କଟକ,୦୯/୧୧: ଗ୍ୟାଙ୍ଗ୍ଷ୍ଟର୍ ସକିଲ୍ ଅହମ୍ମଦର ଦୁଇଟି ଭିଡିଓ ସୋସିଆଲ୍ ମିଡିଆରେ ହଠାତ୍ ଅପ୍ଲୋଡ୍ ହୋଇଛି । ଏନ୍କାଉଣ୍ଟର ଭୟରେ ସେ ଏହି ଦୁଇଟି ଭିଡିଓକୁ ତାର ସୋସିଆଲ୍ ମିଡିଆ ଆକାଉଣ୍ଟରେ ପୋଷ୍ଟ କରିଥିବା କୁହାଯାଉଛି । ‘ମୁଁ ସମାଜର ମୁଖ୍ୟ ସ୍ରୋତରେ ସାମିଲ୍ ହେବାକୁ ଚାହୁଁଥିବା ବେଳେ ପୁଲିସ ମୋତେ ଏନ୍କାଉଣ୍ଟର୍ କରିବା ପାଇଁ ଖୋଜୁଛି’ ବୋଲି ସେ ଏହି ଭିଡିଓରେ କହୁଛି । ପୁଲିସ ଡରରେ ସକିଲ୍ ସମାଜର ମୁଖ୍ୟ ସ୍ରୋତ କଥା ଉଠାଇ ଜାଣିଶୁଣି ଭିଡିଓ ଭାଇରାଲ୍ କରିଥିବା କଥା କୁହାଯାଉଥିବା ବେଳେ ଏଭଳି ଅଭିଯୋଗ ନେଇ ପୁଲିସର ପ୍ରତିକ୍ରିୟା କିନ୍ତୁ ମିଳିପାରିନି ।
କଟକ ସହରରେ ବଟି ଆଦାୟରୁ ଆରମ୍ଭ କରି ବିଭିନ୍ନ ଅପରାଧିକ କାର୍ଯ୍ୟକଳାପ ସହ ଜଡ଼ିତ ରହିଛି ଗ୍ୟାଙ୍ଗ୍ଷ୍ଟର୍ ସକିଲ୍ । ସେ ନିଜର ଗ୍ୟାଙ୍ଗ୍ ଆରମ୍ଭ କରି ଜେଲ୍ ଭିତରୁ କାୟା ବିସ୍ତାର କରୁଥିବାର ପୁଲିସ ରେକର୍ଡ ରହିଛି । ଇତିମଧ୍ୟରେ କମିସନରେଟ୍ ପୁଲିସ୍ ତାକୁ ତଡ଼ିପାର୍ କରିଥିଲା । ତଡ଼ିପାର୍ ଦଣ୍ଡ ଅବଧି ସାରିବା ପରେ ମଧ୍ୟ କିଛି ମାମଲାରେ ସେ ଜେଲ୍ ଯାଇସାରିଛି । ଗଲା କିଛି ଦିନ ହେବ ଚର୍ଚ୍ଚାର ବାହାରେ ଥିବା ସକିଲ୍ର ଫେସ୍ବୁକ୍ ଆକାଉଣ୍ଟ୍ରେ ହଠାତ୍ ଆଜି ଦୁଇଟି ଭିଡିଓ ସଂଧ୍ୟା ସମୟରେ ଅପ୍ଲୋଡ୍ ହୋଇଥିଲା । ଭିଡିଓ ଦୁଇଟି ସେ କାହିଁକି ଅପ୍ଲୋଡ୍ କରିଛି, ସେ ବିଷୟ ଉକ୍ତ ଭିଡିଓରେ ସେ କହୁଥିବା ଦେଖିବାକୁ ମିଳିଛି ।
ଭିଡିଓରେ ସେ କହିଛି ଯେ, ପୁଲିସ୍ ମୋତେ କିଛି ଦିନ ହେବ ଖୋଜାଖୋଜି କରୁଛି । କାରଣ ପୁଲିସ ମୋତେ ଫେକ୍ ଏନ୍କାଉଣ୍ଟର୍ କରିବାକୁ ଯୋଜନା କରିଛି । ମୁଁ ଦୀର୍ଘ ମାସ ହେବ କୌଣସି ଅପରାଧ କରୁନାହିଁ । ଏପରିକି ଅପରାଧୀଙ୍କ ସହିତ ସମ୍ପର୍କ ରଖିନାହିଁ । ଏବେ କୌଣସି ଥାନାରେ ମୋ ନାଁରେ ନୂଆ ଏତଲା ହୋଇନି । ମାତ୍ର ପୁଲିସ୍ ମୋତେ ମିଛ କେସ୍ରେ ଫସେଇବା ପାଇଁ ଚାହୁଁଥିବା ବିଭିନ୍ନ ଲୋକଙ୍କଠାରୁ ଶୁଣୁଛି । ମୁଁ ଜେଲ୍ରୁ ବାହାରିବା ପରେ ଥାନାରେ ହାଜିରା ଦେଉଥିଲି । ପରେ ଆଇନକୁ ସମ୍ମାନ ଜଣାଇ ୬ମାସ ତଡ଼ିପାର୍ ମଧ୍ୟ ହେଲି । ଘରକୁ ଆସିବା ପରେ ପୁଣି ଥାନାରେ ହାଜିରା ଦେଲି । ଏହାର ୪ ମାସ ପରେ ଜଣେ ସମ୍ପର୍କୀୟଙ୍କ ସହ ଯୋଡ଼ି ପୁଲିସ୍ ମୋ’ ନାଁରେ ୬ଟି କେସ୍ କରିଛି । ମୋତେ ନ୍ୟାୟ ମିଳୁ ବୋଲି ସକିଲ୍ ଭିଡିଓରେ କହିଛି ।
‘ମୁଁ ସ୍ତ୍ରୀ ଓ ପିଲା ଛୁଆଙ୍କୁ ନେଇ ସମାଜର ମୁଖ୍ୟସ୍ରୋତକୁ ଆସିବାକୁ ଚାହୁଁଛି । ମୁଁ ଭଲ ମଣିଷ ହେବାକୁ ଚାହୁଁଛି । ମୁଁ ଗୁହାରି କରୁଛି ମୋତେ ନ୍ୟାୟ ମିଳୁ, ଉଚ୍ଚ ନ୍ୟାୟାଳୟ ଓ ମୁଖ୍ୟମନ୍ତ୍ରୀ ମୋତେ ନ୍ୟାୟ ଦିଅନ୍ତୁ’ ବୋଲି ଭିଡିଓରେ ସେ କହିଛି । ଏହି ଦୁଇଟି ଭିଡିଓ କେଉଁଠାରେ ସୁଟିଂ ହୋଇଛି ତାହା ସ୍ପଷ୍ଟ ଜଣାପଡ଼ୁନି। ତଥାପି ଏକ ପରିତ୍ୟକ୍ତ ସ୍ଥାନରେ ବସି ତାହା ସୁଟ୍ ହୋଇଥିବା ଅନୁମାନ କରାଯାଉଛି । ଅନ୍ୟପଟେ ଏହି ଭିଡିଓ ନେଇ ଓ ଭିଡିଓରେ ସକିଲ୍ କରିଥିବା ଅଭିଯୋଗ ନେଇ କଟକ ପୁଲିସ କିଛି ପ୍ରତିକ୍ରିୟା ଦେଇନି ।
ଗୁରୁତ୍ୱପୂର୍ଣ୍ଣ ହେଉଛି, ଅଖିଳେଶ୍ୱର ସିଂହ ଡିସିପି ଥିବା ବେଳେ କଟକରେ ପ୍ରାୟ ୨୭ଟି ଏନ୍କାଉଣ୍ଟର ହୋଇଥିଲା । ଏପରିକି ଦୁଇ ଜଣଙ୍କୁ ଦୁଇ ଥର ଏନ୍କାଉଣ୍ଟର କରାଯାଇଥିଲା । ସେ ସମୟରେ ସକିଲ୍ ସବୁଠାରୁ ଅଧିକ ଉତ୍ପାତ କରୁଥିବା ବେଳେ ମଧ୍ୟ ସେ ଏନ୍କାଉଣ୍ଟରର ଶିକାର ହୋଇନଥିଲା । ଏପରିକି ଅଖିଳେଶ୍ୱରଙ୍କ ପରେ ବହୁ ଡିସିପି ଆସି ଯାଇଛନ୍ତି । ମାତ୍ର ସେ ଏନ୍କାଉଣ୍ଟର୍ ସାମ୍ନା କରିନି । ବାରମ୍ବାର ଜେଲ୍ ଯାଇଛି । ଏବେ ହଠାତ୍ ସକିଲ କାହିଁକି ନିଜକୁ ଅସୁରକ୍ଷିତ ମଣିଲା ଓ ଏନ୍କାଉଣ୍ଟର ଭୟ ତାକୁ ଘାରିଲା ତାହାକୁ ନେଇ ଚର୍ଚ୍ଚା ଜୋର ଧରିଛି ।
