସ୍ତ ସରକାରୀ ଡାକ୍ତରଖାନାରେ କ୍ୟାନସର ଡେ କେୟାର ସେଣ୍ଟର ତିଆରି କରିବାକୁ ମଧ୍ୟ ଘୋଷଣା କରାଯାଇଛି । କ୍ୟାନସରର ଚିକିତ୍ସା ପାଇଁ ଆବଶ୍ୟକ ହେଉଥିବା ଔଷଧଗୁଡ଼ିକ ମଧ୍ୟ ଶସ୍ତା ହେବ । ୬ ଜୀବନ ରକ୍ଷକ ଔଷଧ ଉପରେ କଷ୍ଟମ ଡ୍ୟୁଟି ଟ୍ୟାକ୍ସକୁ ୫ ପ୍ରତିଶତ କରିଦିଆଯିବ ।
