ଜୟପୁର,୦୨/୧୧: ସ୍ଥାନୀୟ ସାଇଫିଲ୍ମ ଦ୍ୱାରା ପ୍ରସ୍ତୁତ କୋରାପୁଟିଆ ସିନେମା ‘କବାଡି’କୁ ମିଳିଛି ସେନସର୍ ସାର୍ଟିଫିକେଟ । ଏହାକୁ ନେଇ କଳାକାରମାନେ ଉତ୍ସବ ପାଳନ କରିଛନ୍ତି । ନିର୍ଦ୍ଦେଶକ ଅମର ମିଶ୍ରଙ୍କ ଅଧ୍ୟକ୍ଷତାରେ ସ୍ଥାନୀୟ ଏସ୍ଆର୍ ମଲରେ ଏହି କାର୍ଯ୍ୟକ୍ରମର ଆୟୋଜନ କରାଯାଇଥିଲା । ଅତିଥିଭାବେ ହାସ୍ୟ ଅଭିନେତା ଗୋପାଳକୃଷ୍ଣ ସାମନ୍ତରାୟ, ବରିଷ୍ଠ କଳାକାର ରବୀନ୍ଦ୍ର ପାତ୍ର, ସାଇଫିଲ୍ମର ଆଇନ ଉପଦେଷ୍ଟା ଲାଲମୋହନ ମିଶ୍ର, ସୁବାସ ରାଉତ ପ୍ରମୁଖ ଯୋଗ ଦେଇଥିଲେ ।
ଅତିଥିମାନେ କହିଥିଲେ, ସେନସର ସାର୍ଟିଫିକେଟ ମିଳିବା ଗୌରବର କଥା । ଏହା ଏ ଅଞ୍ଚଳର କଳାକାରଙ୍କୁ ଉତ୍ସାହିତ କରିବ । ଅଞ୍ଚଳର କଳାକାରମାନଙ୍କୁ ନେଇ ଆଗକୁ ଅନେକ ସିନେମା ପ୍ରସ୍ତୁତ କରାଯିବ । ଆସନ୍ତା ଡିସେମ୍ବର ଶେଷ ସପ୍ତାହରେ କବାଡିକୁ ସିନେମା ହଲ୍ରେ ରିଲିଜ୍ କରିବାକୁ ଲକ୍ଷ୍ୟ ରଖାଯାଇଥିବା କହିଛନ୍ତି ନିର୍ଦ୍ଦେଶକ ଅମର ମିଶ୍ର । ସେ କହିଛନ୍ତି, ଗ୍ରାମାଞ୍ଚଳ ବିଷୟବସ୍ତୁକୁ ନେଇ ଏହି ସିନେମା କରାଯାଇଛି । ଏଥିରେ ସେ ନିଜେ କାହାଣୀ ଲେଖିବା ସହ ପ୍ରଯୋଜନା ଓ ନିର୍ଦ୍ଦେଶନା ଦେଇଛନ୍ତି । ସହ ପ୍ରଯୋଜକ ରହିଛନ୍ତି କାବେରୀ ମିଶ୍ର ଓ କିଶୋର ମିଶ୍ର ଏବଂ ସହ ନିର୍ଦ୍ଦେଶକ ହେଉଛନ୍ତି ରବୀନ୍ଦ୍ର ରାଉତ । ଅଭୟ ମିଶ୍ର ସଙ୍ଗୀତ ନିର୍ଦ୍ଦେଶନା ଦେଇଥିବା ବେଳେ ଗୀତିକାର ହେଉଛନ୍ତି ବସନ୍ତରାଜ ସାମଲ । ଗୀତ ଗାଇଛନ୍ତି ବରିଷ୍ଠ କଣ୍ଠଶିଳ୍ପୀ ହ୍ୟୁମାନ ସାଗର, ଦିପ୍ତୀରେଖା ପାଢି । ମାନସ ରଞ୍ଜନ ପଣ୍ଡା, ରିସ୍ତା ମହାନ୍ତି, ରବୀନ୍ଦ୍ର ରାଉତ, ସୀତାକାନ୍ତ ପ୍ରଧାନ, ବିଜୟା ପାଣିଗ୍ରାହୀ, ପ୍ରଜ୍ଞା ପ୍ରଧାନ, ଅଜିତ ମହାପାତ୍ର, ନିରଞ୍ଜନ ପାଣିଗ୍ରାହୀ, ବୁଲୁ କୁମାର ପ୍ରମୁଖ ଅଭିନୟ କରିଛନ୍ତି
