ଭୁବନେଶ୍ୱର,୨୯/୧୧: ନୀତି ଆୟୋଗ ଢାଞ୍ଚାରେ ରାଜ୍ୟ ଯୋଜନା ବୋର୍ଡର ପୁନର୍ଗଠନ କରିବାକୁ ରାଜ୍ୟ ସରକାର ବିଶେଷଜ୍ଞମାନଙ୍କ ସହ ଆଲୋଚନା କରୁଛନ୍ତି । ବିଜେପି ସଭ୍ୟ ଟଙ୍କଧର ତ୍ରିପାଠୀଙ୍କ ପ୍ରଶ୍ନରେ ଏ ଲିଖିତ ଉତ୍ତର ରଖିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ।
ଉତ୍ତରରେ ମୁଖ୍ୟମନ୍ତ୍ରୀ ଦର୍ଶାଇଛନ୍ତି, ଗତ ୨୪ ବର୍ଷରେ ରାଜ୍ୟ ଯୋଜନା ବୋର୍ଡ ବୈଠକ ମାତ୍ର ୨ ଥର ବସିଛି । ୨୦୦୩ ମସିହା ମେ ମାସରେ ଥରେ ଏବଂ ୨୦୦୭ ଅକ୍ଟୋବରରେ ଥରେ ଏ ବୈଠକ ବସିଥିଲା । ଯୋଜନା ବୋର୍ଡକୁ ପୁନର୍ଗଠନ ଦିଗରେ ସରକାର ବିଚାର କରୁଥିବା ମୁଖ୍ୟମନ୍ତ୍ରୀ ଦର୍ଶାଇଛନ୍ତି ।
ଉଲ୍ଲେଖଯୋଗ୍ୟ, ରାଜ୍ୟକୁ ବିକାଶରେ ଆଗକୁ ନେବା ସହ ନୂଆ ଯୋଜନା ପ୍ରଣୟନ କରିବାରେ ରାଜ୍ୟ ଯୋଜନା ବୋର୍ଡର ରହିଛି ଗୁରୁତ୍ୱପୂର୍ଣ୍ଣ ଭୂମିକା । ମାତ୍ର ଗତ କିଛି ବର୍ଷ ହେବ ଏହା ଏକରକମ ଅଚଳ ଅବସ୍ଥାରେ ରହିଛି । ନା ଏହାର ଉପାଧ୍ୟକ୍ଷ ନିଯୁକ୍ତ ହେଉଛନ୍ତି, ନା ସଦସ୍ୟ । ମୁଖ୍ୟମନ୍ତ୍ରୀ ଅଧ୍ୟକ୍ଷ ଥିବା ଏହି ବୋର୍ଡର ବୈଠକ ମଧ୍ୟ ବସୁନାହିଁ । ସମୟକ୍ରମେ ଗୁରୁତ୍ୱ ହରାଇ ଅଚଳ ଏହି ବୋର୍ଡକୁ ଅଧିକ କ୍ରିୟାଶୀଳ ଓ ଦକ୍ଷ କରିବାକୁ ପୁନର୍ଗଠନ ନେଇ ସରକାର ବିଚାର ବିମର୍ଶ କରୁଛନ୍ତି।
