ସିମୁଳିଆ,୨/୭ : ଗତ ୩୦ତାରିଖ ଦିନ ତେଲେଙ୍ଗାନାର କେମିକାଲ ଫ୍ୟାକ୍ଟ୍ରିରେ ବିସ୍ଫୋରଣରେ ବାଲେଶ୍ଵର ଜିଲ୍ଲା ସିମୁଳିଆ ଥାନା ପୁରୁଷୋତ୍ତମପୁର ପଞ୍ଚାୟତ ପାର୍ବତୀପୁର ଗ୍ରାମର ଅନନ୍ତ ରାଉତଙ୍କ ପୁତ୍ର ମନୋଜ ରାଉତ(୩୫)ଙ୍କର ଦେହାନ୍ତ ଘଟିଛି । ଖବରପାଇ ପରିବାର ଲୋକେ ସେଠାକୁ ଯାଇ ମୃତ ମନୋଜଙ୍କୁ ଚିହ୍ନଟ କରି ଆଜି ଶବକୁ ଗାଁରେ ପହଁଚାଇବା ପରେ ସେହି ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛି । ଅନ୍ୟପଟେ ମନୋଜକୁ ହରାଇ ପରିବାର ଲୋକେ ଦୁଃଖରେ ଭାଙ୍ଗି ପଡିଛନ୍ତି । ସ୍ୱାମୀର ମୃତଦେହକୁ ଧରି ସ୍ତ୍ରୀ ଉର୍ମିଳା ଏବଂ ଦୁଇ ପୁଅ ଭୋ ଭୋ ହୋଇ କାନ୍ଦୁଥିବାର ଦୃଶ୍ୟ ଅତ୍ୟନ୍ତ ହୃଦୟ ବିଦାରକ ହୋଇଛି ।
ପ୍ରକାଶ ଯେ, ଗତ ୨୦୦୧ମସିହାଠାରୁ ମନୋଜ ତେଲେଙ୍ଗାନାରେ କେମିକାଲ ଫ୍ୟାକ୍ଟ୍ରିରେ କ୍ୱାଲିଟ ମ୍ୟାନେଜର ଭାବରେ କାର୍ଯ୍ୟ କରୁଥିଲେ । ଚଳିତ ବର୍ଷ ରଜକୁ ଘରକୁ ଆସିଥିବାବେଳେ ଫ୍ୟାକ୍ଟ୍ରିର ମାଲିକଙ୍କ ଫୋନ ଆସିବାରୁ କାମରେ ଯୋଗ ଦେବାକୁ ଚାଲି ଯାଇଥିଲେ । ଗତ ମାସ ୩୦ତାରିଖରେ ଏହି କେମିକାଲ ଫ୍ୟାକ୍ଟ୍ରିରେ ଦୁର୍ଘଟଣା ଘଟିବାରୁ ମନୋଜଙ୍କ ସହ ବହୁ କର୍ମଚାରୀଙ୍କର ମୃତ୍ୟୁ ଘଟିଥିଲା । ପରିବାର ଲୋକେ ଖବରପାଇବା ପରେ ତେଲେଙ୍ଗାନା ଯାଇ ଘଟଣାସ୍ଥଳରେ ପହଞ୍ଚି ଥିଲେ । ହେଲେ କୁଢ଼ କୁଢ଼ ଶବ ଭିତରେ ମନୋଜକୁ ଚିହ୍ନି ପାରି ନଥିଲେ । ପ୍ରାୟ ୧୮ଘଣ୍ଟା ଧରି ଖୋଜାଖୋଜି କରିବା ପରେ ତାଙ୍କ ହାତରେ ବନ୍ଧା ଥିବା ଡେଉଁରିଆ ଦେଖି ମନୋଜଙ୍କ ଶବକୁ ପରିବାର ଲୋକେ ଚିହ୍ନଟ କରିପାରିଥିଲେ । ସେଠାରେ ସମସ୍ତ ଯାଞ୍ଚ କରାଯାଇ ପରିବାର ଲୋକଙ୍କୁ ହସ୍ତାନ୍ତର କରିବା ପରେ ଆଜି ଅପରାହ୍ନରେ ଗାଁରେ ଶବ ପହଁଚିଥିଲା ଏବଂ ମୃତଦେହ ଦେଖି ଗାଁ କାନ୍ଦ ବୋବାଳିରେ ଫାଟି ପଡ଼ିଥିଲା । ବିସ୍ଫୋରଣରେ ପ୍ରାଣ ହରାଇଥିବା ବ୍ୟକ୍ତିଙ୍କ ପରିବାରକୁ ନଗଦ ଏକ ଲକ୍ଷ ଟଙ୍କା ଆର୍ଥିକ ସହାୟତା ଦିଆଯାଇଥିବାର ସୂଚନା ମିଳିଛି । ହେଲେ ତେଲେଙ୍ଗାନା ସରକାର ଯାହା ଘୋଷଣା କରିଛି ତାହା ହସ୍ତଗତ ହୋଇନାହିଁ ବୋଲି ତାଙ୍କର ସମ୍ପର୍କୀୟ ସୂଚନା ଦେଇଛନ୍ତି । ମୃତ ମନୋଜଙ୍କ ପରିବାର ଏବଂ ଗ୍ରାମବାସୀ ରାଜ୍ୟ ସରକାରଙ୍କ ପକ୍ଷରୁ ଆର୍ଥିକ ସହାୟତା ଯୋଗାଇ ଦେବାକୁ ନିବେଦନ କରିଛନ୍ତି ।
