ଭୁବନେଶ୍ୱର,୩୧/୦୮: ମହାନଦୀ ଜଳ ବିବାଦର ଆପୋସ ସମାଧାନ  କରିବାକୁ ଓଡ଼ିଶା ଓ ଛତିଶଗଡ଼ ପକ୍ଷରୁ  ସରକାରୀସ୍ତରରେ ଆଗ୍ରହ ପ୍ରକାଶ ପାଇଛି । ଦୀର୍ଘଦିନର ଏ ବିବାଦର ସମାଧାନ ପାଇଁ  ଉଭୟ ପକ୍ଷ ବାଟ ବାହାର କରିବାକୁ ସହମତ ହୋଇଛନ୍ତି । ଏପରିକି ଆସନ୍ତା ଡିସେମ୍ବର ମାସରେ ଏ ନେଇ ଓଡ଼ିଶା ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ  ଛତିଶଗଡ଼ ମୁଖ୍ୟମନ୍ତ୍ରୀ ବିଷ୍ଣୁଦେବ ସାଏ ବୈଠକରେ ଏକାଠି ହୋଇପାରନ୍ତି ।  




ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ‘ଏକ୍ସ’ରେ  ଦେଇଥିବା ସୂଚନା ଅନୁସାରେ, ଏ ଦିଗରେ  ଦୁଇ ରାଜ୍ୟ ଆଉ ଏକ ପାଦ ଆଗକୁ ବଢ଼ିଛନ୍ତି । ଓଡ଼ିଶା ଓ ଛତିଶଗଡ଼ ସରକାର ଦୀର୍ଘ ଦିନର ବିବାଦର ସମାଧାନ ଦିଗରେ ଏକ  ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛନ୍ତି । ଶନିବାର  ଅନୁଷ୍ଠିତ ବୈଠକରେ ଉଭୟ ରାଜ୍ୟର ମୁଖ୍ୟ  ଶାସନ ସଚିବ ଓ ଜଳ ସମ୍ପଦ ବିଭାଗୀୟ  ଅଧିକାରୀମାନେ ମିଳିତ ଭାବେ ବିବାଦର  ସମାଧାନ ପାଇଁ ଆଲୋଚନା କରିଛନ୍ତି ।  ଉଭୟ ରାଜ୍ୟ ଆପୋସ ବୁଝାମଣାରେ  ଲୋକମାନଙ୍କ ହିତରେ ଉଚିତ ସମାଧାନ  ବାଟ ଖୋଜିବାକୁ ସହମତ ହୋଇଛନ୍ତି ।  

ଏଥିପାଇଁ ସେପ୍ଟେମ୍ବର ମାସରେ ପ୍ରତ୍ୟେକ  ରାଜ୍ୟର ଇଆଇସିଙ୍କ ନେତୃତ୍ୱରେ ଗଠିତ  ବୈଷୟିକ କମିଟିଗୁଡ଼ିକ ଗୁରୁତ୍ୱପୂର୍ଣ୍ଣ ବିଷୟ  ଉପରେ ସପ୍ତାହକୁ ଥରେ ବୈଠକ କରିବେ ।  ଏହି କମିଟି ଦ୍ୱାରା ମହାନଦୀ ଜଳ ବଣ୍ଟନରେ  ଦୁଇ ରାଜ୍ୟରେ ଅଧିକ ସମନ୍ୱୟ ପାଇଁ ଏକ  ଢାଞ୍ଚା ପ୍ରସ୍ତୁତ କରିବା ନେଇ ମଧ୍ୟ ଆଲୋଚନା  ହେବ । ଅକ୍ଟୋବର ମାସରେ ଆଉଥରେ  ମୁଖ୍ୟ ସଚିବ ଓ ଜଳସମ୍ପଦ ସଚିବସ୍ତରୀୟ  ବୈଠକ ଅନୁଷ୍ଠିତ ହେବ । 

ଡିସେମ୍ବର ମାସରେ, ସୁବିଧା ଅନୁସାରେ ଉଭୟ ରାଜ୍ୟର  ମୁଖ୍ୟମନ୍ତ୍ରୀ ଏକାଠି ହେବେ । ଉଭୟ ରାଜ୍ୟର ଲୋକମାନଙ୍କ  ହିତରେ ଦୀର୍ଘକାଳୀନ ଭାବରେ ସହମତିଭିତ୍ତିରେ ସମାଧାନ  ପାଇଁ ବାଟ ବାହାର କରିବେ । ଓଡ଼ିଶା ସରକାର ସମସ୍ତଙ୍କ ପାଇଁ  ଏକ ସମାବେଶୀ ତଥା ପାରସ୍ପରିକ ହିତକାରୀ ସମାଧାନ ପାଇଁ  ଖୋଲା ମନରେ କାର୍ଯ୍ୟ କରିବାକୁ ପ୍ରତିଶ୍ରୁତିବଦ୍ଧ । ଦୁଇ ରାଜ୍ୟ ଏ  ବିବାଦର ସମାଧାନ ପାଇଁ ଅଣ୍ଟା ଭିଡ଼ିଥିବାରୁ ଆଗାମୀ ଦିନରେ କି  ବାଟ ଫିଟୁଛି ତାହାକୁ ସମସ୍ତଙ୍କ ଅପେକ୍ଷା।