ସମ୍ବଲପୁର, ୨୭/୦୮ : ପ୍ରବାସରେ ରହୁଥିବା ପୁଅ, ଝିଅ ଘରକୁ ଫେରିଛନ୍ତି । ଦାଦା, ଖୁଡ଼ି, ଭାଇ, ଭଉଣୀ ଏକାଠି ହୋଇଛନ୍ତି। ରାତିପାହିଲେ ହେଲା। କୃଷିଭିତ୍ତିକ ମହାନ ଗଣପର୍ବ ନୂଆଁଖାଇରେ ଏକାଠି ନବାନ୍ନ ଖାଇବେ ପରିବାର । ଏଥିପାଇଁ ଆଜିଠୁ ସମସ୍ତ ପ୍ରସ୍ତୁତି ସରିଛି । ପଶ୍ଚିମ ଓଡ଼ିଶାର ଆଧିଷ୍ଠାତ୍ରୀ ଦେବୀ ମା’ ସମଲେଶ୍ୱରୀଙ୍କ ଠାରେ ନବାନ୍ନ ଲାଗି ହେବା ପରେ ସମସ୍ତେ ନୂଆଁ ଖାଇବେ । ଏହି ମୁହୂର୍ତ୍ତକୁ ଅପେକ୍ଷା କରିଛନ୍ତି ସାରା ପଶ୍ଚିମ ଓଡ଼ିଶାବାସୀ ।
ଏପଟେ, ଆରାଧ୍ୟ ଦେବୀ ମା’ସମଲେଶ୍ୱରୀଙ୍କ ପୀଠରେ ପ୍ରଥମ ନବାନ୍ନ ଲାଗି ହେବାକୁ ଥିବାରୁ ସେଠାରେ ବି ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି । ସମଲେଶ୍ୱରୀ ମନ୍ଦିରରେ ରଙ୍ଗକାମଠୁ ନେଇ ମରାମତି ଓ ଗହଣ ସଫେଇ ଜୋରସୋର୍ରେ ଚାଲିଛି । ସୁବ୍ୟବସ୍ଥିତ କରିବାକୁ ସମସ୍ତ ପୂଜା ପ୍ରସ୍ତୁତି ଚୂଡ଼ାନ୍ତ ହୋଇଥିବା ସୂଚନା ଦେଇଛନ୍ତି ମନ୍ଦିର ଟ୍ରଷ୍ଟ ବୋର୍ଡ ସଭାପତି ସଞ୍ଜୟ ବାବୁ । ଗତ ୩ ଦିନ ମଧ୍ୟରେ ମନ୍ଦିର ମରାମତି କାମ ଜୋରସୋର୍ରେ ଚାଲିଛି । ମନ୍ଦିର ଭିତରେ ଫାଟିଥିବା ଟାଇଲ୍ ଓ ମାର୍ବଲ୍ କାମ ତିଆରି ସରିଛି । ମନ୍ଦିର ଭିତର ପାର୍ଶ୍ୱ ନୂଆଁ ରଙ୍ଗ କାମ ହୋଇଛି । ମା’ଙ୍କ ଅଳଙ୍କାର ସଫେଇ କରାଯାଇଛି । ପାର୍ଶ୍ୱ ଦେବଦେବୀଙ୍କ ସିନ୍ଦୂର ଲଗା ସରିଛି । ଭକ୍ତଙ୍କ ଦର୍ଶନ ପାଇଁ ସୁବ୍ୟବସ୍ଥା କରାଯାଇଛି । ନୂଆଁଖାଇର ପୂଜାର୍ଚ୍ଚନା ସକାଶେ ମଧ୍ୟ ପ୍ରସ୍ତୁତି ଚାଲିଛି ।
