ଭୁବନେଶ୍ୱର, ୨୦/୧୧ : ଆଜି ବିଦ୍ୟାଳୟ ଓ ଗଣଶିକ୍ଷା ବିଭାଗର ପଞ୍ଚସଖା ଶିକ୍ଷା ସେତୁ ପକ୍ଷରୁ ଆକାଂକ୍ଷୀ ପାଠ୍ୟକ୍ରମ ଅଧିବେଶନ ସଂପର୍କରେ ଏକ ଚିଠି କରାଯାଇଛି । ଏହି ଚିଠିରେ ଆରମ୍ଭରୁ ଶେଷ ଯାଏ ବନାନ ଭୁଲ୍ରେ ପୋତି ହୋଇଛି । ଏପରିକି ସରକାରୀ ମଧ୍ୟ ଠିକ୍ ଭାବେ ଲେଖି ପାରୁନାହାନ୍ତି । କେଉଁଠି ଲେଖାଯାଇଛି "ସରାକର' ତ ଆଉ କେଉଁଠି "ସାକାରୀ' । କେବଳ ଏତିକି ନୁହେଁ ସଚିବ ବଦଳରେ ‘ସଚ୍ଚିବ’, ଅଧିବେଶନ ବଦଳରେ ‘ଅଧିବଶେନ’ ଏଭଳି ବନାନ ଭୁଲ୍ ଅନେକ ରହିଛି । ଯାହାକୁ ନେଇ ଶିକ୍ଷାବିତ୍ଙ୍କ ମହଲରେ ଅସନ୍ତୋଷ ଦେଖିବାକୁ ମିଳିଛି । ମୋ ସ୍କୁଲ ନାଁ ବଦଳାଇ ପଞ୍ଚସଖା ସେତୁ ରଖାଗଲା । ମହାପୁରୁଷଙ୍କ ଗାଥାକୁ ସମ୍ମାନ ଜଣାଇ ଏଭଳି ନାଁ ରଖିଲେ ସରକାର । ହେଲେ ଓଡ଼ିଆ ଅସ୍ମିତାକୁ କୁଠାରଘାତ କରିଛି ପଞ୍ଚସଖା ଶିକ୍ଷା ସେତୁର ଏଭଳି ଉଦ୍ଭଟ ଓଡ଼ିଆ ଚିଠି । ପଞ୍ଚସଖା ଶିକ୍ଷା ସେତୁ କେବଳ ଯେ ଛାତ୍ରଛାତ୍ରୀଙ୍କ ପାଇଁ କାର୍ଯ୍ୟ କରେ ତାହା ନୁହେଁ ଶିକ୍ଷକଙ୍କ ଶୈକ୍ଷିକମାନ ବୃଦ୍ଧି ପାଇଁ ଅନେକ ସମୟରେ ପ୍ରଶିକ୍ଷଣ କାର୍ଯ୍ୟକ୍ରମ କରେ। ହେଲେ ଏଭଳି ଦାୟିତ୍ୱହୀନତା ଭାବେ ଓଡି଼ଆ ଚିଠିରେ ବନାନ ଭୁଲ କରି ପ୍ରେରିତ କରିବାକୁ ଶିକ୍ଷାବିତ୍ ମାନେ ନିନ୍ଦା କରିଛନ୍ତି ।
ସୂଚନାଯୋଗ୍ୟ, ପଞ୍ଚସଖା ଶିକ୍ଷା ସେତୁ ପକ୍ଷରୁ ପୁରୀ, ଖୋର୍ଦ୍ଧା ଓ ନୟାଗଡ଼ ଜିଲ୍ଲା ଶିକ୍ଷା ଅଧିକାରୀ (ଡିଇଓ)ଙ୍କୁ ଆକାଂକ୍ଷୀ ପାଠ୍ୟକ୍ରମର ଅଧିବେଶନର ଅଡିଓ, ଭିଡିଓ ଡକ୍ୟୁମେଣ୍ଟସେନ୍ ପାଇଁ ଚିଠି କରାଯାଇଛି । ଚିଠି ନମ୍ବର ୩୦୯/ପିଏସ୍ଏସ୍/୨୪ । ଯେଉଁ ସ୍କୁଲରେ ଏହି କାର୍ଯ୍ୟକ୍ରମ କରାଯିବ ସେ ସ୍କୁଲର ପ୍ରଧାନଶିକ୍ଷକଙ୍କୁ ଜଣାଇବା ପାଇଁ କୁହାଯାଇଛି । ହେଲେ ଏହି ଚିଠିର ସଚିବ ବଦଳରେ ‘ସଚ୍ଚିବ’ ବନାନ ରହିଛି । ଅଧିବେଶନ ବଦଳରେ ‘ଅଧିବଶେନ’, ଅଡିଓ ସ୍ଥାନରେ ‘ଓଡ଼ିଓ’ ଲେଖା ଯାଇଛି । ସବୁଠୁ ଗୁରୁତ୍ୱପୂର୍ଣ୍ଣ କଥା ସରକାରୀ ଚିଠିରେ ସରକାରୀ ବନାନ ଭୁଲ ରହିଛି । ଗୋଟିଏ ସ୍ଥାନରେ ରହିଛି, ସରାକରୀ ଉଚ୍ଚ ବିଦ୍ୟାଳୟ, ବରମୁଣ୍ଡା, ଆଉ ଏକ ସ୍ଥାନରେ ରହିଛି ଖୋର୍ଦ୍ଧା ସାକାରୀ ଉଚ୍ଚ ବିଦ୍ୟାଳୟ, ଆରସି ଭିଲେଜ୍, ଭୁବନେଶ୍ୱର। ସବୁଠୁ ଆଶ୍ଚର୍ଯ୍ୟ କଥା ଏହି ଆରସି ଭିଲେଜ ଖୋର୍ଦ୍ଧା ସାକାରୀ ସ୍କୁଲ ବୋଲି କୌଣସି ସ୍କୁଲ ନାହିଁ । ଆଇଆର୍ସି ଭିଲେଜ ସରକାରୀ ହାଇସ୍କୁଲର ନାଁ ବି ଠିକ୍ ଭାବେ ଲେଖାଯାଇନାହିଁ। ଏପରି ଦାୟିତ୍ୱହୀନତା ଭାବେ ଚିଠିକୁ କିପରି ଭାବେ ଯାଞ୍ଚ କରାନଯାଇ ପ୍ରେରିତ କରାଯାଇଛି ତାହା ପ୍ରଶ୍ନବାଚୀ ସୃଷ୍ଟି କରିଛି।
