ଭୁବନେଶ୍ୱର ୧୧/୦୫: ଶ୍ରୀତମ, ଶ୍ରାବଣୀ ଓ ମିଲନ୍ ‘ଭାବାନ୍ତର’ ଚଳଚ୍ଚିତ୍ରର ତିନି ଗୁରୁତ୍ୱପୂର୍ଣ୍ଣ ଚରିତ୍ର । ଶ୍ରୀତମ ବିବାହ କରେ ଶ୍ରାବଣୀକୁ । କିନ୍ତୁ ବାସର ରାତିରେ ତା’ର ସବୁ ଖୁସି ପାଣିଚିଆ ହୋଇଯାଏ । ତାକୁ ଆଶ୍ଚର୍ଯ୍ୟ କରି ଶ୍ରାବଣୀ କହେ, ସେ ମିଲନ୍କୁ ପ୍ରେମ କରୁଥିଲା । ତାକୁ ହିଁ ମନେ ମନେ ସେ ପତି ଭାବେ ଗ୍ରହଣ କରିନେଇଛି । ତେଣୁ ଶ୍ରୀତମ ଯେମିତି ତାକୁ ନ ଛୁଏଁ । ଶ୍ରୀତମ ବିନା ପ୍ରତିବାଦରେ ଶ୍ରାବଣୀର କଥା ମାନିନିଏ । ଦିନେ ନା ଦିନେ ମିଲନ୍ ସହ ତା’ର ଭେଟ କରାଇବ ବୋଲି କଥା ଦିଏ । ଏହା ସହିତ ଶ୍ରାବଣୀ ସାମ୍ନାରେ ସର୍ତ୍ତ ମଧ୍ୟ ବାଢ଼େ, ଯେଉଁ ଦିନ ପର୍ଯ୍ୟନ୍ତ ମିଲନ୍ ସହ ତା’ର ସାକ୍ଷାତ ନ ହୋଇଛି, ସେତେବେଳ ଯାଏଁ ସେମାନେ ବାପା, ମା’ଙ୍କ ସାମ୍ନାରେ ପତି-ପତ୍ନୀର ଅଭିନୟ କରିବେ । ତାହା ହିଁ ହୁଏ । ସମୟକ୍ରମେ ଶ୍ରାବଣୀ ଏକ ପୁତ୍ର ସନ୍ତାନ ଜନ୍ମ ଦିଏ ।
ଅନ୍ୟପକ୍ଷରେ ମିଲନ୍ ନିଜକୁ ଶୁଭମ୍ ପରିଚୟ ଦେଇ ଶ୍ରାବଣୀକୁ ଭେଟେ କିନ୍ତୁ ଶ୍ରାବଣୀ ତାକୁ ଗ୍ରହଣ ନ କରିବାରୁ ସେ ସହର ଛାଡ଼ି ପଳାଏ । ଶେଷରେ କ’ଣ ହୁଏ? ମିଲନ୍ ଫେରିଆସେ କି? କାହାଣୀର ସୁଖଦ ପରିସମାପ୍ତି ହୁଏ ନା ନାହିଁ? ଏ ସମସ୍ତ ପ୍ରଶ୍ନର ଉତ୍ତର ହିଁ ‘ଭାବାନ୍ତର’ ଚଳଚ୍ଚିତ୍ରର କଥାବସ୍ତୁ । ଫିଲ୍ମର ମୁଖ୍ୟ ଚରିତ୍ରରେ ଅଭିଷେକ, ସୂର୍ଯ୍ୟମୟୀ ଅଭିନୟ କରିଥିବାବେଳେ ଅନ୍ୟାନ୍ୟ ଚରିତ୍ରରେ ସରୋଜ ନନ୍ଦ, ରବି ତ୍ରିପାଠୀ, ବିନାୟକ ମିଶ୍ର, ମମତା ସାହୁ ଓ ପ୍ରିୟା ବିଶୋଇ ପ୍ରମୁଖ ନଜର ଆସିବେ । ଫିଲ୍ମର କାହାଣୀ ରଚନା କରିଛନ୍ତି ଅଜୟ ମହାପାତ୍ର, ଚିତ୍ରନାଟ୍ୟ, ସଂଳାପ ଲେଖିବା ସହ ନିର୍ଦ୍ଦେଶନା ଦେଇଛନ୍ତି ପ୍ରଖ୍ୟାତ ଚଳଚ୍ଚିତ୍ର ଓ ମଞ୍ଚ ନାଟକ ନିର୍ଦ୍ଦେଶକ ଅନନ୍ତ ମହାପାତ୍ର । ଦେବଦାସ ଛୋଟରାୟଙ୍କ ଲିଖିତ ଗୀତକୁ ସଂଗୀତରେ ସଜାଇଛନ୍ତି ଶକ୍ତି ପ୍ରସାଦ ମିଶ୍ର । ଗୀତଗୁଡ଼ିକରେ ସୁସ୍ମିତା ଦାସଙ୍କ ସୁମଧୁର କଣ୍ଠସ୍ୱର ଶୁଣିବାକୁ ମିଳିବ । ଚଳଚ୍ଚିତ୍ରଟି ଖୁବ୍ ଶୀଘ୍ର ପ୍ରେକ୍ଷାଳୟକୁ ଆସି ଦର୍ଶକଙ୍କ ମନୋରଞ୍ଜନ କରିବ ବୋଲି ପ୍ରଯୋଜନା ସଂସ୍ଥା ପକ୍ଷରୁ କୁହାଯାଇଛି ।