ମୁଖ୍ୟ ପୂଜକ ଅମ୍ବିକା ପ୍ରସାଦ ରାୟଙ୍କ ଘରେ ବି ବଲବସପୁରରୁ ଆସିଥିବା ନୂଆଁ ଧାନରୁ ନବାନ୍ନ ପାଇଁ ପ୍ରସ୍ତୁତି ପ୍ରକ୍ରିୟା ଜାରି ରହିଛି। ଆସନ୍ତା ଭାଦ୍ରବ ଶୁକ୍ଳପକ୍ଷ ପଞ୍ଚମୀ ଗୁରୁବାର (୨୮ ତାରିଖ) ସକାଳ ୧୦ଟା ୩୩ରୁ ୧୦ଟା ୫୫ମଧ୍ୟରେ ମା’ଙ୍କ ଠାରେ ନବାନ୍ନ ଲାଗିହେବ । ନୂଆଁଖାଇରେ ସାମିଲ ହେବାକୁ ପରିବାରର ସଦସ୍ୟ ଘରମୁହାଁ ହୋଇଛନ୍ତି । ରେଳ ଷ୍ଟେସନରୁ ଆରମ୍ଭ କରି ବସଷ୍ଟାଣ୍ଡ ଯାଏ ଲୋକାରଣ୍ୟ ହୋଇଯାଇଛି । ପୂରା ପରିବାର ଏକାଠି ହେବା ପରେ ଘର ଉତ୍ସାହରେ ଫାଟି ପଡୁଛି । ଭଳିକି ଭଳି ପିଠାପଣାର ଆସରରେ ଘର ମହକି ଉଠୁଛି । ଅପରପକ୍ଷେ, କୃଷିଭିତ୍ତିକ ପର୍ବ ହୋଇଥିବାରୁ ବେଶ୍ କିଛିଦିନ ହେଲା ଚାଷୀ ଭାଇ ତାର ପ୍ରସ୍ତୁତି ଚଲାଇଥିଲା । ହଳ ବଳଦ ଧୁଆରୁ ଆରମ୍ଭ କରି ଗୁହାଳ ସଫା ଯାଏ କାମରେ ବ୍ୟସ୍ତ ରହିଥିଲା । ଘରର ସ୍ତ୍ରୀ ଲୋକମାନେ ଘର ଲିପାପୋଛାରୁ ଆରମ୍ଭ କରି ଚୁନା ପ୍ରସ୍ତୁତି ଯାଏ କାମରେ ବ୍ୟସ୍ତ ଥିବା ବେଳେ ଏବେ ସବୁ କାମ ବି ଶେଷ ହୋଇଛି । ସେହିପରି ବିଭିନ୍ନ ଜାତିର ଲୋକ ବିଭିନ୍ନ ପତ୍ରରେ ନବାନ୍ନ ଭକ୍ଷଣ କରିଥାନ୍ତି । ଏଥିପାଇଁ ଜାତି ଅନୁସାରେ କୁରେ, ମହୁଲ, ଶାଳ ଆଦି ବିଭିନ୍ନ ପତ୍ର ସଂଗ୍ରହ କରି ଦନା ପ୍ରସ୍ତୁତି ବି ଶେଷ ହୋଇଛି । ଅନ୍ୟପଟେ, ଗତମାସରେ ବର୍ଷା ଅଭାବରୁ ଧାନ ହୋଇପାରିନି । ତେଣୁ ଆଜି ସମ୍ବଲପୁର ସହରରେ ବସିଥିବା ହାଟରେ ପ୍ରବଳ ଭିଡ଼ ହୋଇଥିଲା । ନୂଆଁ ଧାନ, ପତ୍ର ଏବଂ ଅନ୍ୟ ସାମଗ୍ରୀ କିଣି ଘରକୁ ନେଇଛନ୍ତି । ଆଜି ସହରର ଲକ୍ଷ୍ମୀଟକିଜରୁ ଗୋଲବଜାର ଛକରେ ପ୍ରବଳ ଭିଡ଼ ହୋଇଥିଲା ।
