ଭୁବନେଶ୍ୱର, ୧୨/୧୨: କଟକ ଜବାହାରଲାଲ୍ ନେହରୁ ଇନ୍ଡୋର ଷ୍ଟାଡିୟମରେ ଚାଲିଥିବା ଓଡ଼ିଶା ମାଷ୍ଟର୍ସ ବିଡବ୍ଲ୍ୟୁଏଫ୍ ଟୁର ସୁପର-୧୦୦ରେ ଓଡ଼ିଆ ଯୋଡ଼ି ଋତୁପର୍ଣ୍ଣା ପଣ୍ଡା ଓ ଶ୍ୱେତପର୍ଣ୍ଣା ପଣ୍ଡା ମହିଳା ଡବଲ୍ସ ପ୍ରି-କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି । ଏହି ଯୋଡ଼ି ୨୧-୧୪, ୨୧- ୧୪ରେ ଆରଧନା ବାଲଚନ୍ଦ୍ର ଓ ମୁସ୍କାନ ଖାନଙ୍କୁ ପରାଜିତ କରିଥିଲେ । ମ୍ୟାଚ୍ ୩୭ ମିନିଟ୍ ଧରି ଚାଲିଥିଲା । ପ୍ରି-କ୍ୱାର୍ଟରରେ ପଣ୍ଡା ଭଗିନୀ କନିକା କନୱାଲ-ଭାରତୀ ପାଲଙ୍କୁ ଭେଟିବେ ।
ପୁରୁଷ ଡବଲ୍ସରେ ଅନ୍ୟତମ ଓଡ଼ିଆ ଯୋଡ଼ି ଅଭିନାଶ ମହାନ୍ତି ଓ ଆୟୂଷ ପଟ୍ଟନାୟକ ପରାଜିତ ହୋଇ ବିଦାୟ ନେଇଛନ୍ତି । ଏହି ଯୋଡ଼ି ୧୭-୨୧, ୧୨- ୨୧ରେ ଜାପାନର ହିରୋକି ନିଶି ଓ କାକେରୁ କୁମାଗାଇଙ୍କ ଠାରୁ ପରାଜିତ ହୋଇଥିଲେ ।
ଅନ୍ୟ ମ୍ୟାଚ୍ ଗୁଡ଼ିକରେ ପୁରୁଷ ସିଙ୍ଗଲ୍ସରେ ଅଭିନବ ଠାକୁର ୨୧- ୧୬, ୨୨-୨୦ରେ ଚୀନର ୱାଙ୍ଗ ଜି ଜୁନଙ୍କୁ, ଗୋବିନ୍ଦା କ୍ରିଷ୍ଣା ୮-୪ରେ ଅଭିଷେକ କନପାଲାଙ୍କୁ (ରିଟାୟାର୍ଡ) ପରାଜିତ କରିଥିଲେ । ସେହିପରି ମହିଳା ସିଙ୍ଗଲ୍ସରେ ତସନିମ ମୀର ୨୧- ୧୧, ୨୧-୫ରେ ଜିଆନ୍ନା ଷ୍ଟିଗଲିଚଙ୍କୁ ହରାଇଥିଲେ।
